Łukašenka padaje. Apytańnie paćvierdziła, što admoŭny rejtynh Łukašenki vysoki. Jon na 18 punktaŭ pieravyšaje jahony stanoŭčy rejtynh. Z 24% hałasoŭ pry zakrytym pytańni hetaja ličba źnižajecca da 9% pry adkrytym pytańni «Za kaho b Vy prahałasavali, kali b prezydenckija vybary adbyvalisia siońnia?» ŭ paralelnym apytańni «Lusterka». Pryčym hetaha palityka mnohija nie prymajuć nastolki, što ŭ piaci ankietnikach adkrytaha apytańnia było napisana «Chto zaŭhodna, tolki nie Łukašenka».
Davier da intelihiencyi
Dziela paraŭnańnia, da śpisu palitykaŭ my dadali niekalki emblematyčnych hramadzkich dziejačoŭ. Vyniki ŭzrušajuć. Akazałasia, što ludzi kultury vyklikajuć našmat bolšy davier hramadztva, čym kadravyja palityki. Hetak, 67-hadovy Hienadź Buraŭkin na roŭnych zmahaŭsia b z A.Łukašenkam. U hetym kantekście cikava, kolki ž hramadzkich dziejačoŭ my pabačym poruč z palitykami ŭ vybarčych śpisach apazycyi.
Treba adznačyć, što ŭ apytalnikach usie proźviščy, u tym liku i kiraŭnikoŭ partyj, išli biez paznaki partyjnaj prynaležnaści.
Biełaruskuju hramadzkuju dumku časta nazyvajuć iracyjanalnaj i ślapoj. U tym, što heta nia tak, moža pierakanacca lider «Zubra» Ŭładzimier Kabiec. Jon tolki niadaŭna ŭvajšoŭ u publičnuju palityku, i jahonaha proźvišča prosta nia viedajuć. Voś jon i nabraŭ tolki hałasy, jakija možna charaktaryzavać jak «suprać usich» (a takich, darečy, niezvyčajna šmat, kala piataje častki).
Efekt prysutnaści
Z partyjnych lideraŭ novaje chvali najbolšuju papularnaść u stalicy maje staršynia Partyi BNF Vincuk Viačorka. Heta dla kahości niečakana, ale lohka znachodzić vytłumačeńnie. Jon paśladoŭny palityk, jaho imia daŭno na słychu, asacyjujecca z najviadomiejšaj apazycyjnaj partyjaj, nie było źviazana z skandałami.
Apytańnie jašče raz paćvierdziła, što tolki doŭhija hady prysutnaści na palityčnaj arenie dajuć paznavalnaść. Prynamsi, va ŭmovach niedaraźvitaści systemy ŚMI. Niahledziačy na hod aktyŭnaje dziejnaści, nie ŭdałosia stać persanalna viadomymi deputatam Frałovu j Parfianoviču. I heta ŭ stalicy. U rehijonach, musić, spravy stajać jašče horš.
Toje samaje možna skazać i pra łukašenkaŭcaŭ (Papoŭ, Kanaploŭ, Kaścian), ale hetyja chłopcy nia ŭ Miensku buduć vybiracca i nie na viadomaść raźličvajuć.
Umacoŭvajucca niezaležnickija nastroi
Jakija šče tendencyi ŭ hramadzkaj dumcy? Śviedčać inšyja vyniki, ahučanyja słužbaj «Lusterka». Absalutnaja bolšaść žycharoŭ stalicy pa-raniejšamu vykazvajecca suprać źmienaŭ u Kanstytucyju, jakija b dazvolili Łukašenku abiracca na treci termin (51% suprać, 13% za). Adbyŭsia pierałom i ŭ staŭleńni da intehracyi z Rasiejaj. Upieršyniu kolkaść prychilnikaŭ niezaležnaści pieravysiła kolkaść prychilnikaŭ jadnańnia z Rasiejaj (37% suprać 35%).
Systema pad pahrozaj
Niama nivodnaha biełaruskaha palityka, čyj stanoŭčy rejtynh pieravyšaŭ by nehatyŭny. Za miažoj takoje niemahčyma. Heta znak poŭnaha niaviedańnia hramadzianami palitykaŭ, niedavieru da ich i niecikavaści imi, niezaležna ad ich palityčnaje maści. Pry takoj sytuacyi ŭździejańnie zvonku, z Rasiei, pry peŭnych umovach pahražaje dziejnaj palityčnaj systemie metamarfozami ci navat kryzysam.
Pryčyna takoha stanovišča — niesvaboda ŚMI. Praktyčna manapolija na infarmacyju — u rukach dziaržavy. Pry hetym niesvabodnyja ŭradavyja ŚMI pa vyznačeńni nia mohuć zabiaśpiečyć pluralizmu, jakaści, cikavaści infarmacyi. U vyniku vybarcy tatalna nia viedajuć i nia vierać. Prybiary Łukašenku — i zaźziaje pustka, što moža zapoŭnicca aby-kim.
Mikoła Buhaj
