Niahledziačy na pieravod vykładańnia historyi na rasiejskuju movu, zdavać centralizavanaje testavańnie pa historyi na biełaruskaj movie pažadała 27 490 čałaviek z 37 717 abituryjentaŭ.
Stali viadomyja vyniki ŭdzielnikaŭ centralizavanaha tesciravańnia pa historyi Biełarusi i Suśvietnaj historyi najnoŭšaha času.
Maksimum, jaki zmahli nabrać abituryjenty na tesciravanni pa historyi Biełarusi, — heta 97 testavych bałaŭ. Z 34,5 tysiačy udzielnikaŭ centralizavanaha tesciravańnia takoj kolkaściu bałaŭ mohuć pachvalicca 2 čałavieki. Pa adnamu abituryjentu nabrali 95 i 96 testavych bałaŭ, i čatyry abituryjenty atrymali za svaje viedy 94 bały. Mienš za 15 bałaŭ nabrali 3,6 pracenta ad ahulnaj kolkasci ŭdzielnikaŭ tesciravańnia, jakija nie zmohuć dalej udzielničać u konkursnym adbory. Darečy, niahledziačy na tuju akaličnaść, što historyja Biełarusi ŭ mnohich škołach ciapier vykładajecca na ruskaj movie, i navat padručniki byli pierakładzienyja ź biełaruskaj na ruskuju movu, zdavać hety ispyt na biełaruskaj movie pažadała pieravažnaja bolšaść abituryjentaŭ (27 490 čałaviek z 37 717 maładych ludziej, jakija prajšli papiaredniuju rehistracyju).
Lepšy vynik na centralizavanym tesciravanni pa Suśvietnaj historyi naviejšaha času — 96 testavych bałaŭ. Ich nabrali 4 udzielniki centralizavanaha ekzamienu. Jašče čatyry abituryjenty nabrali 95 testavych bałaŭ. Ad 0 da 14 bałaŭ nabrali 0,6 pracenta ŭdzielnikaŭ tesciravańnia.
25, 27 i 28 červienia ŭ krainie prajšło centralizavanaje tesciravańnie pa bijałohii, zamiežnych movach i chimii. Bijałohiju zdavali ŭ paniadziełak 44 672 abituryjenty (na biełaruskaj movie pisali testy 2600 čałaviek). 7 čałaviek byli adchilenyja ad udziełu ŭ tesciravanni. Šaściora z ich prychapili z saboj u aŭdytoryju svaje mabilniki, a adzin abituryjent vyrašyŭ pryniesci na ekzamien kalkulatar. Praŭda, nie zusim zrazumieła, navošta jamu spatrebiŭsia kalkulatar na tesciravanni pa bijałohii...
Zamiežnyja movy pryjšli zdavać u sieradu 40 124 čałavieki, z ich 31 595 maładych ludziej zdavali anhlijskuju movu, 6436 — niamieckuju, 1754 — francuzskuju i 339 čałaviek — ispanskuju. Nie dajšli da finišu 3 abituryjenty.
Jak zapeŭniŭ žurnalista «Źviazdy» dyrektar Respublikanskaha instytuta kantrolu viedaŭ Mikałaj Fiaśkoŭ, jany nie zbirajucca admaŭlacca ad svajho abiacańnia — zborniki z materyjałami prajšoŭšaha centralizavanaha tesciravańnia pa ŭsich dyscyplinach i pravilnymi adkazami da ŭsich zadańniaŭ pavinny źjavicca ŭ svabodnym prodažy jašče da zaviaršeńnia terminaŭ padačy dakumientaŭ u VNU druhoha patoku. Tendar na ich vypusk vyjhrała vydaviectva «Aviersev».
