«Horšym za kamunizm moža być tolki antykamunizm», — pisaŭ niekali Miłavan Džyłas, juhasłaŭski kamunist-dysydent.
Što moža być horšym za hlabalnuju ekanomiku j transnacyjanalnyja karparacyi? Badaj što antyhlabalisty. Jak i ŭsialakaje «anty-», zmahańnie z hlabalizmam tolki ŭmacoŭvaje abjekt nianaviści. Adnym z takich ulubionych abjektaŭ dla antyhlabalistaŭ apošnim časam źjaŭlajucca Alimpijskija hulni. Heta naturalna ź ichnaha boku, bo sučasnyja Alimpijady źviazanyja z hihanckimi hrašyma, a ŭźviadzieńnie ŭsio novych ahromnistych budaŭničych abjektaŭ samym kiepskim čynam adbivajecca na pryrodzie. Pastajannyja dopinh-skandały, zaanhažavanaść sudździaŭ, ahromnisty karumpavany biurakratyčny aparat MAK, miljony abałvanienych reklamaj telehledačoŭ dapaŭniajuć karcinu sučasnaha apakalipsysu.
Chacia, kali padumać, užo Alimpijskija hulni staražytnaści byli adnoj ź pieršych prajaŭ hlabalizmu. Raz na čatyry hady (hety adrezak času, ułasna, i nazyvaŭsia Alimpijadaj) atlety z roznych haradoŭ-polisaŭ, u niekatorych ź jakich časam była demakratyja, a ŭ bolšaści praćvitała tyranija, źbiralisia na spabornictvy, jakija pryciahvali vialikija (na toj čas) masy narodu. Praŭda, na spartoŭcach nie było tady vopratki i ŭžo tamu jany nie mahli reklamavać firmu-vyrobcu inventaru. Ale ŭžo tady spartoŭcy karystalisia pasłuhami nastaŭnikaŭ (treneraŭ), masažystaŭ, lekaraŭ-kastapravaŭ, admysłoŭcaŭ u pryhatavańni roznaha rodu alejaŭ i h.d. A jašče ž treba było mieć dyski, kopji dy inšyja spartovyja prystasavańni. Narešcie — stadyjony… Usio heta, treba dumać, kaštavała niemałych hrošaj dy nanosiła škodu navakolnamu asiarodździu, i biez taho niebahatamu na Pelapaneskaj paŭvyśpie. A hrošy (heta stała viadoma krychu paźniej) nia pachnuć.
Z hledzišča chryścijanaŭ, dyj z usich inšych hledziščaŭ, Alimpijada — pahanskaja sprava.
Poŭnaściu hety artykuł možna pračytać u papiarovaj i pdf-versii "Našaj Nivy"
Vital Taras
