Mirny ŭ tuzinie najlepšych
U čempijonskaj honcy 2005 hodu biełaruski tenisist Maksim Mirny padniaŭsia ažno na 10 prystupak i ciapier zajmaje 12-je miesca, majučy 74 punkty. Tak vysoka biełarus jašče nie padymaŭsia, a najlepšym jahonym dasiahnieńniem było 17-je miesca paŭtara hodu tamu. Uźlot adbyŭsia dziakujučy vychadu ŭ finał turniru ŭ amerykanskim Memfisie. Praŭda, u finale Mirny sastupiŭ pradstaŭniku Danii Kienetu Karłsanu — 5:7, 5:7.
U rejtynhu Asacyjacyi tenisistaŭ-prafesijanałaŭ, što vyličvajecca pa vynikach apošnich 52 tydniaŭ, Mirny zajmaje 36-je miesca. Uładzimier Vaŭčkoŭ — 175-je.
Rumyny, budučyja supierniki biełarusaŭ pa 1/8 finału Kubku Devisa, što projdzie 4—6 sakavika ŭ Brašavie, pa vynikach 52-ch tydniaŭ majuć nastupnyja vyniki: Andrej Pavał — 24-ty, Viktar Chanesku — 82-hi, Razvan Sabaŭ — 160-ty, Viktar Ijanita — 230-ty.
U indyvidualnym rejtynhu parnych tenisistaŭ Maks zajmaje dziasiaty radok.
Jedziem u Rejkjavik
Supiernikam mužčynskaj handbolnaj zbornaj Biełarusi ŭ nakaŭt-raŭndzie kvalifikacyi da čempijanatu Eŭropy budzie zbornaja Iślandyi. Tak rasparadziłasia losavańnie 22 lutaha. Abodva matčy projduć u červieni. Nahadajem, što ŭ svajoj padhrupie hadavancy Spartaka Miranoviča zaniali druhoje miesca, apiaredziŭšy Italiju i Kipr i prapuściŭšy napierad Vuhorščynu.
Sumku trymaj pry sabie
Mižnarodnaja federacyja łyžnaha sportu dyskvalifikavała na dva hady biełarusa Dzianisa Varabjova, u sumcy jakoha byli znojdzieny zabaronienyja preparaty. Choć vypadak zdaryŭsia jašče pry kancy minułaha hodu na etapie Kubku śvietu ŭ italjanskim Val-dy-Fjeme, adlik dyskvalifikacyi pajšoŭ z 19 lutaha. Dzianis pryjšoŭ na dopinh-kantrol, a sumku z zabaronienym rečyvam (harmonam rostu) pakinuŭ za dźviarami pakoju. Tut jaho i złavili. U biełaruskaj federacyi łyžaŭ kažuć, što Varabjova banalna padstavili, tym bolš pamyłkova: chacieli padkłaści dopinh lideru zbornaj Siarhieju Dalidoviču.
Prakapovič budzie viesłavać
Delehaty spravazdačna-vybarnaj kanferencyi Biełaruskaj federacyi viesłavańnia na svaim pasiadžeńni adnahałosna abrali novaha staršyniu — im staŭ staršynia praŭleńnia Nacbanku Piatro Prakapovič. Prakapovič budzie adkazvać za raźvićcio hetaha medalnaha dla nas vidu sportu. Hałoŭny bankir krainy hałoŭnaj svajoj zadačaj ličyć zrabić akademičnaje viesłavańnie masavym vidam sportu. Ciapier zastajecca nakapać u krainie kanałaŭ.
Šaŭčenku nie šancuje
Nie paśpieŭ forvard «Milanu» i futbolnaj zbornaj Ukrainy Andrej Šaŭčenka ačuniać paśla traŭmy, atrymanaj pry kancy studzienia ŭ matčy italjanskaha čempijanatu, jak u minułuju subotu jamu «pašancavała» na čarhovuju. Hetym razam u matčy suprać «Kaljary». Užo na 10-j chvilinie padčas ataki na bramu supiernikaŭ Andreju raśsiekli skułu. Ukrainskaha napadnika adrazu dastavili ŭ znakamituju milanskuju bolnicu «Niguarda». Admysłoŭcy zaznačajuć, što papraŭka zojmie ad 15 dzion da miesiaca. Tamu Šaŭčenka nia tolki prapuścić pryncypovaje niadzielnaje derbi z «Interam», ale i pad vialikim pytańniem jahony ŭdzieł u matčy ŭ adkaz 1/8 finału Lihi čempijonaŭ suprać «Mančester Junajted».
Aleh Rajaviec
