«Narodnaja vola» ŭ numary za 27 krasavika ŭ raździele «Palitkuchnia» nadrukavała ahresiŭnuju zaciemku vybarščyka ź Miensku S.Tarasava. «Narodnaj voli» adkazvaje namieśnik staršyni Partyi BNF Jury Chadyka.
Da apošniaha času karalevaj Vialikabrytanii mahła stać tolki žančyna, jakaja zachavała cnatlivaść da šlubu. Pryncesu Dyjanu ŭ 1981 h. ahladaŭ hinekolah, i tolki paśla taho, jak jon paćvierdziŭ jaje dziavockaść, adbyŭsia šlub z naślednym pryncam. Daścipniki žartavali tady, što łedzi Dyjana Spenser była apošniaj cnatliŭkaj u kołach anhielskaj arystakratyi. Byccam paćviardžajučy hetuju dumku, prync Čarłz praz 20 hod ažaniŭsia z raźviadzionkaju z bahatym seksualnym dośviedam.
Hetaja historyja nahadvaje sytuacyju ŭ kołach biełaruskaj demakratyi. Jak tolki nabližajucca prezydenckija vybary, u asiarodku apazycyi źjaŭlajucca ludzi, jakija jašče ŭčora słužyli antydemakratyčnamu režymu, a siońnia śmieła hatovyja ŭznačalić abjadnanuju demakratyčnuju apazycyju.
Ja padkreślivaju — demakratyčnuju, bo apazycyja moža być pravaj, levaj, kanstruktyŭnaj i lajalnaj, narešcie, šyrokaj, — ale chto siońnia pamiataje dyjaloh Alaksandra Ryhoraviča z šyrokaj apazycyjaj u 2000 h.? Ja nazyvaju takich ludziej demakratyčnymi niavińnikami. Nie sumniavajusia ŭ vialikich arhanizacyjnych zdolnaściach Alaksandra Vajtoviča i Alaksandra Kazulina. Mnie zrazumiełyja ich matyvy. Bo paśla abraźlivych vykazvańniaŭ na ich adras PPRB jany nia mohuć lubić jaho. Adnak śviedčańniaŭ ich addanaści ideałam demakratyi i niezaležnaści Biełarusi niedastatkova. Kuplać ža «kata ŭ miašku» niedalnabačna.
Ja b źviarnuŭsia da ŭsich niavińnikaŭ demakratyi (bo dumaju, što ich śpis nia budzie abmiežavany zhadanymi proźviščami) z zaklikam. Kali vy lubicie nia tolki siabie, ale i volnuju demakratyčnuju Biełaruś, jakuju nam jašče tolki treba pabudavać, adkińcie ambicyi i dałučajciesia da pracesu abjadnańnia demakratyčnych siłaŭ, jaki pačała Narodnaja kaalicyja «Piaciorka+». Pryjdzicie i skažycie: «Spadary Labiedźka, Kalakin, Šuškievič, Viačorka i Buchvostaŭ! Ja chaču pakłaści kaniec dyktatury ŭ majoj krainie. Dziela hetaha ja dałučajusia da pracesu vyłučeńnia adzinaha kandydata i abiacaju, što pry lubym vybary prykładu ŭsie namahańni dla pieramohi demakratyi».
Užo adbylisia mienskija i abłasnyja kanferencyi — usiudy, akramia Viciebsku. Na hetych schodach demakratyčnaha aktyvu prysutničali i Vajtovič, i Kołas, i Frałoŭ, nie było tolki Kazulina. Ale nichto ź ich nie navažyŭsia padpisać zajavu-abiacańnie ŭ vypadku svajoj pieramohi abaraniać pryncypy demakratyi i niezaležnaść Biełarusi. Biaz hetaha ludzi, jakija na spravie ryzykujuć i na spravie buduć ahitavać za adzinaha kandydata, nie pahadzilisia ŭklučać ich proźviščy ŭ biuleteń dla hałasavańnia. Tady niezdavolenyja pretendenty pačali publična skardzicca na niedaskanałaść pracedury i pravakavać krytyčnyja artykuły ŭ niezaležnaj presie.
Tak, «NV» u numary za 27 krasavika ŭ raździele «Palitkuchnia» nadrukavała ahresiŭnuju zaciemku vybarščyka ź Miensku S.Tarasava. Sp.Tarasaŭ zadaje pytańni, na jakija nieabchodna adkazać. Jon piša: «Chto i kali vyznačyŭ koła demakratyčnych sił?»
Słušnaje pytańnie. Hetaje koła achapiła palityčnyja partyi i hramadzkija abjadnańni, što brali ŭdzieł u vybarčych kampanijach apazycyjnych kandydataŭ na apošnich parlamenckich vybarach. Bolš šyrokaha koła nielha prydumać. Asoby, jakija nia brali takoha ŭdziełu, mohuć dałučycca da luboj partyi ci abjadnańnia i ŭziać udzieł u vyłučeńni adzinaha kandydata.
Druhoje pytańnie: «Kali čałaviek prytrymlivajecca demakratyčnych pryncypaŭ, ale nie ŭvachodzić u partyju ci niejkaje hramadzkaje abjadnańnie, ci moža jon uziać udzieł u vyznačeńni taho ž adzinaha kandydata?» Zrazumieła, moža. Kali jon pretenduje być hetym adzinym, to pavinien padpisać zhadanuju zajavu-abiacańnie i sabrać bolš za 50% hałasoŭ luboj rehijanalnaj kanferencyi, kab trapić u jakaści pretendenta na Nacyjanalny kanhres demsił. Heta vielmi važnaja ŭmova. Kali čałaviek spadziajecca atrymać padtrymku, jon napačatku musić damahčysia zhody i padtrymki demakratyčnaha aktyvu. Tady hety aktyŭ dapamoža jamu pieramahčy va ŭsioj krainie. My nia majem inšych resursaŭ dla pieramohi. Toj, chto spadziajecca tolki na hrošy albo tolki na namenklaturu, moža być apanentam A.Łukašenki. Ale nia moža być lideram biełaruskaj demakratyi.
Rehlament vyłučeńnia pretendentaŭ byŭ raspracavany specyjalnaj hrupaj, u skład jakoj uvachodzili jurysty z roznych partyj i arhanizacyj. Rehlament usioj hramadzkaści krainy nie paviedamleny, ale jon usim dastupny, sp.S.Tarasaŭ, i mnohija niezaležnyja hazety jaho padrabiazna apisvali. Moža heta zrabić i «Narodnaja vola». Heta ŭsie pytańni, jakija byli pastaŭleny.
Dumajučy pra pavodziny i kryŭdy našych niavińnikaŭ demakratyi, časta pryhadvaju sytuacyju 2001 h. Tady piać prystojnych čałaviek pryvatyzavali prava nazvać adzinaha kandydata ad demsił. I zaciahnuli hetuju spravu da taho času, kali ahitacyjnuju kampaniju ŭžo nie było mahčymaści razharnuć. Za dva z pałovaju miesiacy da 9 vieraśnia 2001 h. ja parazmaŭlaŭ z tryma najbolš mocnymi pretendentami — M.Čyhirom, U.Hančarykam i S.Domašam. Kožnamu ź ich ja skazaŭ: «Pavažany druža! Vybierycie luboha z čatyroch astatnich i skažycie jamu, što zhodny być u jaho kabinecie premjer-ministram. Kali Vy tak zrobicie, «piaciorka» raspadziecca, usie demakratyčnyja siły abjadnajucca i pieramoha na vybarach zrobicca realnaju. A Vy budziecie premjer-ministram u demakratyčnaj krainie». Adnak nivodzin z troch nia bačyŭ nikoha dastojnaha być prezydentam akramia siabie. Paraza apazycyi z takimi liderami była pradvyznačanaja.
Hetym razam, spadziajusia, my nie nastupim na tyja samyja hrabli. Stroha vytrymajem akreśleny plan i abjadnajem vakoł abranaha kandydata našy mahčymaści. Nichto nia moža zabaranić U.Kołasu, A.Vajtoviču, A.Kazulinu vyłučacca inšym šlacham. Ale pretendavać na zvańnie adzinaha kandydata ad demakratyčnaj apazycyi jany nia mohuć — kali nie pasprabujuć dałučycca da apisanaj pracedury na kanferencyi ŭ Viciebsku. Paśla hetaha budzie pozna. Tolki abjadnanaja apazycyja, chto b ni pieramoh na Kanhresie demsił, zdolnaja sabrać miljon podpisaŭ za vyłučeńnie hetaha čałavieka kandydatam na vybarach i zakłaści tryvały padmurak pieramohi.
