Leta ŭ Homieli ŭ čaćvierty raz adznačajecca vialikim chardkor-sejšenam «Mass Medium»
Ciapier u Biełarusi modna jhrać kor. Čamu? Dzieciam treba miasa: arhanizm taki. Pad jaho praściej u stralałki hulacca albo pieražyvać ciažkuju zadušlivuju bytavuchu vakoł. Dyrektar plažu, načalnik usiaho hetaha festu-biazładździa — «Pavuk» z hurtu «Rasta». «Rasta» — heta surjozna. Heta jak FK «Homiel». Chłopcy mohuć padpalić moładź, cikavaść da siabie padtrymlivajuć. Horad dumaje, ci heta «Harley» ŭ Źmitra, adnaho z vakalistaŭ, i ci jon sapraŭdny albo vytačany na Sielmašy. Nie, heta nia «Harley» i nie ź Sielmašu, heta «Suzuki».
Inšaja koravaja zorka, «TT-34», mierapryjemstva prapuściła. Siarod adnosna novych koravych bandaŭ možna vydzielić «ZV!K» — novy enfent terrible homielskaj rokavaj tusoŭki. Hetyja try bandy plus jašče «M.L.A.» i «KONTUR» lohka mohuć zadavolić koravuju aŭdytoryju. U ich jość što skazać. Što nie padabajecca, dyk heta plažnyja chłopčyki, jakich šmat źjaviłasia apošnim časam. Jany chočuć ihrać pryhožuju i ciažkuju muzyku, vyhladajuć prosta cudoŭna. MTV.
Šyroka vysunulisia panki. Lepšyja tut, paśla źniknieńnia «Mandražu», «Acietilen». Pank z dabaŭleńniem ska. Biez palityčnaj napruhi — pieśni ab prablemach, jakija chvalujuć usich, śmiech z prablemaŭ, jakija ŭsich chvalujuć. Teksty biaz łajanki. «Mumificirova(n)» — modnaja fiška. Minimalizm. U hurcie tolki bas-hitaryst i bubnač. «Haraž (104)» — kalifarnijski pank ź idyjamatyčnymi słovami.
Usio pačałosia 2 lipienia a 15-j. Klub «Adrenalin». Pieradnavalničnaja pachmurnaja śpioka nie abiacała ničoha dobraha. Narodu sabrałosia bolš, čym na lubym homielskim apazycyjnym mitynhu. Možna skazać, biez spaźnieńniaŭ vypuścili pieršych. «Mumificirova(n)», «Liberum Veto», «Haraž (104)»... Nie zhadaŭ vyšej pra «Tonatos» — taksama chardkoravaja banda. Hurt nie ŭmiaščajecca ŭ stylistyčnyja ramki. Chłopcy lubiać džaz (i jhrajuć jaho prosta na vulicy, dla ŭsich). Padklučajuć duchavyja, harmonik, ale heta nia brehavič-kor a la «Zdob si zdub».
«Adrenalin». Leta. 3-i pavierch. Vokny začynieny. Žach. Łaźnia. Dychać ciažka. Vyratavańnie ad duchaty albo ad nielubimha hurtu šukali na nižnich pavierchach: u kaho byli hrošy — u bary na druhim, astatnija — nižej i ŭ sutareńniach. DK «Festyvalny» (były DK Chimikaŭ) pieratvaryŭsia ŭ niefarmalny strakaty murašnik. Achova napružana nazirała za biesparadkam i čakała, kali heta narešcie skončycca. Mierapryjemstva padychodziła da kulminacyi, kali vyjšli «Stormhold» — novy hurt Naža (słavuty vakalist «Gods Tower»). Natoŭp padciahnuŭsia bližej. Tady, napeŭna, zala była najbolš poŭnaj. Ale narod pačaŭ stamlacca. Stolki ciažaru j fizyčnaj napruhi (muzyčka ŭsio ž ruchavaja, da taho ž i družnyja rabiaty skiny nie dajuć rassłabicca) nia kožny vytryvaje. Narešcie pačali źjaŭlacca chiedłajnery.
Poŭnaściu hety artykuł možna pračytać u papiarovaj i pdf-versii "Našaj Nivy"
Andrej Anańjeŭ
