 |
U Pinsku za paradkam u miascovaj haziecie «Žyvaja vada» naziraje śpiecyjalna zamacavany za redakcyjaj dziela hetaj mety milicyjant.
U redakcyju haziety ŭ červieni naviedaŭsia opierupaŭnavažany kryminalnaha vyšuku Alaksandr Pabiarežny i, spasłaŭšysia na adpaviedny zahad kiraŭnictva, pradstaviŭsia hałoŭnamu redaktaru haziety Valancinie Navaryč svajho rodu naziralnikam za žyćciom haziety ad pravaachoŭnych orhanaŭ. Pavodle jaho słoŭ, takija naziralniki zamacavanyja i za inšymi ŭstanovami i pradpryjemstvami ŭ horadzie.
A. Pabiarežny mieŭ pry sabie śpiecyjalnuju ankietu i pavodle jaje zadavaŭ šmatlikija pytańni padčas razmovy z redaktaram. Milicyjant cikaviŭsia, u pryvatnaści, kolki ludziej pracuje ŭ kalektyvie, jakaja ŭ ich adukacyja i ŭzrost, chto pazaštatna supracoŭničaje z redakcyjaj. Cikaviła jaho i tematyka vydańnia, a taksama ź jakimi hramadskimi arhanizacyjami maje stasunki hazieta i inšaje.
Na raźvitańnie A.Pabiarežny pakinuŭ numary svaich telefonaŭ i paviedamiŭ, što da jaho treba źviartacca, kali ŭ redakcyi časam ŭźniknuć niejkija pazaštatnyja situacyi. Jak raspaviała Valancina Navaryč, jakija kankretna situacyi jon nie ŭdakładniŭ, ale skazaŭ, što supracoŭniki sami raźbiarucca.
U Pinskim haradskim adździele ŭnutranych spraŭ paćvierdzili, što jość taki zahad, i ŭźnik jon u sakaviku hetaha hoda.
«Zroblena heta dziela zručnaści hramadzian. Kab jany ŭ luby momant mahli źviarnucca da supracoŭnika milicyi z raznastajnymi pytańniami, — patłumačyŭ namieśnik načalnika Pinskaha HAUS Stanisłaŭ Kibak. — A milicyjaniery ŭ svaju čarhu buduć naviedvacca ŭ kalektyvy i cikavicca, čym tam žyvuć supracoŭniki».
Nazvać inšyja arhanizacyi ŭ Pinsku, za jakimi taksama zamacavanyja «apiekuny» ź milicyi S.Kibak admoviŭsia, spasłaŭšysia na toje, što heta «ŭnutranaja infarmacyja».
Pakul situacyj, kali b spatrebiłasia kansultavacca z opierupaŭnavažanym, u redakcyi «Žyvoj vady» nie ŭźnikała.
Ilustracyja — cultofthedeadfish
