ŠKOŁA ŽYĆCIA
Škoła žyćcia
Ź liścia, travy, tryścia,
Ź lustraŭ, z karcin na ścianie
Strašnyja vočy žyćcia
Ŭparta hladziać na mianie.
Ja im skazała: nie!
Ja ich pasłała na…
Strašna hladziać na mianie,
Ćviordyja, byccam ściana.
Ja čakaju krychu
Dyj całuju ich u…
Heta byŭ dobry ŭrok.
Tak ja spaznała Zrok.
Ad zroku da zmroku
Adzin krok.
▶
Kali my robim jaminy
Kali my robim jaminy,
Padvały dla chacin,
Kali my śvidravinami
Udolle rašacim,
Kali sadžajem drevy my,
Kali arom pali,
Hladziać na nas pamierłyja
Praź dzirački ŭ ziamli.
▶
Zban u ahni
Ja zban u ahni.
I heta nazaŭsiody.
Mnie nazaŭsiody ŭbili
ŭ kroŭ i ŭ kość
Bahaćcie duchu,
Charastvo pryrody,
Suśvietu pryhažość.
Niama majoj viny,
Što mnie jany
Patrapili ŭ piačonki
I tam siadziać,
I ich nia vybić vonki.
Mahčyma, ŭčora ja b jašče mahła,
Dy ŭčora ja praspała,
Siońnia ž — pozna.
Z palenaŭ vyparajecca smała,
Z papierak — proza,
Ŭva mnie ž pavoli kamianieje vierš
Pra radaść žyć
I charastvo pryrody.
Mianie nia źmieniš bolš
— chiba pabješ.
I heta nazaŭsiody.
▶
Ch-taničny vierš
Niańka zasnuła la hrubki.
My — tyja, chto prychodzić unačy.
U dzietak režucca zubki.
Im treba dapamahčy.
U dzietak režucca rohi,
Kapyty i inšaja dreń,
I praź dźviery ŭ travu la darohi
Prarastaje daŭžezny kareń
-čyk!
Babuli koŭdrami nakryli
Svaich Sieržukoŭ i Kać.
A ŭ dzietak režucca kryły.
My ich navučym latać.
A matki šepčuć zamovy,
Kab nas adahnać dalej,
U zmrok ildziany zimovy,
Ad svaich niaznanych dziaciej.
∎