Зміцер і Вольга, фота з сацсетак.
Здарэнне адбылося 27 мая. Каля 16.00 Дзмітрый Пенда атрымаў удар токам, ад якога адразу загінуў.
Дзмітрый 27 мая працаваў з брыгадай у будынку хлебазавода Дзятлаўскай філіі Гродзенскага аблспажыўтаварыства: шпаклявалі і тынкавалі сцены. У кацельні ён узяўся шпатэлем нешта паправіць на сцяне пад столлю. А там тырчалі правады. Яны аказаліся не ізаляваныя і пад напружаннем.
Калі мужчыну ўдарыла токам, то прыцягнула да сцяны і не адпускала. Адзін з работнікаў кінуўся Дзмітрыя адцягнуць, але сам не здолеў гэта зрабіць — толькі з дапамогай напарніка. Медыкі рэанімаваць яго не змаглі.
Удава Вольга кажа, што яшчэ няма заключэння судова-медыцынскай экспертызы. Але ў пасведчанні аб смерці пазначана, што муж памёр у сувязі з пашкоджаннем электрычным токам.
«Проста так ад дотыку да правадоў ніхто не гіне», — кажа ўдава. Яна баіцца, што могуць проста схаваць факт, што муж загінуў на вытворчасці.
«Абвінаваціць Дзмітрыя і павесіць на яго ягоную ж смерць я не дазволю», — адзначае Вольга. Яна мае намер дабівацца завядзення крымінальнай справы. «Але баюся, што справу спішуць на няшчасны выпадак. Там працуюць іншыя людзі і яны будуць у небяспецы. Я не хачу, каб падобны выпадак паўтарыўся».
Адміністрацыя хлебазавода, дзе Зміцер загінуў, так і не прынесла сям’і спачуванняў.
Дзмітрыю было 32 гады. У яго застаўся сын Захар, якому толькі 2 гады і 5 месяцаў.
«Разбіраецца Следчы камітэт. Але пытанне пакуль адкрытае, хто там вінаваты. Ён — майстар, а палез рабіць тынкоўку. Гэта ж разбор ідзе. Не ведаю, што вам тлумачыць», — сказала намесніца дырэктара Дзятлаўскага райСТА Валянціна Баравік.
Між іншым, вясной Дзятлаўскі хлебазавод ужо трапляў у хронікі здарэнняў. 31 сакавіка там часткова абвалілася столь. Тады ніхто не пацярпеў, але давялося спыніць працу цэха. Баравік сказала, што цяпер брыгада не ў тым цэху займалася рамонтам.
«Дзятлаўскім раённым аддзелам Следчага камітэта праводзіцца даследчая праверка па факце смерці жыхара Дзятлаўскага раёна 1982 года нараджэння. Праводзяцца неабходныя следчыя дзеянні, прызначана судова-медыцынская экспертыза. Устанаўліваюцца прычыны, у выніку якіх наступіла смерць», — паведаміў прадстаўнік Следчага камітэта Аляксей Клімовіч.
