Pradaviec kasmetyki Oskar straciŭ pracu. Ściarvoznaja radyjoviadoŭca Sandra hublaje rejtynh. Ale Oskar nia traciŭ u markiecie času darma i nabyŭ niekatoryja kaštoŭnyja ŭmieńni j navyki.
Jon adkryvaje Škołu spakušeńnia. Spravaj honaru dla prafesara mačysckich navuk staje mužčynanienaviśnica Sandra. Hieroj telefanuje ściervie ŭ eter — i prykidvajecca zakachanym na miažy nervovaha zryvu. Raspačynajecca...
Chaŭjer Bałahier raskvieciŭ zvykłuju ramantyčnuju kamedyju postmadernymi farbami. Mańjak-dantyst, chatniaja haspadynia-travesty i reklama majtkoŭ — usim chapaje miesca ŭ hetym karnavale.
Viktoryja Abryl u roli Sandry to raźvinčanaja, jak lalka na šarnirach, to naściarožanaja, jak kobra pierad kameraj. Hieroj Chaŭjera Vejhi, naadvarot, łahodny, jak śmietankovy johurt. Jaki čas, takija i typažy. Mužčynam — pačućci, słabomu połu — karjera.
Chacia pry kancy filmu nas čakaje pradkazalny chepi-end — nia viercie. Za fasadam patryjarchalnaj ramantyki chavajecca radykalnaja pierastanoŭka hiendernych rolaŭ.
Usio nieŭprykmiet źmianiajecca ŭ hetym hišpanskim kino!..
▶
«Škoła spakušeńnia» («Escuela de seduccion»).
Hišpanija, 2004, kalarovy, 110 chv.
Žanr: ramantyčnaja kamedyja.
Adznaka: 7,5 (z 10).