Прэм'ер-міністр Украіны Арсеній Яцанюк заклікае Захад ўвесці супраць Расіі дадатковыя жорсткія санкцыі, каб спыніць агрэсію Крамля.
Пра гэта ён сказаў у інтэрв'ю нямецкай газеце Frankfurter Allgemeine.
Па словах Яцанюка, толькі вельмі жорсткія санкцыі змогуць супрацьстаяць таму, што Расія робіць ва Украіне, і прымусіць Маскву пайсці на перамовы. Пры гэтым ён адзначыў, што прамая сустрэча Уладзіміра Пуціна і новага прэзідэнта Украіны Пятра Парашэнкі немагчымая.
«У нас не засталося даверу да расійскага ўрада. Масква заўсёды будзе махляваць. Цяпер мы можам весці перамовы з Расіяй толькі ў жэнеўскім фармаце з удзелам чатырох бакоў: Украіны, ЕС, ЗША і Расіі», — сказаў Яцанюк.
Ён таксама дадаў, што Украіна ніколі не змірыцца з анексіяй Крыма. Па словах Яцанюка, Кіеў ужо звярнуўся ў міжнародныя суды.
