Pytańnie kvoty na biełaruskuju muzyku pryncypovaje.
Pavinny my ci nie pavinny abaraniać nacyjanalnuju kulturu zakanadaŭča? Čužaja jaječnia viečna ci nia viečna? 50% biełaruskaj muzyki ŭ realnaści aznačali nia bolš, čym prosta źjaŭleńnie ličanych pracentaŭ biełaruskich i adzinkavych biełaruskamoŭnych kampazycyj u dzionnym efiry. I 75% budzie značyć nia bolš jak adnosnaje pavieličeńnie hetych małych ličbaŭ. Heta jak z movaj: paśla ŭviadzieńnia dźviuchmoŭja nijakaha raŭnapraŭja movaŭ nie zastałosia. Panuje rasiejskaja, nośbity biełaruskaj nie navažvajucca razmaŭlać na joj nidzie pa-za kvateraj. Kali ž dziaržaŭnaju była adna biełaruskaja mova, kraina pavoli nabližałasia da realnaha raŭnapraŭja.
Praciŭniki kvotaŭ havorać ab parušeńni raŭnapraŭja, ale ŭ realnaści harantavać minimalnyja ŭmovy dla raźvićcia biełaruskaj muzyki mohuć tolki kvoty. Pryčym kvoty dla dzionnaha efiru, jakija b abumoŭlivali najaŭnaść 40% biełaruskamoŭnych piesień.
Uzrovień? Mnie zaŭždy zdavałasia, što prymityŭniejšaj za ciapierašniuju FMnuju papasu moža być tolki tvorčaść uzornaha ansamblu babuinaŭ-bałałaječnikaŭ. Zaŭvažu, što Skrypka va Ŭkrainie staŭ tym, kim jość ciapier, tolki praź niekalki hadoŭ paśla ŭkrainizacyi medyjaŭ. Kali my chočam jakasnaha kulturnaha praduktu, treba spačatku stvaryć popyt na jaho.
Niama jakasnych zapisaŭ, studyj? Heta pytańnie techniki, pra jakoje, urešcie, mohuć pakłapacicca sami stancyi. Takija investycyi akupiacca. Chto vinavaty, što laŭreaty «Basovišča» zapisvajucca nie na «Alfie», a na pravincyjnym radyjo «Biełastok»?
Toje, što rabiłasia ŭ FM-sfery, — nivodnaha biełaruskamoŭnaha radyjo, nivodnaje biełaruskaje pieśni i «telefanavańni pa-biełarusku nie padychodziać pad naš farmat» — inačaj jak kulturnym fašyzmam nie nazavieš. Fašyzmam, jaki elehantna dušyć kulturnuju alternatyvu.
Svaimi arhumentami suprać 75% radyjščyki viešajuć łokšynu na ŭłasnyja vušy. Siońnia najpraściej zarablać na čužoj papsie. Jak na pierakupnych aperacyjach najpraściej było stvarać pačatkovy kapitał. Ale ŭkładańni ŭ vytvorčuju sferu taksama vyhadnyja. I niepaźbiežnyja, kali chočaš mieć stabilny rynak. U perspektyvie raskrutka svajoj muzyki pryviadzie nia tolki da pamnažeńnia kulturnych zdabytkaŭ, ale i da hrašovych prybytkaŭ, jak va Ŭkrainie j Litvie, jakija analahičnyja zachady pazytyŭnaj dyskryminacyi ŭviali jašče 10 hadoŭ tamu.
Abarona kulturnaje admietnaści Biełarusi — heta taja halina, dzie dziaržava nia tolki maje prava, ale i abaviazana naviazvać kvoty.
Barys Tumar
