Паводле словаў Лідзіі Ярмошынай, зараз ЦВК завяршае праверку ініцыятыўнай групы. ЦВК цягам месяца правярае правамоцнасьць яе стварэньня. А Міністэрства юстыцыі мае даць юрыдычную ацэнку абгрунтаванасьці такіх праектаў.
Стварэньне ініцыятыўнай групы, у якую ўвайшлі 500 чалавек, адбылося 1 мая пад адкрытым небам. Аднак, кажа старшыня ЦВК, гэта не парушэньне. Нашмат болей ЦВК цікавіць, ці ўсе з унесеных у сьпіс людзей удзельнічалі ў гэтым мерапрыемстве і ці запіс у ініцыятыўную групу праходзіў добраахвотна. Для гэтага супрацоўнікі Цэнтравыбаркаму абзвоньвалі ініцыятараў унясеньня паправак у працоўнае заканадаўства. «Адразу хачу папярэдзіць, што адказы мы атрымлівалі розныя», — сказала Л.Ярмошына.
У выпадку атрыманьня дазволу ЦВК, ініцыятыўнай групе неабходна будзе сабраць ня менш за 50 тыс. подпісаў. Дагэтуль ніводная спроба рэалізаваць права заканадаўчай ініцыятывы такім шляхам ня мела посьпеху.
