Aficyjnaje iranskaje ahienctva paviedamiła pra pastaŭku dvuch rakietnych kompleksaŭ ź Biełarusi. U vypadku paćviardžeńnia faktaŭ heta pryviadzie da novaj izalacyi našaj krainy na mižnarodnaj arenie.
4 žniŭnia suśvietnyja ŚMI sa spasyłkaj na iranskija krynicy paviedamili, što Iran atrymaŭ 4 zienitna-rakietnych kompleksy (ZRK) S-300, niahledziačy na admovu Rasiei pastavić ich u miežach dziejnaha kantrakta.
Dziaržaŭny vajskova-pramysłovy kamitet Biełarusi adrazu ž abvierhnuŭ infarmacyju pra prodaž u Iran dvuch zienitna-rakietnych kompleksaŭ S-300. Jak paviedamiŭ pradstaŭnik Dziaržkamvajenprama pa infarmacyi i suviaziach z hramadskaściu Uładzimir Łaŭraniuk, z Tehieranam biełaruski bok nie vioŭ pieramoŭ pa hetaj tematycy i nie pastaŭlaŭ u Iran ni kompleksy S-300, ni ich kampanienty.
Rezkaść abviaržeńnia zrazumiełaja. U vypadku paćviardžeńnia faktaŭ heta pryviadzie da novaj izalacyi našaj krainy na mižnarodnaj arenie.
Niezaležny vajskovy ekśpiert Alaksandr Alesin miarkuje, što prodaž Biełaruśsiu kompleksaŭ S-300 Iranu vyhladaje małavierahodnym: «U nas hetyja kompleksy znachodziacca ŭ 15 i 115 zienitnych bryhadach. U pieršaj — z savieckich časoŭ, a ŭ druhoj z 2006 hodu, kali nam ich pastaviła Rasija. Pa 4 kompleksy ŭ kožnaj bryhadzie. U składzie adnaho kompleksa — 16 mašyn. Jany ŭsie zmantavanyja na šasi biełaruskaj vytvorčaści — MZKT.
Dumaju, što prodaž dvuch z vaśmi kompleksaŭ nie moh zastacca niezaŭvažnym. Kožnaja mašyna — vieličynioj z dvuchpaviarchovy dom. Ich niemahčyma schavać ad spadarožikaŭ-špijonaŭ i mytni ŭ partach Ukrainy ci krain Bałtyi».
U dadatak da hetaha, spadar Alesin pierakanany, što źniknieńnie častki kompleksaŭ S-300 ź Biełarusi adrazu było b vykrytaje zamiežnymi vajskovymi naziralnikami: «Na terytoryi Biełarusi pastajanna prysutničajuć roznyja vajskovyja inśpiekcyi. U tym liku i z Rasii. Zamiežnyja vajskoŭcy kožny miesiac padličvajuć kolkaść našych uzbrajeńniaŭ. U dadatak, tyja kompleksy, što pastaviła nam Rasija — prosta zdadzienyja ŭ svojeasablivuju arendu. Biełaruś abaviazanaja ich viarnuć, kali vyjdzie z sajuźnickich damoŭlenaściaŭ.
Ich niemahčyma pradać. Rasijanie kantralujuć stan svaich S-300 u Biełarusi. Jany adrazu daviedalisia b ab ich źniknieńni».
U takim vypadku, adkul u Irana S-300? Ekśpiert ličyć, što ŭsie jany — kitajskaj vytvorčaści. Kitaj daŭno skapijavaŭ hetyja zienitna-rakietnyja kompleksy, a ŭ dadatak nie vykonvaje damovaŭ ab abmiežavańni pastavak zbroi. U tym liku i ŭ Iran.
Pikantnaści situacyi dadaje toje, što kitajskija ŭmielcy skapijavali navat minskaje šasi MZKT. U 90-yja hady Biełaruś zbudavała ŭ Kitai zavod pa vytvorčaści kołavych ciahačoŭ i zaraz, całkam vierahodna, kitajskija kopii biełaruskich «Vołataŭ» voziać kitajskija ž viersii ZRK S-300.
«Paviedamleńni, što kompleksy nabytyja ŭ Biełarusi — tolki antyrasijskaja prapahanda.
Iran niezadavoleny pazicyjaj Rasii, jakaja salidaryzujecca z ZŠA. Tamu i takija zajavy, kab nasalić Kramlu», — pierakanany ekśpiert.
Rasijskija ekśpierty nie vyklučajuć i inšaj viersii: Iran moža nasamreč nie mieć S-300, ale blefavać dla zapałochvańnia Izraila i Zachadu. A Biełaruś u takim vypadku prosta skarystali ŭ psichałahičnaj vajnie.
