05.08.2010 / 11:03

Беларусь уцягнутая ў скандал вакол С-300 сваіх іранскіх саюзнікаў 1

Афіцыйнае іранскае агенцтва паведаміла пра пастаўку двух ракетных комплексаў з Беларусі. У выпадку пацвярджэння фактаў гэта прывядзе да новай ізаляцыі нашай краіны на міжнароднай арэне.

4 жніўня сусветныя СМІ са спасылкай на іранскія крыніцы паведамілі, што Іран атрымаў 4 зенітна-ракетных комплексы (ЗРК) С-300, нягледзячы на адмову Расеі паставіць іх у межах дзейнага кантракта.
Афіцыйнае іранскае агенцтва паведаміла, што дзве ўстаноўкі атрыманыя з Беларусі, яшчэ дзве — з іншых неназваных краінаў.

Дзяржаўны вайскова-прамысловы камітэт Беларусі адразу ж абвергнуў інфармацыю пра продаж у Іран двух зенітна-ракетных комплексаў С-300. Як паведаміў прадстаўнік Дзяржкамваенпрама па інфармацыі і сувязях з грамадскасцю Уладзімір Лаўранюк, з Тэгеранам беларускі бок не вёў перамоў па гэтай тэматыцы і не пастаўляў у Іран ні комплексы С-300, ні іх кампаненты.

Рэзкасць абвяржэння зразумелая. У выпадку пацвярджэння фактаў гэта прывядзе да новай ізаляцыі нашай краіны на міжнароднай арэне.

Незалежны вайсковы эксперт Аляксандр Алесін мяркуе, што продаж Беларуссю комплексаў С-300 Ірану выглядае малаверагодным: «У нас гэтыя комплексы знаходзяцца ў 15 і 115 зенітных брыгадах. У першай — з савецкіх часоў, а ў другой з 2006 году, калі нам іх паставіла Расія. Па 4 комплексы ў кожнай брыгадзе. У складзе аднаго комплекса — 16 машын. Яны ўсе змантаваныя на шасі беларускай вытворчасці — МЗКТ.

Думаю, што продаж двух з васьмі комплексаў не мог застацца незаўважным. Кожная машына — велічынёй з двухпавярховы дом. Іх немагчыма схаваць ад спадарожікаў-шпіёнаў і мытні ў партах Украіны ці краін Балтыі».

У дадатак да гэтага, спадар Алесін перакананы, што знікненне часткі комплексаў С-300 з Беларусі адразу было б выкрытае замежнымі вайсковымі назіральнікамі: «На тэрыторыі Беларусі пастаянна прысутнічаюць розныя вайсковыя інспекцыі. У тым ліку і з Расіі. Замежныя вайскоўцы кожны месяц падлічваюць колькасць нашых узбраенняў. У дадатак, тыя комплексы, што паставіла нам Расія — проста здадзеныя ў своеасаблівую арэнду. Беларусь абавязаная іх вярнуць, калі выйдзе з саюзніцкіх дамоўленасцяў.

Іх немагчыма прадаць. Расіяне кантралююць стан сваіх С-300 у Беларусі. Яны адразу даведаліся б аб іх знікненні».

У такім выпадку, адкуль у Ірана С-300? Эксперт лічыць, што ўсе яны — кітайскай вытворчасці. Кітай даўно скапіяваў гэтыя зенітна-ракетныя комплексы, а ў дадатак не выконвае дамоваў аб абмежаванні паставак зброі. У тым ліку і ў Іран.

Пікантнасці сітуацыі дадае тое, што кітайскія ўмельцы скапіявалі нават мінскае шасі МЗКТ. У 90-ыя гады Беларусь збудавала ў Кітаі завод па вытворчасці колавых цягачоў і зараз, цалкам верагодна, кітайскія копіі беларускіх «Волатаў» возяць кітайскія ж версіі ЗРК С-300.

«Паведамленні, што комплексы набытыя ў Беларусі — толькі антырасійская прапаганда.
Іран незадаволены пазіцыяй Расіі, якая салідарызуецца з ЗША. Таму і такія заявы, каб насаліць Крамлю», — перакананы эксперт.

Расійскія эксперты не выключаюць і іншай версіі: Іран можа насамрэч не мець С-300, але блефаваць для запалохвання Ізраіля і Захаду. А Беларусь у такім выпадку проста скарысталі ў псіхалагічнай вайне.

Алесь Пілецкі

0
wint / Адказаць
05.08.2010 / 15:25
Ne zusim tak, iak vy pishace. Agenciia - neafciinaia. Krynica iranskaia - adna, a ne nekalki. Navina z'iavilasia tam tol'ki na farsi, hoc' site 4-hmouny i amal' adrazu byla z'niataia. Vos' sion'nia pisau na getuiu temu: http://wintboltoff.livejournal.com/243384.html
Каб пакінуць каментар, калі ласка, актывуйце JavaScript у наладах свайго браўзеру