Siońnia ŭ Kijevie pačynaje pracavać letniaja sesija Parlamenckaj asamblei ABSE. U jaje prahramie – dva mierapryjemstvy, jakija majuć biespasiaredniaje dačynieńnie da Biełarusi. 6 i 7 lipienia try parlamenckija kamitety razhledziać prajekt specyjalnaj rezalucyi «Stanovišča ŭ Biełarusi». Kali kamitety ŭchvalać hety dakument, jaho ŭniasuć na hałasavańnie ŭsioj asamblei.
Na 7 lipienia zaplanavany i kruhły stoł u spravach Biełarusi. Jaho praviadzie kiraŭnica rabočaj hrupy ŭ pytańniach Biełarusi Parlamenckaj asamblei ABSE, deputatka Bundestahu Uta Capf. Dla ŭdziełu ŭ hetym mierapryjemstvie ŭ PA ABSE zaprošana aficyjnaja delehacyja Nacyjanalnaha schodu na čale ź vice‑śpikieram Pałaty pradstaŭnikoŭ Siarhiejem Zabałotcam. Taksama zaprašeńni atrymali ŭsie čatyry sustaršyni Palityčnaj rady abjadnanych demakratyčnych siłaŭ Biełarusi i były kandydat u prezydenty Biełarusi Alaksandar Milinkievič.
Jak paviedamiŭ Radyjo Svaboda Anatol Labiedźka, siońnia ŭviečary sustaršyni Palitrady vyjaždžajuć u Kijeŭ.
A daradca Alaksandra Milinkieviča ŭ palityčnych pytańniach Andrej Kusialčuk paviedamiŭ, što Milinkievič znachodzicca ŭ Strasbury. Tam jon vystupić z dakładam u Letnim palitalahičnym universytecie. Zaniatki hetaha ŭniversytetu arhanizuje Rada Eŭropy. Tradycyjna dla vystupu na zaniatkach zaprašajuć laŭreataŭ mižnarodnaj premii imia Andreja Sacharava.
Andrej Kusialčuk paviedamiŭ taksama, što Alaksandar Milinkievič źviarnuŭsia da kiraŭnictva Parlamenckaj asamblei ABSE z prośbaj, kab u Kijevie jaho pradstaŭlaŭ Viktar Karniajenka. Kali na heta budzie zhoda, Karniajenka terminova nakirujecca ŭ Kijeŭ.
