Pasiadžeńnie miždziaržaŭnaha kaardynacyjnaha kamiteta pa čarnobylskich pytańniach prajšło 5 lipienia ŭ Homieli. Arhanizatarami vystupili Biełaruskaje tavarystva Čyrvonaha Kryža i Respublikanski navukova‑praktyčny centr radyjacyjnaj miedycyny i ekałohii čałavieka.
Jak paviedamiŭ BiełaPAN kaardynatar Čarobylskaj prahramy dapamohi i reabilitacyi (CHARP) Mikałaj Nahorny, u 2006 hodzie prahrama była skancentravana na skryninhu ščytapadobnaj załozy metavaj hrupy ludziej, jakija byli va ŭzroście da 40 hadoŭ padčas avaryi na ČAES i pražyvajuć na zabrudžanych terytoryjach. Śpiecyjalisty piersoŭnych dyjahnastyčnych łabaratoryj (PDŁ) pracavali ŭ šaści abłaściach Rasii, Ukrainy i Biełarusi.
«Śpiecyjalisty abśledavali bolš za 91 tys. čałaviek. Bolš za 46 tysiač, abo 5 1%, byli abśledavanyja ŭpieršyniu z času čarnobylskaj katastrofy, — zaznačyŭ M.Nahorny. — U hrupie, jakaja prajšła skryninh, śpiecyjalisty vyjavili bolš za 36 tys. vypadkaŭ patałohij ščytapadobnaj załozy na roznych stadyjach raźvićcia. Značyć, 40% abśledavanych majuć prablemy z ščytapadobnaj załozaj. Kala 7 tys. čałaviek našy supracoŭniki nakiravali ŭ śpiecyjalizavanyja miedustanovy z padazreńniem na rak. U 212 vypadkach ankazachvorvańnie było paćvierdžanaje».
Pavodle słoŭ kaardynatara prahramy, śpiecyjalisty PDŁ vyratoŭvajuć mnohija žyćci, nakiroŭvajučy tysiačy ludziej u śpiecmiedustanovy dla dalejšaha abśledavańnia i lačeńnia, što paćviardžaje važnaść čarnobylskaj prahramy. PDŁ pracujuć taksama ŭ sielskaj miascovaści, dzie mahčymaści pieršasnaj achovy zdaroŭja vielmi abmiežavanyja.
«Dalejšaja dziejnaść budzie zaležać ad finansavańnia, jakoje ciapier nie źjaŭlajecca harantavana zabiaśpiečanym, — padkreśliŭ M.Nahorny. — Niahledziačy na hrant irłandskaha ŭradu, raźličany na try hady — a heta 500 tys. jeŭra, nieabchodna adšukvać dadatkovyja srodki. My praciahvajem rabić namahańni pa mabilizacyi mižnarodnych krynic i razam z nacyjanalnymi tavarystvami Čyrvonaha Kryža pracujem nad pytańniami pavieličeńnia miascovaha ŭkładu».
 Fota — Anatol Klaščuk |
