Ja vyrašyŭ uziać udzieł u dyskusii pa vyłučeńni kandydata na pasadu prezydenta Respubliki Biełarusi. Hety čałaviek abaviazany być ad narodu, i jon pavinien być hatoŭ iści da kanca, jakija b pieraškody ni byli. Na jaho budzie palavać usia kraina až da fizyčnaha źniščeńnia ci atručeńnia, jak na Viktara Juščanku — ukrainskaha prezydenta. Buduć praśledavać jaho rodnych i blizkich. Ale hetamu čałavieku, kali jon pieramoža, potym budzie pastaŭleny załaty pomnik ad imieni ŭsiaho biełaruskaha narodu. Ja ŭpeŭnieny, što takim čałaviekam u ciapierašni čas źjaŭlajecca, biez usiakaha sumnieńnia, Alaksandar Milinkievič. Nia maju ničoha suprać Uładzimiera Parfianoviča, Valerja Frałova, Iryny Krasoŭskaj, ale ich čas nie nadyšoŭ.
Abhruntuju, čamu ja addaju svaje sympatyi mienavita Milinkieviču. Samaje hałoŭnaje, što siamja vielmi vysakarodnaja, a taksama jaho baćki. Usialak jaho padtrymlivajuć, staviacca z razumieńniem — heta vielmi važna. Hety čałaviek nia budzie stvarać kamandu z bandytaŭ, jakich rehularna buduć sudzić. U hetaha čałavieka kamanda budzie z prafesijanałaŭ, tak, jak i sam jon źjaŭlajecca prafesijanałam.
Alaksandar Milinkievič — kandydat fizyka-matematyčnych navuk, byŭ namieśnikam staršyni Haradzienskaha harvykankamu, vałodaje piaćciu movami. Čamu ja suprać Kazulina? Dastatkova było jamu skazać, što my, bratki-biełarusy, pavinny zrabicca eŭrapiejskimi rasiejcami. Nie, vielmi šanoŭnaja Volha Ipatava, heta nie ahavorka, heta jaho pazycyja.
Anastas Siemianovič, Baraŭlany
