KRASNALUDKI
VIASNOVAJA KAZKA
Heta kazki a ci čutki —
Ŭ Miensku chodziać krasnaludki*?
Hetkim słovam, mnie zdajecca,
Pracalubnych čałaviečkaŭ,
Zachavalnikaŭ bahaćcia —
Hnomaŭ nazyvaŭ moj baćka,
Achviarujučy chvilinku,
Kab prysnuć svaju dziaŭčynku…
A jak lasnuła navuka,
Krasnaludkam zvaŭ unuka.
I nia kazki, i nia čutki:
Miensk trymajuć krasnaludki.
Naziraju, što ni zołak,
U aranžavych kamzołach,
U štanach z ahniu i ŭ paski
(Jak sa staradaŭniaj kazki!)
Ich viasiołyja čarody.
U rukach — miaciołki j viodry:
Horad vymyć paśla nočy,
Tvar jahony — łob i vočy.
Dniom u nietry nie źnikajuć —
Nam spryjać za metu majuć:
Prybirać liścio z darohi,
Kab chutčej lacieli nohi,
Ładzić klumby siarod brudu
Samaćvietami — usiudy…
Mała ich, jaki adsotak,
Dy sakralnaja rabota.
Bo vartuje ich kamanda
Biełaruski naš paradak!
…Projduć chaj dziesiacihodździ.
I adnojčy ŭ nanachodzie
«Baba, heta — krasnaludki?»
Chaj spytaje ŭnuk u Ludki.
▶
VIEČAR U SKVERYKU LA PŁOŠČY PIERAMOHI
La łaŭki ulubionaj — kaštan.
Nadzieŭ zialony kaptan
I važna trymaje śviečy
U kazačny hety viečar.
Ty pryjdzieš siudy — u hości.
Zaplečnik, rusiavy chvościk
I nahavicy ŭ paski...
Taksama ź jakojści kazki!
Abnimieš mianie: «Prabač!..»
Zahornieš u chrumstki płašč.
Blisnuć akonnyja šyby
Ŭ soncy — zołacie niby!
My pojdziem z taboj u zamak —
Dalej ad baćkoŭ i mamak.
Tam hrajuć muzyku snoŭ —
Pra viečnaje, pra luboŭ...
▶
ZIALONY KLON
Ujaŭny, pad maim aknom,
Badaj, da skonu dzion,
Staić, achutany płaščom,
Zialony maładzion.
Jaho lublu ja — pahatoŭ,
Jak dzieda z hłybini
Dalokich, ścišanych viakoŭ.
Śpiavaju dzień pry dni:
«Zialony klon — zialony voŭk!
Vaŭčynyja tvaje
Haliny — rvuć pavietra šoŭk!
I ranak nastaje...
Tvaje napiatyja listy,
Nasieńnia kipciury
Pramień abliža załaty
Ź niabiesnaje nary...»
■
*Krasnaludki — hnomy. Z vyhladu — maleńkija staryja ludzi ŭ jarkaj vopratcy; jany žyvuć u padziemnych nietrach, poŭnych kaštoŭnych metałaŭ i kamianioŭ. Darečy, nazvu «hnomy», što značyć «tyja, chto viedajuć», dla hetych falklornych persanažaŭ prydumaŭ u epochu Adradžeńnia niamiecki vučony Paracels.