Амерыканскі кампазітар Джэймс Хорнер, які атрымаў дзве прэміі «Оскар» за музыку да фільма «Тытанік», загінуў у авіяцыйнай катастрофе ў Каліфорніі.
Паводле дадзеных The Sydney Morning Herald, у самалёце S312 Tucano, які разбіўся ў акрузе Вентура, знаходзіўся толькі адзін чалавек.
Чыноўнікі авіяцыйнага ведамства ЗША пакуль не змаглі пацвердзіць асобу загінулага ў аварыі пілота.
Але гібель 61-гадовага Хорнера пацвердзіла яго памочнік Сільвія Патрыцыя.
«Мы згубілі дзіўнага чалавека з вялізным сэрцам і неверагодным талентам. Ён памёр, робячы тое, што ён любіў. Дзякуй усім вам за вашу падтрымку і любоў», — сказала яна.
***
У 1998 годзе за працу над фільмам «Тытанік» Хорнер атрымаў прэмію «Оскар» у дзвюх намінацыях: «Найлепшая музыка да драматычнага фільма» і «Найлепшая песня да фільма» сумесна з Уілам Джэнінгсам, які напісаў тэкст песні My Heart Will Go On, выкананай Сэлін Дыён. Альбом з саўндтрэкам да фільма, выпушчаны кампаніяй Sony Classical 18 лістапада 1997 г., разышоўся па ўсім свеце 27 млн копіямі.
Іншыя вядомыя кінастужкі, над якімі працаваў Хорнер, — «Каспер», «Джуманджы», «Адважнае сэрца», «Двухсотгадовы чалавек», «Троя», «Маска Зора» і «Новы Чалавек-павук». Кампазітар часта выкарыстоўваў у сваёй музыцы электронныя і харавыя элементы, а таксама кельцкія матывы.
