23 сакавіка ў Мінску на сустрэчы прадстаўнікоў сродкаў масавай інфармацыі Індыі з намеснікам міністра культуры Тадэвушам Стружэцкім дасягнута дамоўленасць аб прыездзе ў Беларусь індыйскіх кінапрадзюсараў. Аб гэтым паведаміла БелаПАН прэс-сакратар Міністэрства культуры Ганна Смольская.

Паводле яе слоў, падчас гэтага магчымага прыезду плануецца абмеркаванне пытанняў супрацоўніцтва ў кінасферы і ўдзелу індыйскіх кінематаграфістаў у Мінскім міжнародным кінафестывалі «Лістапад».

Як паведаміла Смольская, сустрэча была арганізавана па ініцыятыве прадстаўнікоў індыйскага офіса тэлеканала Asian News Channel: дырэктара і галоўнага рэдактара Санджыв Малік і старшыні аддзела па развіцці дзелавых сувязяў Раміт Каўр.

Падчас сустрэчы былі разгледжаны пытанні двухбаковага беларуска-індыйскага супрацоўніцтва ў сферы культуры. Асабліва была засяроджана ўвага на праграме супрацоўніцтва паміж урадамі Беларусі і Індыі ў сферы культуры, мастацтва, адукацыі, сродкаў масавай інфармацыі і друку на 2012–2014 гады, якая рыхтуецца да падпісання ў 2012 годзе.

Была таксама абмеркавана магчымасць запрашэння індыйскіх танцавальных калектываў для ўдзелу ў фестывалі «Сожскі карагод».

Акрамя таго, на сустрэчы была адзначана зацікаўленасць індыйскага боку ў супрацоўніцтве з вядучымі навучальнымі ўстановамі культуры Беларусі.

Улічваючы цікавасць бакоў да далейшага ўмацавання беларуска-індыйскага супрацоўніцтва, удзельнікі сустрэчы пацвердзілі неабходнасць яго развіцця па розных кірунках адносін у сферы культуры.

Хочаш падзяліцца важнай інфармацыяй ананімна і канфідэнцыйна?