Vioska Łučna (Połaččyna) stała čaściej fihuravać u navinach. Štoleta tut ładziacca archiealahičnyja pošuki Łučanskaha manastyra, pobač ź vioskaj budzie pabudavana hidraelektrastancyja. Tutsama prajšoŭ rok-fest «Aja-kemp», inicyjatarami jakoha vystupili muzyki navapołackaha rok-hurtu «Ozon».
Na «Kemp», što prajšoŭ u minuły ŭik-end, byli zaprošany nia tolki rok-kamandy, ale j dy-džei, što ŭnačy viesialili narod elektronnaj muzykaj. Na feście vystupili kala 30 hurtoŭ, pałova ź ich — mienskija. Nijakaha farmatu arhanizatary nie vyznačali, «ciažkija» hurty čarhavalisia ź «lohkimi».
Voś tolki nadvorje vydałasia nadzvyčaj śpiakotnaje. 30 lipienia viadučy festu, veteran połackaha rok-ruchu Siarhiej Aniščanka doŭha nia moh znajści kamandu, jakaja b raspačała kancert — pačatak byŭ a 14-j. Narešcie pahadziłasia mienskaja «Anno Domini». I tolki paśla, z rypieńniem i pradzirańniem vačej rok-dzieja pačała nabirać abaroty.
Hetym razam u feście ŭdzielničała bolš biełaruskamoŭnych kamandaŭ, jakija byli zbolšaha staličnyja.
Hałoŭnaja niazručnaść festu — značnaja adlehłaść ad horadu. Praz heta adčuvaŭsia niedachop słuchačoŭ.
Arhanizatary ŭ razmovach z žurnalistami sprabavali paraŭnać «Aja-kemp» z «Basoviščam» — niešta padobnaje, ale doma. Aniščanka kryŭdziŭsia: na «Basovišča» jeduć za svaje hrošy, a z arhanizataraŭ «Kempu» jašče j patrabujuć hanarary za vystup.
