Paet Aleś Razanaŭ trapiŭ u reanimacyju — pałatu intensiŭnaj terapii, jak heta nazyvajuć na Zachadzie — bonskaj universyteckaj kliniki. Pieršapačatkovy dyjahnaz — infarkt — nie paćvierdziŭsia.
Radyjo «Svaboda» paviedamiła, što Razanaŭ pravioŭ niekalki dzion u komie. «Svaboda» pieradała taksama, što paet paśla vychadu z komy ŭ pieršy dzień skazaŭ niekalki słovaŭ pa-biełarusku i tolki na druhi dzień Razanaŭ zahavaryŭ jašče j pa-niamiecku, na movie, zrazumiełaj persanału klinki.
Poŭnaściu hety artykuł možna pračytać u papiarovaj i pdf-versii "Našaj Nivy"
Adam Voršyč
Aleś Razanaŭ naradziŭsia 5 śniežnia 1947 h. u vioscy Sialec Biarozaŭskaha rajonu. U 1969 h. na fiłfaku BDU vystupiŭ za biełaruskamoŭnaje navučańnie. Pad pahrozaj vyklučeńnia vymušany byŭ pieravieścisia z stalicy ŭ Bieraściejski pedinstytut, jaki skončyŭ u 1970 h.
Drukavać vieršy pačaŭ u 1961 h. Pierałomnym dla tvorčaści Razanava i biełaruskaj paezii naahuł staŭ zbornik «Šlach-360» (1981). Dla Razanava charakterny stylovy pošuk: jon uvioŭ takija formy verlibru, jak kvantemy, versety, punkciry. Za knihu «Vastryjo strały» (1988) atrymaŭ Premiju imia Janki Kupały. Pierakładaŭ ź litoŭskaj (Hiada, Saja, Avižus), anhielskaj (Šekśpir, Tahor), łatyskaj, hruzinskaj, baŭharskaj, serbskaj, charvackaj, českaj movaŭ.
U 1989 h. byŭ abrany vice-prezydentam Biełaruskaha PEN-centru. Pryniaŭ čynny ŭdzieł u adnoŭlenaj u siaredzinie 90-ch «Krynicy». Pry kancy 90-ch z łukašenkaŭskaj zaduchi vyjechaŭ u Niamieččynu. U Hanovery vydaŭ dźviuchmoŭnuju (biełaruska-niamieckuju knihu) «Hanoverskija punkciry». Atrymaŭ prestyžnuju eŭrapiejskuju premiju imia Hierdera. U Aŭstryi ŭ 2004-m vyjšła kniha «Vortdychte», napisanaja pa-niamiecku. Heta filazofska-paetyčnaje tłumačeńnie tych ci inšych niamieckich słovaŭ biełaruskim paetam. Raniej Razanaŭ praktykavaŭ takija «medytacyi» nad słovami roznych movaŭ, jakija aznačajuć adzin i toj samy paniatak, pa-biełarusku. Termin «vortdychte» źjaŭlajecca svajho rodu niamieckim nealahizmam, jaki stvaryŭ sam paet. U pierakładzie heta «ščylnaść słovaŭ».
