Viadučy biełaruski historyk Hienadź Sahanovič vyhnany na vulicu. U Instytucie historyi cytujuć frazu Alaksandra Kavaleni: «Kali b tut byŭ paradak, siudy b nie pryznačyli mianie».
V.a. dyrektara Instytutu historyi Alaksandar Kavalenia ŭ kamentary «NN» nazvaŭ pryčynaj hetaha prahuły: «A kali jon nia zhodzien, chaj padaje ŭ sud». Praŭda, kali rychtavaŭsia numar, na došcy zahadaŭ u instytucie zahad pra zvalnieńnie vyviešany jašče nia byŭ.
U instytuckich kalidorach nazyvajuć inšuju pryčynu zvalnieńnia: niezadavolenaść hramadzkaj i navukovaj pazycyjaj viadučaha biełaruskaha historyka. Našy krynicy nie vyklučajuć «pažadańnia» z vysokaha vierchu ab čystcy instytutu. Ciapier tolki łoviacca nahody dla vykanańnia hetaha. Pieršaj padstavaj dla cisku stała pajezdka ŭ archivy Krakava: maŭlaŭ, H.Sahanovič «nie aformiŭ papieraŭ dla kamandziroŭki». Hetak praca ŭ archivach zaličyłasia za prahuły.
Mnohija supracoŭniki akademičnaj ustanovy bajacca adkryta zastupacca za zvolnienaha kalehu. U Instytucie historyi heta, vidać, nie apošniaje zvalnieńnie. Jašče ŭviesnu za analahičnyja «prahuły» ŭ zamiežnaj kamandziroŭcy ŭ Francyi byŭ zvolnieny Ŭładzimier Kananovič. Vyhnańniem na vulicu, kažuć supracoŭniki instytutu, pahražajuć usim, chto atrymaŭ vymovy z zaniasieńniem u pracoŭnuju knižku, — takich užo paŭdziasiatka.
Padstavami dla vymoŭ stanoviacca farmalnyja pryčepki da «zachavańnia paradku». Tak, niekatoryja archieolahi atrymali vusnyja vymovy za «brud u kabinetach» — reštki posudu, kieramiki z raskopak. A.Kavalenia, narakajuć historyki, chacieŭ by, kab usie rabotniki siadzieli za svaimi stałami ad zvanka da zvanka, a ŭ kabinetach panavała idealnaja čyścinia. Adzinym, chto ŭ vočy načalstvu vykazaŭ svajo abureńnie, byŭ Jaŭhien Aniščanka: «Kali mnie buduć płacić za toje, što ja siadžu tut, a nie ŭ archivie, dy jašče vyviesiać na došku honaru praciortyja mnoj štany, to ja budu siadzieć».
U Instytucie historyi cytujuć skazanuju ciapierašnim kiraŭnikom frazu: «Kali b tut byŭ paradak, siudy b nie pryznačyli mianie». Navodzić paradak, u svaim razumieńni, Kavalenia ŭziaŭsia zaŭziata: za amal 30 hadoŭ da jaho nivodzin z čatyroch kiraŭnikoŭ ustanovy (I.Ihnacienka, P.Pietrykaŭ, M.Kaściuk, M.Staškievič) nie zvalniaŭ supracoŭnikaŭ za vymovy. Pačatak čarhovaj chvali zvalnieńniaŭ supracoŭniki čakajuć pry kancy leta, kali v.a. dyrektara vyjdzie z adpačynku: u abiacańniach zvolnić fihuruje ličba ŭ 30—40 čałaviek.
Toje, što adbyvajecca ŭ instytucie, vyhladaje na planamierny razhrom akademičnaha asiarodku.
Arkadź Šanski
