Biznesoŭcaŭ-deputataŭ Mikałaja Skutava i Alaksieja Vahanava ŭ nastupnaj pałacie nia budzie. Pastaŭskaja vybarčaja kamisija admoviła ŭ rehistracyi inicyjatyŭnaj hrupy dziejnaha deputata Mikałaja Skutava, jaki byŭ hieneralnym dyrektaram ZAT «BiełRosUkrnafta», CVK paćvierdziła rašeńnie akruhovaj kamisii. Viadomy ž biznesoviec Alaksiej Vahanaŭ, staršynia kamisii hrašova-kredytnaj palityki i bankaŭskaj dziejnaści PP NS, «sam vyrašyŭ» na vybary nie iści.U toj samy čas biez prablem prajšli rehistracyju inicyjatyŭnyja hrupy ŭsich siabroŭ deputackaj hrupy «Respublika».
Kankurentam U.Parfianoviča ŭ Čkałaŭskaj akruzie №98 moža stać hanarovy staršynia AHP Stanisłaŭ Bahdankievič, jaki ŭžo abiraŭsia ŭ hetaj akruzie ŭ Viarchoŭny Saviet 13-ha sklikańnia.
Vincuk Viačorka balatujecca ŭva Ŭschodniaj akruzie stalicy, Anatol Labiedźka — u Sucharaŭskaj. Namieśnik staršyni BNF Aleś Michalevič balatujecca ŭva Ŭručanskaj akruzie, staršynia Rady biełaruskaj intelihiencyi Ŭładzimier Kołas — u Staravilenskaj akruzie Miensku.
Usiaho ŭ vybarčyja kamisii padali dakumenty 635 inicyjatyŭnych hrup, ale nia ŭsie jany byli zarehistravanyja. Heta navinka ciapierašniaj vybarčaj kampanii: upieršyniu adsiejvańnie patencyjnych kandydataŭ pačałosia ŭžo na pieršym etapie kampanii, jašče pierad zboram podpisaŭ.
74 inicyjatyŭnyja hrupy atrymali admovy ad vybarčych kamisij. Najbolš paciarpieła na hetym etapie vybaraŭ Narodnaja Hramada — z 50 inicyjatyŭnych hrupaŭ aktyvistaŭ hetaj partyi zarehistravanyja byli tolki 35. PKB zarehistravała ŭsie svaje inicyjatyŭnyja hrupy. AHP i Partyja BNF stracili pa 3 inicyjatyŭnyja hrupy. Samyja balučyja straty — Śviatłana Karalova (AHP, Miensk) i Alaksiej Łapicki (BNF, Žodzina). Siarhiej Sałaš z Barysava, inicyjatyŭnaj hrupie jakoha admovili byli ŭ rehistracyi, paśpieŭ zarehistravać skarektavany śpis.
Navinki źjavilisia ŭ taktycy dziejańniaŭ apazycyjnych kandydataŭ. Niekatoryja kandydaty rehistrujuć inicyjatyŭnyja hrupy adrazu ŭ dźviuch akruhach — vybarčaje zakanadaŭstva heta dazvalaje. Hetak, inicyjatyŭnyja hrupy Mikoły Statkieviča zarehistravanyja ŭ Jasieninskaj i Kalinoŭskaj akruhach Miensku. Lider kamunistaŭ Siarhiej Kalakin balatujecca ŭ Homielskaj-Navabielickaj i Mienskaj-Kołasaŭskaj akruhach. Paśla rehistracyi kandydat, jaki balatujecca adrazu ŭ dźviuch akruhach, pavinien budzie źniać svaju kandydaturu ŭ adnoj ź ich.
Nia vyklučana, što źniatyja kandydaty buduć vyłučanyja paŭtorna partyjnymi źjezdami.
Pieravaha vyłučeńnia praz zbor podpisaŭ — dadatkovaja mahčymaść ahitacyi. Zarehistravanyja inicyjatyŭnyja hrupy ŭžo ciapier mohuć danosić da vybarcaŭ infarmacyju pra svajho kandydata. Źbiralniki podpisaŭ z dośviedam udziełu ŭ papiarednich vybarach kažuć, što kolkaść sabranych za kandydata podpisaŭ prykładna adpaviadaje kolkaści hałasoŭ za jaho na vybarach.
Da 20 žniŭnia admovy ŭ rehistracyi možna abskardzić u Centravybarkamie i sudach. Praŭda, pakul z 10 padadzienych skarhaŭ CVK zadavoliŭ tolki 2 — haradzienskich pradprymalnikaŭ Valera Levanieŭskaha (aryštavanaha za paklop na prezydenta) i Alaksandra Vasiljeva. Najbolš paciarpiełaja BSDP-NH padavać skarhi ŭ CVK nia budzie, bo ličyć heta biesperspektyŭnym.
Pavodle źviestak CVK, siarod zarehistravanych hrup 371 (66,8%) naležać biespartyjnym, 51 (9,1%) — AHP, 35 (6,3%) — BSDP (NH), 32 (5,7%) — PBNF, pa 21 (3,7%) majuć KPB i PKB, pa 1 — ŁDPB, zialonyja, Partyja narodnaj zhody, Respublikanskaja, Ahrarnaja i Patryjatyčnaja partyi.
Maksymalnaja kolkaść pretendentaŭ zarehistravanaja ŭ siami akruhach — Bieraściejskaj Centralnaj №2 (11 hrup), Homielskaj Savieckaj №36 (11), Lidzkaj haradzkoj №56 (10), Słuckaj №89 (10), Jasieninskaj Mienskaj №101 (11), Kołasaŭskaj Mienskaj №106 (10), Uručynskaj Mienskaj №109 (11).
Na presavaj kanferencyi ŭ sieradu na pytańnie, nakolki žostkaj budzie kankurentnaja baraćba, staršynia CVK Lidzija Jarmošyna adkazała: heta zaležyć ad taho, kolki niezakonnych hrošaj buduć vykarystoŭvać kandydaty. Pavodle słovaŭ Ł.Jarmošynaj, CVK zaplanavaŭ srodki na vybarčuju kampaniju z raźliku 10 kandydataŭ na akruhu: «Dumaju, bolš i nia budzie».
Za miažoj dla hramadzianaŭ Biełarusi budzie stvorana 40 vybarčych učastkaŭ. Usie jany buduć prypisanyja da Kupałaŭskaj vybarčaj akruhi Miensku (dzie mieścicca MZS), pa jakoj vyłučajecca kandydatam dziejny deputat Uładzimier Navasiad.
Aleś Piatkievič, Arkadź Šanski
