Jaduć nas muchi z kamarami!
Usie zaŭvažyli niezvyčajnuju aktyŭnaść maleńkich kryvasmokaŭ sioleta. Pryčyna banalnaja: vysokaja vilhotnaść i śpiakota, jakija chutka źmianiajuć adna adnu.
Kamary zdolnyja pieratvaryć pryjemny letni viečar u piekła. Niezdarma ŭ savieckich kanclahierach było admysłovaje pakarańnie — «vystavić na kamary». Jany pieranosiać malaryju, ad jakoj štohod pamiraje bolš za miljon žycharoŭ planety. U Biełarusi 39 vidaŭ kamaroŭ, u tym liku i malaryjnyja. Praŭda, ich ukusy ŭ našych šyrotach nia strašnyja.
Nam varta ścierahčysia alerhičnych reakcyj na ŭkusy zvyčajnych kamaroŭ. Miesca ŭkusu śviarbić tamu, što kamar uvodzić u ranku admysłovaje rečyva, jakoje nie daje kryvi zhortvacca. Pieratryvajcie, nie rasčuchvajcie miesca ŭkusu. Kali niama admysłovaha kremu, ranku možna apracavać ciopłym rastvoram sody.
Kryvioju čałavieka siłkujucca tolki kamarychi: atrymaŭšy porcyju čałaviečaha białku, jany adlatajuć bližej da vady, kab adkłaści jajki. Mocnaj pałovie kamarynaj hramady daspadoby nektar kvietak. Samka adčuvaje pach achviary za niekalki kilametraŭ. Ale jaje možna ašukać, prapanavaŭšy zamiest vodaru svajho cieła nievynosny dla maleńkaj vampirki pach hvaździku, anisu ci eŭkaliptu — zmazaŭšy skuru alejem hetych raślin. Padobna dziejničaje i balzam «Zoračka». Ale efektyŭnaść hetych srodkaŭ nie absalutnaja.
Tamu, chto žyvie za horadam, varta skasić pustazielle, vilhotnyja ciemnavatyja zaraśniki jakoha vabiać apłodnienych kamarych, i pazbavicca ad cebraŭ z vadoj, jakija pieratvarajucca ŭ kamarynyja jaśli. Vyhnać kamaroŭ z chaty možna, upryhožyŭšy pakoi bukietami ramonkaŭ.
Kamaram nie pryjšlisia b daspadoby plany AAN, jakaja raspracoŭvaje prahramu sterylizacyi škodnych nasiakomych z dapamohaj nievialikich dozaŭ radyjacyi. Na admysłovych fermach razvodziać samcoŭ, jakich sterylizujuć z dapamohaj radyjeaktyŭnaha apramianieńnia, a potym vypuskajuć. U tych rajonach, dzie niapłodnych bolšaść, jany nie pakidajuć paŭnavartasnym samcam šancaŭ sparycca z samkami, i papulacyja nasiakomych rezka źmianšajecca. Mo takim sposabam možna budzie pazbavicca i ad kamaroŭ. Prahrama moža mieć perśpiektyvy ŭ Biełarusi: apošnim časam pytańnie sterylizacyi škodnych elementaŭ aktyŭna abmiarkoŭvajecca ŭ pałacie pradstaŭnikoŭ…
