Rasiejskaja presa piša, što siem marakoŭ z batyskafa AS-28 na Kamčatcy nia vyžyli b, kali b nia ŭciečka infarmacyi ŭ ŚMI. Armija nie źbirałasia źviartacca pa dapamohu da zamiežnikaŭ, choć nia mieła srodkaŭ dla ŭratavańnia marakoŭ.
«Rośsijskaja hazieta» śćviardžaje, što armija akružyła zdareńnie pokryvam vialikaj tajny, bo batyskaf «Pryz» začapiŭsia ab antenu pelenhacyjnaj systemy «Aham», jakaja «zasiakaje» čužyja padvodnyja karabli.
Choć «Pryz» zahraz na dnie Berynhavaha mora ŭ čaćvier, sprava vypłyła na publiku tolki ŭ piatnicu, dziakujučy ananimnamu zvanku na miascovuju radyjostancyju «Radyjo-3». Patelefanavała žančyna, jakaja adrekamendavałasia «žonkaj padvodnika» i raskazała pra zdareńnie z batyskafam, pišuć hazety.
Na zvanok adkazała Hiuzel Łatypava, jakaja supracoŭničaje taksama z ahienctvam «Interfaks». Razam z karespandentkaj ahienctva «RIA «Naviny» ŭ Pietrapaŭłaŭsku-Kamčackim Aksanaj Husievaj Łatypava vyrašyła pravieryć syhnał. Kali ŭ vajskovym štabie sa złościu admovilisia ad usialakich kamentaroŭ, žurnalistki zrazumieli, što infarmacyja praŭdzivaja, i dali joj chod.
— Miarkuju, biaz hetaj uciečki armija paprostu pastaviła b kryž na hetych ludziach, bo ŭ Rasiei nie było abstalavańnia, kab ich vyratavać. A prasić ab dapamozie zamiežnyja krainy — nie ŭ tradycyjach Rasiei. Taja žančyna ŭratavała marakoŭ. Nu, i ŚMI, asabliva zamiežnyja, a heta było vyrašalnym.
Usiaho praź niekalki hadzin paśla taho, jak infarmacyja ab «Pryzie» trapiła ŭ ŚMI, jaje paćvierdziła kamandavańnie armii ŭ Maskvie i Ŭładzivastoku. Štab vajenna-marskoha flotu Pietrapaŭłaŭsku-Kamčackaha aficyjnaje paviedamleńnie apublikavaŭ tolki ŭ aŭtorak, praz dva dni paśla vyratavańnia batyskafa.
Armija kateharyčna abvierhła ŭ aŭtorak apublikavanuju «Kommiersantom» infarmacyju pra toje, što maraki na «Pryzie» ŭžo pisali pieradśmiarotnyja listy. Pavodle hazety, jany byli ŭpeŭnieny ŭ niepaźbiežnaści svajoj śmierci, bo pačuli ad ratavalnikaŭ, što padčas aperacyi ni ŭ jakim razie nielha paškodzić kaštoŭnaj anteny, ab jakuju začapiŭsia AS-28.
Rasiejskaja presa paviedamlaje pra razmovu ŭratavanych ź ministram abarony Siarhiejem Ivanovym, u jakuju bieź pierastanku ŭmiešvaŭsia kamandujučy paŭnočna-ŭschodniaj hrupoŭkaj vojsk Viktar Haŭrykaŭ. Jon «vypraŭlaŭ» raskazy marakoŭ, piarečačy ich słovam. Abviarhaŭ infarmacyju pra zahad zachavać antenu. Nie zvažajučy na piarečańni marakoŭ, śćviardžaŭ, što «Pryz» paśpieli padniać na niekalki dziasiatkaŭ metraŭ, pierš čym da aperacyi padklučyŭsia brytanski robat «Skorpijo», jaki pierarezaŭ lini.
Pradstaŭnik Cichaakijanskaha flotu padaŭ žurnalistam versiju padziej, što zusim nie stasavałasia z apoviedami členaŭ siamiej marakoŭ.
Alena Miłašeŭskaja, žonka kamandzira «Pryzu», jakaja spačatku achvotna razmaŭlała z presaj, krytykujučy rasiejskaje kamandavańnie, paźniej stała admaŭlacca ad kamentaroŭ. «Admirały hladziać na mianie ź nianaviściu, i ja bajusia, što ŭ muža buduć prablemy», — skazała jana «Kommiersantu».
