Raźvićcio horada, źjaŭleńnie novych stancyj mietro — sprava, biezumoŭna, dobraja. Adnak budaŭnictva novych vulic ci stancyj zaŭsiody zakranie intaresy tych hramadzianaŭ, jakija musiać źmianić svajo miesca žycharstva. Adzin z prykładaŭ — dom na vulicy Umanskaj, viadomy jak «dom z płakatami».
Videažurnalistki Našaj Nivy naviedali haradskuju lehiendu. Zvonku dom Alaksieja Vaskaboviča, zasłužanaha treniera pa lohkaj atletycy, usim svaim vyhladam niby kaža:
Uładalnik znakamitaha «doma z płakatami» praciahvaje baraćbu. Čamu dahetul nie vyrašyŭsia kanflikt ź pierasialeńniem — hladzicie na videa:
U dom na Umanskaj siamja Vaskabovičaŭ – Alaksiej, žonka i dva syny – pierajechali ŭ 1996 hodzie. Da hetaha žyli ŭ trochpakajoŭcy. U tyja časy Alaksiej, trenier pa lohkaj atletycy, časta byvaŭ u zamiežnych kamandziroŭkach, niabłaha zarablaŭ.
“Lišni kufal piva za miažoj nie piŭ”, – uzhadvaje Alaksiej, usio aščadžaŭ na dom.
Letam 2000-ha mocnym vietram pałamała dach. Daviałosia ramantavać. A zaadno Alaksiej vyrašyŭ narešcie pačać rekanstrukcyju druhoha paviercha. Voś tolki rabiŭ heta biez dazvołu miascovych uładaŭ. Za što potym spłaciŭ štraf. Abpiekšysia na “małace”, haspadar skłaŭ vosieńniu taho ž 2000-ha hoda ŭsiu nieabchodnuju dakumientacyju i zanios u rajvykankam.
Tahačasny architektar Administracyi Maskoŭskaha rajona V.Vasiljeŭ svoj “uzhadniams” na prajekcie rekanstrukcyi pastaviŭ. Ale pobač z podpisam architektara – prypiska ad ruki: “dla razhladu ŭ Kamitecie artchitektury Minharvykankama” (hł.fota).
Prajekt doma ŭzhadniŭ rajonny architektar, ale z prypiskaj.
Admova Administracyi Maskoŭskaha rajona pryznavać mansardu.
Alaksiej Vaskabovič.
Haspadar źniaŭ płakaty, ale zachavaŭ "na čorny dzień".
Vid z vakna dvuchpakajoki na pr.Praŭdy.
Vanny pakoj - standarty: hołyja ścieny.
Horad nie daŭ dabra na rekanstrukcyju. Užo tady vulica Umanskaj była ŭ tak zvanych “čyrvonych linijach”. Naturalna, pavieličeńnie płoščy doma paśla ramontu aznačała b bolšuju kampiensacyju pry znosie.
Vaskabovič z takim rašeńniem nie zhodny. Načytaŭšysia zakonaŭ, jon davodzić, što podpis architektara rajona lehalizavaŭ jaho prava na druhi pavierch. A dazvoł Minharvykankama byŭ niepatrebny. Da taho ž, płan rekanstrukcyi horada, pavodle jakoha jaho dom traplaŭ u “čyrvonyja linii”, zaćvierdzili tolki ŭ 2003 hodzie. A značyć, tryma hadami raniej nie mahli spasyłacca na płan, jakoha nie było.
Alaksiej raspavioŭ nam i pra inšyja jurydyčnyja tonkaści.
Aproč hetaha, Alaksieja aburaje, što pobač ź jaho domam dazvolili novaje budaŭnictva. Jak tak: susied buduje novy dom, a jamu svoj da ładu nie dajuć davieści…
Svajo abureńnie Vaskabovič nieadnarazova vykazvaŭ u piśmach da prakuratury. Zaklikaŭ pravieryć, ci niama ŭ dziejańniach Minharvykankama karupcyjnaha składnika. Prakuratura pierasłała jaho list tamu, na kaho jon skardziŭsia.
Čas išoŭ, syny Alaksieja žanilisia, źjavilisia ŭnuki. Vaskabovič darabiŭ druhi pavierch. Paśla hetaha realnaja płošča doma pavialičyłasia da 305 kvadratnych mietraŭ. Ale “aficyjnaja” zastałasia raniejšaj: 208 kvadrataŭ.
Vaskabovič abskardžvaŭ admovu ŭładaŭ pryznać druhi pavierch. Sud staŭ na bok Administracyi. To bok, faktyčna druhi pavierch pryznali “samavołkaj” z usimi nastupstvami (biez prava kampiensacyi pry znosie).
Zimoj 2009-ha trom siemjam Vaskabovičaŭ (Alaksiej z žonkaj i syny z žonkami i dziećmi), razam 9 čałaviek, prapanavali ŭ jakaści kampiensacyi za dom dźvie kvatery na ŭskrajku horada.
Vaskabovičy pajšli na adčajny pijar chod: vyviesili płakaty, pryciahnuli presu. Pisali i pravaabaroncam ź Biełaruskaha Chielsinkskaha kamiteta, i Łukašenku.
I voś sioleta žychary Malinaŭki i Paŭdniovaha Zachadu, jakija štodnia prajazdžali la “domika z płakatami” na 53-m traliku, zaŭvažyli “prapažu” płakataŭ. “Narešcie razabralisia!” -- padumaŭ horad.
Sapraŭdy, paśla troch hadoŭ supraćstajańnia i biaskoncych pachodaŭ pa kabinietach, baki jak byccam by znajšli parazumieńnie. Vaskabovič źniaŭ płakaty, a administracyja rajona ŭ svaju čarhu paabiacała jamu ŭ jakaści kampiensacyi try kvatery.
Ale ž na spravie apynułasia nie ŭsio tak hładka. Vaskabovič śćviardžaje, što była damoŭlenaść nakont 4-, 3- i 2-ch-pakajovych kvateraŭ ahulnaj płoščaj 260 mietraŭ kvadratnych. A dali 4-pakajoŭku i dźvie “dvuški”, płošča jakich na 30 mietraŭ mienšaja za damoŭlenuju. Kali pieravieści mietry ŭ baksy, vynikaje, što niedadali kala 40 tysiač “umoŭnych”.
I Vaskabovič znoŭ pajšoŭ u nastup. Chto ž ad svajho admovicca? Maŭlaŭ, nie zachacieli pa-dobramu davać 260 kvadrataŭ, budu sudzicca, kab pryznali druhi pavierch. A tady budziecie vinnyja ŭsie 305 mietraŭ. Takaja voś matematyka z ekanomikaj.
U Administracyi Maskoŭskaha rajona nam nie paćvierdzili, što była niejkaja damoŭlenaść nakont 260 mietraŭ.
Andrej Suślankoŭ, namieśnik staršyni, padkreśliŭ, što kampiensacyja dajecca, zychodziačy z aficyjna zarehistravanaj płoščy doma, a taksama niekatorych inšych niuansaŭ, prapisanych u zakanadaŭstvie. A druhi pavierch u Vaskaboviča – heta samavołka. Značyć, prapanavanyja Vaskaboviču kvatery – całkam adekvatny varyjant kampiensacyi.
Heta paćviardžaje i načalnica jurydyčnaha adździeła Natalla Čarachovič. U jaje kabiniecie my pabačyli ažno try taŭščeznyja tečki z teham “Vaskabovič”.
My naviedali adnu z prapanavanych horadam kvateraŭ. Heta dvuchpakajoŭka ŭ novym domie na praśpiekcie Haziety “Praŭda” (adna z troch “vysotak” la Mižnarodnaha adukacyjnaha centra, IVV).
Blizka mietro, i na vyhlad dom padajecca elitnym. Sapraŭdy, prastorny choł na pieršym paviersie, kanśjeržka. Usio astatniaje mała čym roźnicca ad bolšaści sacyjalnych novabudoŭlaŭ. Dahetul nie prybranaje budaŭničaje śmiećcie ŭ kalidory, aby-jak prybityja panelki nad liftam. Unutranaje afarmleńnie taksama typovaje. Padłoha – linoleum. Kafli ŭ vańnie i na kuchni niama (hł. fota).
Inšy na miescy Vaskaboviča daŭno b užo pahadziŭsia. Maŭlaŭ, u ludziej i horš byvaje. Ź inšaha boku, całkam naturalnaje žadańnie mužčyny, jaki stolki hod zmahajecca za dom, dabivacca taho, što jon ličyć zakonnym.
