Pravasudździe pa-švedku
Švedzkaja palicyja musić vypłačvać usio bolšyja hrošy hramadzianam za niezakonnaje zatrymańnie. Letaś 450 čałaviek atrymali kampensacyju za niezakonyja dziejańni palicyi — ahułam 2,3 młn kron (kala 250 tys. eŭra). Zakanadaŭstvam zabaroniena dabaŭlać dadatkovy termin źniavoleńnia za ŭcioki z turmy, bo ŭtrymańnie viaźniaŭ — pieršy abaviazak dziaržaŭnaj achovy, a nie samich pakaranych. Apošnim časam abmiarkoŭvajecca pytańnie stvareńnia pryvatnych turmaŭ, jakija buduć, na ŭzor Brytanii, karystacca hrašyma ź dziaržaŭnaha biudžetu. Usio heta robicca ŭ adpaviednaści z Kanstytucyjaj, dzie pravy čałavieka razhladajucca vyšej za pravy dziaržavy, jakaja vystupaje nie jak abstrakcyja, a jak isnujučy dziaržaŭny aparat. Tym časam na minułym tydni prahrama švedzkaha telebačańnia «Chałodnyja fakty» padrychtavała hadzinny repartaž pra śmiarotnaje pakarańnie ŭ Biełarusi i ŭščamleńnie pravoŭ źniavolenych.
AK, Stakholm
Pad znakam «Pahoni»
25 sakavika ŭ pamiaškańni Senatu Čechii adbyŭsia kruhły stoł «Ad tatalitaryzmu j tyranii da sapraŭdnaj Niezaležnaści». Inicyjatarami praviadzieńnia byli Źviaz biełarusaŭ zamiežža, hrupa senataraŭ na čale ź vice-staršyniom vierchniaj pałaty Edvardam Oŭtratam i pradstaŭniki «Mižnarodnaj amnistyi». Udzielniki dyskusii abmiarkoŭvali, jak Eŭropa (Čechija ŭ pryvatnaści) i biełaruskaja dyjaspara ŭ Eŭropie mohuć dapamahčy biełaruskaj spravie, demakratyzacyi Biełarusi. Senatary Jaramir Ščecina i Marcin Mejstršyk vykazali spadzieŭ, što chvala revalucyjnych padziej, jakaja prakaciłasia pa Hruzii i Ŭkrainie, chutka pryjdzie i ŭ Biełaruś.
Prysutny
Dzień Voli ŭ Maskvie
Kala dvuch dziasiatkaŭ čałaviek praviali pikiet la biełaruskaha pasolstva ŭ rasiejskaj stalicy, kab pavinšavać jaho supracoŭnikaŭ z Dniom Voli. Ułady nie dazvolili ni śpiavać, ni słuchać muzyku, ale heta nie sapsavała nastroju pikietčykaŭ. Pikietoŭščyki trymali plakat «Z Dniom Voli!», bieł-čyrvona-biełyja ściahi j baloniki. Dla supracoŭnikaŭ pasolstva byŭ padrychtavany vinšavalny list na biełaruskaj i rasiejskaj movach, dzie havaryłasia: «Hety dzień — naša śviata jak ludziej, čyje prodki pachavanyja ŭ Biełarusi. Heta i vaša śviata jak ludziej, jakija słužać biełaruskaj dziaržavie». Persanał pasolstva pryniać listy admoviŭsia.
Baŭtramiej Horbač, Maskva
