Treci biełaruski GSM-aperatar budzie nazyvacca «Best» i budzie na 100% dziaržaŭnym, pryčym suzasnavalnikam stanie navukova-vytvorčaje abjadnańnie «Ahat», jakoje naležyć da sfery VPK. Dola «Ahatu», u jakim adno z padraździaleńniaŭ uznačalvaje syn Łukašenki Viktar, składzie ŭ novaj kampanii bolš za 70%. Druhim zasnavalnikam «Bestu» budzie dziaržaŭny «Biełtelekam». Biznes-plan z terminami ŭvodu abstalavańnia, abjomam finansavańnia prajektu i pamieram abanenckaj bazy novaj kampanii źjavicca pry kancy listapada. Paśla vyznačeńnia kankretnaj sumy patrebnych investycyj buduć pryciahnuty kredyty pad harantyju ŭradu.
Biełaruski ŭrad addaŭ treciaha aperatara ŭ dziaržaŭnyja ruki, što, na dumku niekatorych ekanamistaŭ, pryviadzie da zachavańnia vysokich taryfaŭ na sotavuju suviaź. A jak vyhladaje sytuacyja z mabilnaj suviaźziu ŭ našych susiedziaŭ?
U Polščy, dzie, pavodle prahnozaŭ, da kanca hetaha hodu budzie 21 młn karystalnikaŭ mabilnych telefonaŭ (u Biełarusi — 2,5 młn), jość try asnoŭnyja aperatary GSM. U kampanijach «Era» dy «Plus GSM» kantrolnyja pakiety akcyj naležać zamiežnym kampanijam. Tolki ŭ kampanii «Centertel», jakoj naležyć «Idea», kantrolny pakiet akcyjaŭ maje «Telekomunikacja Polska» (66%), rešta ŭ rukach francuskaj «France Telecom» (34%). Viaducca razmovy pra čaćviortaha aperatara GSM, jakim užo zacikavilisia švedy, finy dy halandcy.
Padobna vyhladaje sytuacyja va Ŭkrainie. Hałoŭnymi investarami ŭkrainskich aperataraŭ mabilnaj suviazi byli zamiežnyja kampanii. Tolki pry zasnavańni kampanii «UMC» 51% akcyj naležaŭ «Ukrtelekamu», rešta zamiežnym investaram, ale ŭ 2003 h. kampanija pierajšła ŭ ruki rasiejskaj «MTS». Darečy, zaŭvažnaje mocnaje zacikaŭleńnie rasiejskich kampanij ukrainskimi aperatarami. Hałoŭnym akcyjaneram viadučaha ŭkrainskaha aperataru «Kyivstar» źjaŭlajecca kampanija «Telenor» (54%).
Aleś Trafimienka
