Čaćvierty hoł Kutuzava
U 35-m tury italjanskaj seryi «A» forvard «Sampdoryi» i nacyjanalnaj futbolnaj zbornaj Vital Kutuzaŭ spryčyniŭsia da razhromu «Leče» (3:0). Biełaruski lehijaner pravioŭ druhi miač u hulni, i ciapier na rachunku Kutuzava čatyry miačy ŭ hetym sezonie. Za try tury da finišu «Sampdoryja» dzielić čaćviertaje-piataje miesca z «Udyneze». Kamandy adstajuć ad «Interu», što idzie trecim, na šeść punktaŭ.
Pośpiech Chenłana
Nacyjanalnaj zbornaj Biełarusi nie ŭdałosia prabicca ŭ čverćfinał čempijanatu śvietu pa chakiei. U vyrašalnym matčy ŭ paniadziełak biełarusy sastupili zbornaj Švajcaryi ź likam 0:2. Niahledziačy na heta, vystup u Aŭstryi padapiečnych Hłena Chenłana možna pryznać paśpiachovym. Jany nia tolki zachavali miesca ŭ elicie, ale i trapili ŭ dziasiatku macniejšych. Darečy, taksama možna ličyć udałym i vystup usich postsavieckich kamandaŭ. Z 12 zbornych, što pradoŭžyli baraćbu za medali, piać naležać da byłoha SSSR: Ukraina, Rasieja, Łatvija, Kazachstan, Biełaruś.
Čverćfinały — u čaćvier, paŭfinały — u subotu, finał — u niadzielu.
Čužoje śviata
Niaŭdała vystupiła zbornaja Biełarusi na junackim čempijanacie Eŭropy pa futbole (uzrost hulcoŭ da 17 hod) u Italii. Vychavancy Piatra Michiejeva dźvie sustrečy prajhrali z bujnym likam — anhielcam (0:4) i turkam (1:5), adnu vyjhrali — u zbornaj Italii (1:0). U paŭfinał z našaj hrupy trapili zbornyja Italii i Turcyi.
Litoŭski finał
Samym kaštoŭnym hulcom maskoŭskaha baskietbolnaha «Finału čatyroch» Eŭralihi ULEB staŭ abaronca tel-aviŭskaha «Makabi» litoviec Šarunas Jasikiavičus. U paŭfinale izrailski klub pieramoh hrecki «Panacinaikas» (91:82), a ŭ finale — bascki «Taŭ» (90:78). Jasikiavičus nabraŭ u finale 22 punkty. Samaha kaštoŭnaha hulca vyznačali hałasavańniem žurnalistaŭ padčas finału. Adznačym taksama, što adnym z najlepšych u składzie «Taŭhresa» byŭ inšy litoŭski lehijaner — Arvidas Macijaŭskas, jaki zrabiŭ najbolšy ŭniosak u pieramohu ŭ paŭfinale nad maskoŭskim CSKA.
AR
