Vypuskniki Biełaruskaha liceju vytrymali ekzameny eksternam. Pałova liceistaŭ praciahnie adukacyju za miažoj, pałova zastaniecca ŭ Biełarusi. Na vypusknym bali Liceju prysutničali dziejačy intelihiencyi i pradstaŭniki dypkorpusu. Licej robić novy nabor.Namieśnik dyrektara začynienaha Humanitarnaha liceju imia Jakuba Kołasa Lavon Barščeŭski ceły hod najbolš bajaŭsia za vypusknikoŭ. «Im prapanoŭvali Licej BDU z abiacańniami harantavanaha pastupleńnia ŭ hety ŭniversytet. Vypuskny kurs byŭ abjektyŭna słabiejšy za papiarednija, tamu mnohija pajšli hetym šlacham. Praŭda, siarod tych, chto pierajšoŭ u Licej BDU, było niekalki mocnych vučniaŭ». Na vypusknym čaćviortym kursie zastalisia 23 navučency.
«Hod u padpolli» zahartavaŭ liceistaŭ. «Ciahavity kurs» — tak charaktaryzuje sioletnich vypusknikoŭ Ł.Barščeŭski. A voś liceist Hleb Łabadzienka nazyvaje hety vypusk liceistaŭ «niapravilnym». «Absalutna ŭsio išło nia tak, jak maje być, — kaža jon. — Adnak hety hod daŭ viery ŭ siabie i Licej».
Na siońnia dyplomy Liceju atrymali 17 čałaviek, astatnija vučni majuć zapazyčanaści: jašče nia ŭsie zaliki i testy zdadzienyja, i im na vypusknym bali ŭručyli pakul tolki pachvalnyja listy. Ale ŭžo ŭ samy bližejšy čas 2-3 čałavieki pavinny atrymać dyplomy. Prynamsi, vykładčyki hatovy pracavać usio leta. Pavodle słoŭ Barščeŭskaha, nia stavicca nijakich kankretnych terminaŭ, bo kožnyja try dni niechta zdaje ekzameny eksternam. Darečy, niekatoryja liceisty majuć vytrymać ad 15 da 17 ispytaŭ. «Baćki vielmi chvalavalisia, što buduć zanižać adznaki na ispytach. Ale ž adznaki ŭ vypusknikoŭ na eksternach vychodziać značna vyšejšyja za ŭnutrylicejskija, bo my stroha kirujemsia ministerskimi instrukcyjami i ŭ nas patrabavańni stražejšyja», — kaža Lavon Barščeŭski.
Vyniki ž eksternaŭ na siońnia nastupnyja: 27 «dziasiatak», 52 «dziaviatki», 29 «vosiemak», 15 «siemak», 11 «šostak», 4 «piaciorki», 2 «čaćviorki» i 1 «trojka». Pry hetym u Licei siarednim bałam navučencaŭ była «siamiorka», radziej «vaśmiorka».
Zusim nijakich prablem niama z profilnymi pradmietami — historyjaj, litaraturaj, zamiežnaj movaj, suśvietnaj mastackaj kulturaj. Tut adznaki redka byvajuć nižejšymi za «vosiem». Ź nieciarpieńniem čakajuć vynikaŭ centralizavanaha testavańnia pa biełaruskaj movie. Siarod najlepšych vučniaŭ Lavon Barščeŭski nazyvaje Aksanu Biazrukuju, Mikałaja Kazaka, Paŭła Kotava, Kaciarynu Ivanovič. Bolš za ŭsich ździviŭ Illa Kaśpiarovič, jaki zdaje ispyty ŭ Kojdanaŭskim rajonie i značna palepšyŭ svaje licejskija adznaki.
Paśla vypusknych ispytaŭ dla liceistaŭ jość dva varyjanty dla praciahu adukacyi. Značnaja častka navučencaŭ vypravicca va ŭniversytety Čechii, Litvy, Hiermanii, Polščy. Tym, chto vyrašyŭ praciahvać adukacyju ŭ Čechii, prychodziłasia vybirać užo naprykancy 2003 h. Takija ŭmovy českaha boku. Tudy pajeduć šeść abo siem čałaviek, u Litvu — piaciora, adzin liceist vypravicca ŭ Niamieččynu. Im nia pryjdziecca zdavać ustupnych ispytaŭ. Heta ŭžo vyrašana na ŭzroŭni ministerstvaŭ adukacyi hetych krainaŭ. Tam ža dla liceistaŭ pryznačany stypendyi. «Jany nievialikija, ale ž na žyćcio i pajezdku damoŭ chopić», — kaža Lavon Barščeŭski.
Pierad pastupleńniem u Čechii i Polščy liceisty ceły hod buduć vyvučać movu. Asnoŭnyja specyjalnaści — heta mižnarodnyja adnosiny, historyja, psychalohija, sacyjalohija. Barščeŭski ličyć adukacyju za miažoj dobrym varyjantam. Praŭda, jość i inšyja dumki.
Hetak, baćka sioletniaj vypusknicy Liceju filozaf Ihar Babkoŭ ličyć niemetazhodnym adpraŭlać dziaciej vučycca za miažu. «Heta piać hadoŭ samoty. Dyj naahuł adukacyja ŭ Litvie ci Čechii bolš pravincyjnaja, čym u Biełarusi. Asabliva pa sacyjalnych navukach. I niama nijakaje harantyi, što jany viernucca. Dyj ci buduć jany zapatrabavanyja paśla viartańnia tut?» Barščeŭski kaža: «Navat kali chto j zastaniecca za miažoj — buduć prynosić karyść dyjaspary. Sprava znojdziecca zaŭždy».
Taja častka vypusknikoŭ, što abrała navučańnie ŭ Biełarusi, taksama addaje pieravahu specyjalnaściam humanitarnaha profilu. Hleb Łabadzienka z 42-j hrupy pieramoh u konkursie «Abituryjent žurfaku BDU» i pastupiŭ tudy bieź ispytaŭ. Jon zadavoleny, kaža: «Hałoŭnaje — zajmacca lubimaj spravaj, kab nie pieraškadžali».
Što datyčyć budučyni samoha Liceju, to vialiki spadzieŭ uskładajecca na ciapierašnija treci i druhi kursy. Apošnija zdajuć ciapier ekzameny za kurs bazavaj škoły i pakazvajuć vielmi vysokija vyniki. Chacia paśviedčańnie ab bazavaj adukacyi im nie patrebna. Druhakurśniki buduć praciahvać vučobu ŭ Licei. Na treci kurs robiać staŭku vykładčyki. Lavon Barščeŭski kaža, što dla ich planka bolš vysokaja. «Jany mocnyja ŭ svaich viedach».
Viadziecca taksama nabor na pieršy kurs Liceju. Siarod tych, chto prajšoŭ testy i sumoŭje, užo zaličana adzinaccać čałaviek. Licej žyvie.
Siarhiej Denski
