Absalutnaja bolšaść delehataŭ źjezdu BNF padtrymała Viačorku i ŭdzieł u «Narodnaj kaalicyi 5+».
Apanenty vystupali za admovu ad chaŭrusu ź liberałami j kamunistami dy hurtavańnie z nacyjanalnymi siłami.
Źjezd BNF adbyŭsia 20 śniežnia pad Mienskam. Pamiaškańnie šukali śpiecham, bo «Raŭbičy» skasavali papiaredniuju damovu arendy. Achovu papiaredzili nie puskać u zalu pasiedžańniaŭ čužyncaŭ kštałtu Sieviarynca dy Siŭčyka, jakija, na dumku arhanizataraŭ, mahli sarvać rabotu. U prezydyjumie byŭ zaŭvažany niadaŭna vyzvaleny Viktar Ivaškievič. Delehaty i hości, ahulnaj kolkaściu pad trysta čałaviek, zasłuchali spravazdaču staršyni i namieśnikaŭ. Vystupali jak delehaty, tak i hości schodu.
Pradstaŭnica AHP Ludmiła Hraznova ŭchvaliła ŭdzieł BNF u stvareńni «piaciorki». Mastak Maračkin vykazaŭ abureńnie pavodzinami Łukašenki na sustrečy ź intelihiencyjaj. Sp.Jaŭmienaŭ z Asipovič adznačyŭ, što ciažka rastłumačyć ludziam, čamu niemahčymy ekanamičny rost biez adradžeńnia Biełaruščyny. Čulisia prapanovy adkryć partyjnuju hazetu, padtrymać (choć maralna) deputataŭ Frontu ŭ miascovych savietach.
Z trybuny hučała j rezkaja krytyka. Amal nie pravodziacca masavyja akcyi, zamiest pracy z nasielnictvam — razmovy ŭ kabinetach. Front rassypajecca, hublaje znakavyja fihury i aktyŭnuju, dziejnuju moładź. Słova «BNF» niezvarotna zabrudžanaje prapahandaj. Tre mianiać nazvu arhanizacyi (śmiech u zale). Dastałosia Viačorku za kantakty z kalakincami, za toje, što Front sastupaje ŭ papularnaści AHP. Hučali zakliki źmianić taktyku, stratehiju i kiraŭnictva. Vincuk słuchaŭ hnieŭnyja tyrady moŭčki, amal nie pierabivajučy navat tady, kali adviedzieny pramoŭcu čas skančaŭsia. Kali ž jaho zanadta nachvalvali asobnyja prychilniki, staršynia zvaniŭ u zvanočak. Sapraŭdny palityk.
Chvalili za toje ž, za što j łajali: za pašyreńnie mižnarodnych stasunkaŭ partyi, supracoŭnictva ź inšymi demsiłami, pierachod ad vuličnych formaŭ baraćby, jak małaperspektyŭnych, da sprobaŭ stvaryć systemnuju apazycyju. Prychilniki Viačorki adznačali, što Sieviaryniec sam bačyŭ «Małady front» samastojnaj arhanizacyjaj. «Davajcie budziem siabrami», — zaklikali vystupoŭcy. Pahadzicca z tezysam, što Biełaruś akupavanaja, što vybary treba bajkatavać, niama nijakaj mahčymaści. «Uvohule, hramadztva našaje narmalnaje. Treba tolki pazbavicca łukašyzmu», — adznačaŭ Viačorka.
Aleś Astroŭski z Horadni narakaŭ na słaby ŭdzieł Frontu ŭ kurapackaj spravie. Vinavaciŭ kiraŭnictva ŭ pravale śviatkavańnia 85-j hadaviny BNR, niaŭmieńni zachoŭvać adzinstva ź idejna blizkimi siłami. Hałoŭnaje, na jaho dumku, nie adchileńnie Łukašenki, a pabudova biełaruskaj dziaržaŭnaści: «My pavinny być słužboŭcami-prafesijanałami, a nia vuličnymi zmaharami. Treba nabyvać viedy. Hramadztva pavinna adčuć, što jość alternatyva ŭładzie. I heta — my!» Adčuvałasia, što krytyki Viačorki nia majuć idealahičnych razychodžańniaŭ ź im, ale nie ŭchvalajuć jahonaje praktyki kiravańnia i sumniajucca ŭ jahonym liderskim patencyjale. Ichnym prapanovam nie stavała kankretyki. «Pierajści da dziejańniaŭ pa delehitymizacyi režymu», — prapanoŭvaŭ Anatol Fiodaraŭ. Ale jakich? «Jadnacca z patryjatyčnymi siłami». Ale ź jakimi, kali bolšaść ź ich pabudavana na pryncypie pravadyryzmu? Choć niezadavolenaść i bol, što hučali ŭ ichnych vystupach, bolš čym zrazumiełyja.
Paśla haračych dyskusij 151 delehat z 221 acanili dziejnaść kiraŭnictva jak zdavalniajučuju. Na pasadu staršyni partyi byli vyłučanyja Aleś Astroŭski, Anatol Fiodaraŭ, jaki vinavaciŭ kiraŭnictva Frontu ŭ partyjnych čystkach, Aleś Michalevič i Vincuk Viačorka. Fiodaraŭ svaju kandydaturu źniaŭ na karyść Astroŭskaha. «Astroŭski razumny, adukavany čałaviek, ale ž jak jon budzie kiravać z Horadni», — razvažali ŭ kalidorach. Michalevič admoviŭsia na karyść Viačorki. Za Viačorku prahałasavali 149 delehataŭ, Astroŭski zdabyŭ padtrymku 55 čałaviek.
Staršynia prapanavaŭ kandydatury namieśnikaŭ. Chtości prapanavaŭ Astroŭskaha, ale, zhodna z rehlamentam, namieśnikam nia moža stać čałaviek, jaki balatavaŭsia na pasadu staršyni. U Froncie pavinna być strohaja padparadkavanaść. Heta vam nie liberalnaja AHP. Namieśnikami abrali Viktara Ivaškieviča, Jurja Chadyku, Alaksieja Janukieviča i Alesia Michaleviča.
U rezalucyi źjezdu patrabujecca spynić prynižeńnie biełarusaŭ «va ŭhodu palitykanskim zadumam A.Łukašenki», zajaŭlajecca, što nielha nazyvać «vybarami» spektakl, jaki ładzicca režymam, ale ž vitajecca ŭdzieł u kampanii z metaj reklamy idej partyi i ruchu ŭ hramadztvie. Rezalucyja źmiaščaje zaklik da mižnarodnaj supolnaści ažyćciaŭlać pieradvybarčy manitorynh u krainie. Budučynia Biełarusi — u supolnaści svabodnych narodaŭ Eŭropy. Źjezd vitaje stvareńnie «Narodnaj kaalicyi 5+», zasnavanaj na pryncypach demakratyzacyi, sfarmulavanych ABSE. Heta spynieńnie palitrepresijaŭ, svaboda ŚMI, prazrystyja, roŭnyja i spraviadlivyja vybary, padzieł uładaŭ. I, kaniečnie, zachavańnie niezaležnaści Biełarusi.
Nielha nie adznačyć śmiełaści, ź jakoj Viačorka pryvioŭ u kiraŭnictva partyi moładź — Janukieviča j Michaleviča. Heta viastuje niepaźbiežnuju kaliści źmienu pakaleńniaŭ.
Jaŭhien Łahoŭski
