3 і 5 мая беларусам варта мець на ўвазе магчымую небяспеку збліжэння Зямлі з астэроідам. Папярэджанне пра гэта з'явілася на сайце Гідраметэацэнтра.
3 мая наша планета зблізіцца з астэроідам 444 584 (2006 UK). Мінімальная адлегласць да аб'екта складзе 0,0458 а.а. (6,85 мільёнаў кіламетраў), хуткасць адносна Зямлі ў момант максімальнага збліжэння — 16,22 км/с. Дыяметр нябеснага цела — 250-570 метраў.
Другое збліжэнне адбудзецца 5 мая — да Зямлі падыдзе на мінімальную адлегласць астэроід 388 945 (2008 TZ3). Мінімальная адлегласць да Зямлі складзе 0.0337 а. е (5 мільёнаў кіламетраў), дыяметр аб'екта — 220-490 метраў, яго хуткасць — 9,65 км/с.
Абодва гэтыя нябесныя целы ў некалькі разоў большыя за «чэлябінскі метэарыт», дыяметр якога быў каля 20 метраў. Згодна з разлікамі астраномаў, сутыкнення двух «майскіх» астэроідаў з Зямлёй не адбудзецца — пасля збліжэння нябесныя целы працягнуць аддаляцца ад нашай планеты.
Найбольшую патэнцыйную небяспеку для Зямлі ўяўляе астэроід Апофіс (99942 Apophis), які наблізіцца да нашай планеты 13 красавіка 2029 года. Яго дыяметр — 393 метры, хуткасць — 7,42 км/с. Да Зямлі ён падыдзе на адлегласць 38,4 тысячы кіламетраў, што ў 10 разоў менш за адлегласць ад Зямлі да Месяца і параўнальна з вышынёй геастацыянарных спадарожнікаў (35 786 км).
