Čamu čałaviek nia moža atrymać vizu ŭ Litvu sam, ale lohka moža kupić jaje ŭ turahienctvie, pierapłaciŭšy 10 eŭra?
Jašče 15 lipienia Ministerstva zamiežnych spraŭ Biełarusi ŭručyła litoŭskamu pasłu notu suprać stanovišča z čerhami i zamarudžanym pracesam vydačy viz. Dla razboru sytuacyi ŭ Miensk prybyła hrupa čynoŭnikaŭ konsulskaha departamentu MZS Litvy na čale z Vajdatasam Verbam. Adnak i bolš čym praz paŭmiesiaca čerhi kala konsulstva nia źnikli.
Ludzi, jakija paspytali čerhaŭ kala litoŭskaha konsulstva, narakajuć na turfirmy, što afarmlajuć hrupy biez papiaredžańniaŭ: «Turfirmy zamarudžvajuć, a to i naahuł prypyniajuć čarhu dla asobnych hramadzian. Zapuskajuć to 6-7 razoŭ pa 10 čałaviek, to trojčy pa piać — i ŭsio». Ludzi kala konsulstva prosta nia viedajuć, čaho čakać. A pradstaŭniki kampanij, jakija zajmajucca pasiarednickaj dziejnaściu, ličać niemetazhodnym uskładvać na ich vinu za čerhi ŭ konsulskija adździeły: «Dla nas isnuje asobnaja čarha i akiency na pryjom dakumentaŭ».
Časovy pavierany pasolstva Litvy ŭ Biełarusi Maryjus Janukonis nie abviarhaje najaŭnaści čerhaŭ. Ale daje aficyjnuju versiju ich uźniknieńnia — novyja standarty afarmleńnia ankiet, źviazanyja z ustupleńniem Litvy ŭ Eŭraźviaz. «Chacia my i dabavili ludziej, kožny dzień zastajecca pa 10—15 niepryniatych padaŭcoŭ, — kaža jon. — Sezonny ŭsplosk abiacaje spaści da vieraśnia».
Prava na vyjezd
Pierapłaciŭšy amal pałovu koštu samoj vizy (naprykład, u vypadku litoŭskaj, za adnarazovuju — 20 eŭra, dvuchrazovuju tranzytnuju — 25 eŭra, šmatrazovuju — 35 eŭra), atrymlivaješ jaje biaz straty nervovych kletak. Žurnalistka Śviatłana Kurs raspaviała, što sama prastajała kolki dzion kala konsulstva Litvy, a paśla źviarnułasia da pasiarednika — turfirmy. «Jany biaruć 8—10 eŭra ŭ dadatak da koštu vizy, ale ž nia treba čakać u biaskoncych čerhach», — kaža jana. Darečy, suma ŭ 10 eŭra roŭnaja, naprykład, paŭtara dnia pracy doktara ci piatnaccaci hadzinam pracy vykładčyka ŭniversytetu biez navukovaj stupieni. U mienskich turfirmach kažuć, što hety košt — tolki vynik kalkulacyi: praca supracoŭnika, kancylarskija vydatki.
Poŭnaściu hety artykuł možna pračytać u papiarovaj i pdf-versii "Našaj Nivy"
Siarhiej Trafiłaŭ
