29.01.2004
Zarobak u eŭra nia vyras
U 2003 h. siaredni zarobak u Biełarusi vyras na 21,9% u dalarach i na 0,5% u eŭra. Takija padliki zrabiła ahienctva BiełaPAN. Siaredni zarobak (da vyliku padatkaŭ) skłaŭ u śniežni 299.859 rub.
CEC na polskim vuhali
Čarhovy prajekt, nakiravany na źmianšeńnie enerhazaležnaści ad Rasiei: u Bieraści zbudujuć ciepłaelektrastancyju, jakaja budzie pracavać na vuhali, zdabyvanym u Lublinskim vajavodztvie Polščy, za 120 km ad Bieraścia. Prajekt koštam 150 młn dalaraŭ kredytujuć «eŭrapiejskija banki». Najbližejšy šlach padvozu syraviny — čyhunkaj praz Uładavu, što ciapier zusim nie vykarystoŭvajecca dla hruzavych i mižnarodnych pieravozak.
U Mazyry zhornuć brovar
AAT «Mazyrpiva» padšukała novaha investara — izrailskuju firmu «Ahrałeksveł», jakaja nabyła 30% akcyj pradpryjemstva. Ale rataŭnik kryzysnaha pradpryjemstva źbirajecca admovicca ad pivavarstva i pieravieści zavod na vypusk limanadaŭ i kvasu. Maŭlaŭ, ni abstalavańnie brovaru, ni mazyrskaja žorstkaja vada nie dazvalajuć vypuskać kankurencyjnaje piva.
Darečy, siaredni čech vypivaje 159 litraŭ piva ŭ hod (absalutny rekord), niemiec — 122, palak — 68, a biełarus — tolki 28—30 litraŭ.
Fermery Bieraściejščyny
Letaś 65 fermeraŭ na Bieraściejščynie zharnuli dziejnaść. Adnak utvaryłasia 171 novaja haspadarka, pryčym až 101 ź ich — u Łuninieckim rajonie. Usiaho ž u vobłaści 528 fermerskich paletkaŭ. Ułady spakušajuć fermeraŭ brać u arendu kałhasy-bankruty. Sioleta takich planujecca refarmavać 100. Pryvatny sektar Bieraściejščyny ŭ 2003 h. daŭ 48% vałavoj pradukcyi sielskaj haspadarki rehijonu.
Rekord ekspartu kryvavaha tavaru
Hałoŭny rasiejski eksparcior zbroi, dziaržaŭnaja kampanija «Rosabaronekspart», pradaŭ u 2003 h. uzbrajeńniaŭ na rekordnuju sumu 5,1 młrd dalaraŭ. Hałoŭnyja pakupniki rasiejskaj zbroi — daŭnija supierniki Indyja dy Kitaj. Najbolšyja kantrakty — pastaŭka Pekinu 24 źniščalnikaŭ «Su-30MKK» bolš čym na miljard dalaraŭ i nabyćcio Deli avijanosca «Admirał Harškoŭ» z 12 źniščalnikami MiH-29K na borcie za 1,6 młrd.
Novaja krynica hazu dla Eŭropy
Hazapravod z Ehiptu moža być padoŭžany da Turcyi. Damovu pra heta padpisali premjery Ehiptu, Jardanii, Syryi j Libanu. Pieršy kavałak «arabskaha» hazapravodu ŭžo ekspluatujecca ź lipienia 2003 h. Heta rura daŭžynioj 270 km z Synaju ŭ Jardaniju, što pralehła ŭ tym liku na 16 km miž partami Taba j Akaba pa dnie Čyrvonaha mora.
MB; BiełaPAN
