Jana maje vałasy śvietłyja, jak biełaruski lon, 16 hadoŭ i papku ŭ KDB, jak i ŭsie liceisty, ich baćki i nastaŭniki. Treba być mužnym, kab razmaŭlać pabiełarusku. Polskaja «Hazeta vyborča» nadrukavała vialiki repartaž pra Biełaruski licej. Prapanujem vam jaho ŭ skarocie.
Urok pieršy. Spadarynia Ludmiła ŭ darozie z punktu V. da B.
Najciažejšaje — skłaści padpolny raskład zaniatkaŭ.
Namieśnik dyrektara Lavon Barščeŭski hładzić siabie pa łysinie. Spadarynia Ludmiła, jakaja vykładaje bijalohiju, musić paśpieć z kvatery na vulicy V., dzie ŭ jaje zaniatki z druhim kursam, da adnapakajovaj kvatery na vulicy B., dzie jaje čakaje čaćviorty kurs. A heta šeść stancyj metro ź pierasadkaj, paŭ-Miensku.
Dzieści ŭ metro jana raźminiecca sa spadaryniaj Dzinaj, nastaŭnicaj chimii, jakaja viazie ŭ damskaj sumačcy słoik salanaj kisłaty, kab pakazać druhomu kursu, jak afarboŭvajecca lakmusavaja papierka. Pra bolš składanyja chimič¬nyja reakcyi va ŭmovach kanśpiracyi ciažka maryć.
Mastactva, jak zvyčajna, na vu¬li¬cy Z. Hramadzkija navuki — u adnapakajoŭcy, dzie žyvuć apazycyjnyja studenty. Fizyčnaje vychavańnie — u parku Horkaha, kali paciapleje. I treba znoŭ kudyści pierakinuć kamputarnuju klasu, kab nia trapiła ŭ ruki milicyi.
Paŭtara hodu tamu ŭ Biełarusi byŭ likvidavany adziny ŭ krainie biełaruskamoŭny licej.
U Humanitarnym licei imia Jakuba Kołasa ŭsio było pa-biełarusku, navat fizyčnaje vychavańnie. Licej dziejničaŭ 13 hadoŭ. Paśla jaho likvi¬dacyi vučniaŭ sprabavali raskidać pa inšych škołach. Bolšaść admoviłasia i praciahvaje chadzić u nielehalny padpolny licej.
Urok lohiki. Ci možna aryštavać litaru «i»
Na minułyja vakacyi nichto nikudy nie pajechaŭ, dzieci pilnavali Licej na vuł.Kirava. Baćki pilnavali, kab ich dziaciej nie pakryŭdzili.
Pryjšło 300 baćkoŭ, śmiajalisia: maŭlaŭ, stajać, jak 300 spartancaŭ. Jany sabrali 10 tysiač podpisaŭ, ale nichto z čynoŭnikaŭ nie zachacieŭ ich uziać. Dzieci śpiavali licejskija pieśni, pisali na chodnikach, što lubiać licej. Milicyja nie dała rady, prysłali AMON.
Milicyjanty i navat tyja strašnyja amapaŭcy nie razumieli:
— Dy što vam treba?
— A na jakoj movie vučać u Francyi? — pytalisia baćki.
— Pa-francusku, jasna.
— Nu a my ŭ Biełarusi chočam pa-biełarusku. Zrabili z nas nacyjanalnuju mienšaść, zahnali ŭ rezervacyju, ale my nikoli nia staniem rasiejcami.
Milicyjanty z adnaho adździaleńnia prasili, kab dzieci-pikietoŭcy pierajšli na inšy bok vulicy — tam užo terytoryja inšaha pastarunku. Bo što im było rabić ź dziciem, jakoje chodzić pa Miensku ź vialikaj litaraj «i» na sakołcy? Abo z nadpisam pa-biełarusku «Ja lublu Licej»? Aryštoŭvać?
Urok hieahrafii. Kraty na voknach
Šmatpaviarchovik na vulicy V. Ja kažu ŭ damafon «svaje». Dziažurny razhladaje mianie praz vočka. Skryhočuć zamki.
Ranicaj liceisty źbirajucca pierad padjezdam i razam uvacho¬dziać u «stalinski» dom. Na pierapynki jany nie vychodziać. Jak maha mienš tupatu, hrukatu stalovymi dźviaryma, bo babki z treciaha pavierchu danosiać u milicyju.
Try pakojčyki: u pieršym hieahrafija, u druhim matematyka, u trecim bijalohija. U nievialičkaj kuchni (adnačasova nastaŭnickaja, kabinet dyrektara, stałoŭka, biblijateka i spalnia nastaŭnika matematyki, jaki pryjaždžaje z Mahilova) maładaja hiermanistka pravodzić indyvidualnyja zaniatki pa niamieckaj movie.
Poŭny varyjant čytajcie ŭ papiarovaj i pdf-versii hazety "Naša Niva"
