Радаслаў Сікорскі сустрэўся з дэлегацыяй не прызнаванага ўладамі Саюза палякаў 2

Міністр замежных спраў Польшчы Радослаў Сікорскі 24 кастрычніка ў Варшаве сустрэўся з вялікай дэлегацыяй не прызнанага беларускімі ўладамі Саюза палякаў.

Паводле інфармацыі прэс-службы знешнепалітычнага ведамства, лідар СПБ Анжаліка Арэхва заявіла, што без падтрымкі польскага ўрада і МЗС было б цяжка ажыццяўляць дзейнасць «ва ўмовах беззаконня». «Дзякуючы такім станоўчым крокам нам удалося выжыць», — сказала яна.

Сікорскі запэўніў дэлегацыю СПБ у пастаяннай падтрымцы палякаў у Беларусі з боку яго ведамства.

«Польшча — гэта краіна, якая найбольш энергічна ў ЕС імкнецца да еўрапеізацыі і дэмакратызацыі Беларусі. Мы з`яўляемся таксама краінай, якая найбольш шчодра падтрымлівае як сваіх суайчыннікаў, гэтак і тых, хто імкнецца да стварэння грамадзянскай супольнасці ў Беларусі», — заявіў міністр.

У сустрэчы бралі ўдзел 45 чалавек, у тым ліку кіраўнікі рэгіянальных аддзяленняў СПБ у Мінску, Брэсце, Івянцы, Ваўкавыску.

Тэмы гутарак — супрацоўніцтва МЗС з СПБ, у тым ліку размеркаванне сродкаў МЗС на падтрымку дыяспары і палякаў за мяжой, захаванне месцаў нацыянальнай памяці, адукацыя моладзі і развіццё польскамоўных СМІ.

Сікорскі звярнуўся да журналістаў з заклікам да адказнасці пры асвятленні сітуацыі вакол польскай меншасці ў Беларусі.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ