Zatrymany redaktar «NN»
21 sakavika a 10-j ranicy na Kastryčnickaj płoščy byŭ zatrymany hałoŭny redaktar «Našaj Nivy» Andrej Dyńko. Sudździa Alena Krajčyk prysudziła jamu 10 sutak aryštu.
Dobruš
11 sakavika padčas raspaŭsiudu ahitacyjnaj litaratury za A.Milinkieviča na rynku zatrymali Marka Sańnikava: jaho źvinavacili ŭ niezakonnym raspaŭsiudzie drukavanaj pradukcyi dy aštrafavali na 10 b.v. (310 tys.) «za parušeńnie pracy vybarčaj kamisii».
U Dobrušy vykankam 16 sakavika sarvaŭ sustreču Ŭładzimiera Navasiada, davieranaj asoby A.Milinkieviča, z vybarcami: kali ludzi sabralisia ŭ Dom kultury, čynoŭniki abviaścili, što sustreča pieranosicca na paŭtary hadziny.
Babrujsk
13 sakavika padčas pieravozki aficyjna vydadzienych materyjałaŭ A.Kazulina zatrymanyja Michaił Kavalkoŭ i Ihar Kanojka. 14 sakavika padčas raspaŭsiudu pa paštovych skrynkach ahitmateryjałaŭ zatrymali 5 ahitataraŭ A.Milinkieviča, u tym liku aktyvista BNF Dzianisa Šejko: na jaho skłali pratakoł za niezarehistravanyja ahitmateryjały.
Na 20 sakavika atrymali pozvy ŭ vajenkamat aktyvisty štabu Milinkieviča – Aleś Čyhir, Dz.Šejko, Dzianis Bujnicki (terminy vajskovych zboraŭ u pazovach nie paznačanyja). Valerja Mackieviča, jaki nie padlahaje pryzyvu pavodle stanu zdaroŭja, 20 sakavika vyklikajuć na «pierakamisavańnie».
Kiraŭsk
14 sakavika hrupa pazaviedamasnaj achovy, uzbrojenaja aŭtamatami, zatrymała aŭtamabil ź piaćciu aktyvistami hrupy A.Kazulina i dastaviła ich u pastarunak, dzie hadzinu vioŭsia dopyt.
Kryčaŭ
Biaz sankcyi prakurora 15 sakavika kala 20 milicyjantaŭ praviali pieratrus u chacie j zatrymali Ŭładzimiera Nahornaha, vydaŭca niezarehistravanaj hazety «Volny horad». Jany skanfiskavali kamputary, dakumenty i ŭlotki 1990-ch.
18 sakavika zatrymali redaktara niezarehistravanaj hazety «Volny horad» Siarhieja Niaroŭnaha: jaho vyklikali ŭ prakuraturu, ale adrazu pa vychadzie z kvatery milicyjanty zavieźli ŭ pastarunak.
Studenty
Z BDPU «za parušeńnie praviłaŭ unutranaha rasparadku» 15 sakavika vyklučanyja Ludmiła Asipienka i Aleś Karciel: «pravinaj» było redahavańnie niezarehistravanaha biuleteniu «Tankisty». 17 sakavika z toj ža farmuloŭkaj vyklučyli Ryhora Škurynava. Pikiet u padtrymku vyklučanych 17 sakavika razahnali milicyjanty j achova VNU.
Namieśnik dekana fakultetu markietynhu, menedžmentu i pradprymalnictva BNTU ź nieviadomymi ŭ cyvilnym zładziŭ pieratrus u internackim pakoi studenta 2-ha kursu Jaŭhiena Ivaniuka ŭ adsutnaść haspadara. «Hości» zabrali dysk z zapisam televystupu kandydata ŭ prezydenty A.Milinkieviča.
Horadnia
15 sakavika asudzili na 5 sutak Vadzima Sarančukova i hałoŭnaha redaktara hazety «Gos znad Niemna na uchodzstwie» Andžeja Pisalnika – za «drobnaje chulihanstva». Mikałaja Vorana – na 7 sutak. U hety ž dzień zatrymali pravaabaroncu Mikołu Lemianoŭskaha.
16 sakavika zatrymali naziralnika Jaŭhiena Lasockaha. Artura Śmiatanina zatrymali z ahitmateryjałami A.Milinkieviča. 14-ha sakavika milicyjanty prychodzili da Arturavych susiedziaŭ, kab vyśvietlić, ci nie skandalić jon, a 15-ha vartavali kala padjezdu, adnak Śmiatanin nie načavaŭ doma. 17 sakavika jaho asudzili na 7 sutak.
17 sakavika zatrymanyja Andrej Mialeška i były palitviazień, adzin ź lideraŭ pradprymalnickaha ruchu Alaksandar Vasiljeŭ. Valerja Kisiala asudzili na 3 sutak za «drobnaje chulihanstva».
17 sakavika pad milicejski nahlad uziaty dom Tadevuša Havina.
Hrupu piacidziasiatnikaŭ (7 čałaviek), jakija jechali ŭ Miensk pamalicca za mirnaje zakančeńnie vybaraŭ, zatrymali 17 sakavika ŭviečary ŭ Horadni. 18 sakavika ich asudzili na 3 sutak, abvinavaciŭšy ŭ niecenzurnaj łajancy ŭ milicejskim pastarunku. Svajakoŭ u zalu sudu nie puścili.
19 sakavika da Andreja Pačobuta, redaktara časopisa «Magazyn polski na uchodzstwie», asudžanaha na aryšt, zavieźli ŭ špital chutkaj dapamohi: u zali sudu jon abvieściŭ suchuju haładoŭku, ciapier jaho stan pahoršyŭsia.
Žurnalista Andžeja Pisalnika, aktyvista Sajuzu palakaŭ, jaki 20 sakavika tolki vyjšaŭ na volu paśla 5-dzionnaha aryštu, u hety ž dzień zatrymali za «niecenzurnuju łajanku». Paśla hetaha byli zatrymanyja žurnalist Ihar Bancar i jašče niekalki aktyvistaŭ demakratyčnych arhanizacyjaŭ.
21 sakavika na 10 sutak asudzili administratara sajtu grodno.net Alaksieja Radsa, zatrymanaha napiaredadni.
Pinsk
15 sakavika zatrymali aktyvistaŭ vybarčaj kampanii Viktara Jarašuka, Siarhieja Kaściukoviča, Kanstancina Čuvaka, Badzieviča (jaho zabrali prosta z pracy), Paŭła Alachnoviča (vajskovaha pensijanera zatrymali, kali vyhulvaŭ sabaku). Alachnovič abvieściŭ 17 sakavika haładoŭku.
Bieraście
15 sakavika zatrymali Jurasia Hubareviča: jaho źvinavacili ŭ parušeńni praviłaŭ darožnaha ruchu. 17 sakavika jahonamu aŭtamabilu prabili koły kala milicejskaj abłasnoj upravy: aktyvist padavaŭ zajavu na toje, što jaho pieraśledujuć padčas pajezdak pa vobłaści. Kali Hubarevič adjechaŭ ad milicyi, jaho spyniŭ rabotnik DAI, jaki źniaŭ numary z aŭtamabila, zajaviŭšy, što mašyna svoječasova nie prajšła techahlad.
Źmitra Šymanskaha asudzili na 10 sutak pa abvinavačańni ŭ arhanizacyi niesankcyjavanaha schodu, Ryhoru Bakijeviču dali 7 sutak aryštu, źvinavaciŭšy ŭ drobnym chulihanstvie. Padčas raspaŭsiudu ahitacyjnych materyjałaŭ A.Kazulina ŭ Bieraści 15 sakavika byli zatrymanyja Jury Bacuk i Aleś Sacuk. 17 sakavika milicyjanty zatrymali pravaabaroncu Ŭładzimiera Vialičkina j zasudzili na 5 sutak: da taho jaho niekalki hadzinaŭ vazili pa horadzie z pakietam na hałavie i pahražali.
U Janavie (Bieraściejščyna) 16 sakavika zatrymali Ŭładzimiera Kazieku.
Naziralnika Ihara Kučynskaha 17 sakavika vyklikali ŭ KDB – potym jon admoviŭsia ad nazirańnia za vybarami.
18 sakavika zatrymali Ju.Hubareviča, Jaŭhiena Prakurata (abodvuch asudzili 20 sakavika na 5 sutak), Andreja Karpuka i Źmitra Filipčuka (asudžanyja na 2 sutak). 20 sakavika sudzili kiraŭnictva haradzkoha j abłasnoha štabu Kazulina ŭ Bieraści: Valancina Łazarenkava, Śviatasłava Vałasiuka, Ihara Masłoŭskaha (usich asudzili na 7 sutak), Hannu Kanius (5 sutak).
19 sakavika milicyjanty zatrymali Ŭładzimiera Radzivončyka, zajaviŭšy jamu, što jon prachodzić pa kryminalnaj spravie za dyskredytacyju Biełarusi. Zatrymali j Siarhieja Jaŭcifiejeva: jon nios pieradaču zatrymanym raniej aktyvistam štabu A.Kazulina. Paźniej Jaŭcifiejeva asudzili na 7 sutak aryštu za «drobnaje chulihanstva».
21 sakavika na 7 sutak aryštavany Ŭładzimier Kraśko – za «łajanku ŭ prysutnaści dziaciej».
Baranavičy
15 sakavika zatrymali Viačasłava Bołbata, aktyvista hrupy A.Kazulina.
U baranavicki špital 16 sakavika AMAPaŭcy pieravieźli moładzievaha aktyvista Mikitu Sasima, jakomu napiaredadni vyrazali apendycyt i jašče nie źniali švy. U dačynieńni da Sasima pačali kryminalnuju spravu za ŭchileńnie ad pryzyvu ŭ vojska.
16 sakavika zatrymali aŭtamabil siabra AHP Siarhieja Andruščanki. Jaho abvinavacili ŭ pieravyšeńni chutkaści, a paśla zhody zapłacić štraf skłali pratakoł za chulihanstva i aryštavali na 7 sutak.
16 sakavika Viktara Karlinskaha asudzili na 6 sutak, Źmitra Pałojku – na 3 sutak za «drobnaje chulihanstva». U hety ž dzień za «niesankcyjavany schod» (tak byŭ acenieny zbor aktyvistaŭ Kazulina na pryvatnaj kvatery) aštrafavanyja Ŭładzimier Hoŭša, Karniej Piatrovič, Mikałaj Sieviercaŭ, Viktar Alachnovič, Michaił Minin i Alaksandar Halkievič. Kožny ź ich dastaŭ štrafu ŭ 20 b.v. (620 tys.).
Milicyjanty naviedvalisia 17 sakavika ŭ kvatery aktyvistaŭ Alesia Pikuły i Viktara Mieziaka, ale nie zmahli ich znajści.
Rečyca
Na 7 sutak 15 sakavika asudžany Valery Pucicki: jaho zatrymali na pracy i źvinavacili ŭ chulihanstvie. Na 2 b.v. Rečycki rajsud aštrafavaŭ Aleha Šabietnika za toje, što toj rasklejvaŭ na ahitacyjnym stendzie nalepki A.Kazulina. 17 sakavika jaho zatrymali za «nieprystojnyja pavodziny ŭ hramadzkim miescy». 20 sakavika adbyŭsia sud, jaki vynies jamu papiaredžańnie: śviedki paćvierdzili, što aktyvist nia łajaŭsia na vulicy.
Uładzimiera Nievara, aktyvista kamandy Kazulina, 17 sakavika vyklikali pa telefonie ŭ milicyju.
Połacak
15 sakavika padčas raspaŭsiudu aficyjnych ahitacyjnych materyjałaŭ Kazulina zatrymali Siarhieja Niecialova: jamu inkryminujuć drobnaje chulihanstva.
Vasila Chramcova, aktyvista štabu A.Milinkieviča, asudzili na 5 sutak aryštu: jaho abvinavacili, što, jedučy na aŭtamabili, nie prapuściŭ na piešachodnym pierachodzie minaka. Sudździa nia ŭziaŭ pad uvahu, što Chramcoŭ chvareje na cukrovy dyjabet i pavinien trojčy ŭ sutki rabić ukoły insulinu.
U Navapołacku 17-ha sakavika zatrymali Vasila Vierasava padčas raspaŭsiudu ahitacyjnych materyjałaŭ A.Kazulina. U milicyi ŭ jaho paprasili prabačeńnia, kali pabačyli, što materyjały vydadzienyja aficyjna, i pryvieźli na toje miesca, dzie zatrymali.
Miensk
15 sakavika moładzievych aktyvistaŭ Volhu Sakałovu i Antona Stolara asudzili na 7 sutak aryštu za drobnaje chulihanstva: pry ahladzie ŭ ich znajšli 200 ulotak.
Aŭtamabil Paŭła Žuka ź pieradvybarčymi ŭlotkami spynili 15 sakavika j kanfiskavali ahitacyju.
16 sakavika zatrymanyja Ihar Šynkaryk i Anatol Labiedźka: u haražy Labiedźki adbyŭsia pieratrus, na jaho skłali pratakoł za drobnaje chulihanstva j adpuścili da 21 sakavika. 17-ha sakavika kiraŭnik KDB S.Sucharenka na presavaj kanferencyi źvinavaciŭ Labiedźku ŭ datyčnaści da teraryzmu.
16 sakavika zatrymali Płatonava, Bialaŭskaha, Marozava, Mackieviča, Rumina – aktyvistaŭ štabu A.Kazulina, jakija mieli pry sabie ahitacyjnyja materyjały kandydata ŭ prezydenty. Pry zatrymańni ŭ chłopcaŭ adrazu zabrali mabilnyja telefony.
Palitolahu Andreju Suzdalcavu 17 sakavika skasavali vid na žycharstva: da 23 sakavika rasiejski hramadzianin musiŭ pakinuć terytoryju Biełarusi. Pryčyny vysyłki nie tłumačacca.
17 sakavika zatrymali, a 20 sakavika zasudzili moładzievych aktyvistaŭ Alesia Zarambiuka, Siarhieja Sałaša (3 sutak), Jaŭhiena Skrabutana (5 sutak), Jurja Karetnikava (7 sutak), Źmitra Macielskaha (5 sutak) i Sieržuka Kastylenku. U kvatery praviali pieratrus i znajšli niekalki bieł-čyrvona-biełych ściahoŭ.
Paśla pieradačy praduktaŭ zatrymanym hramadzianam Ukrainy 17 sakavika ŭ Miensku zatrymany siabra ŭkrainskaj moładzievaj arhanizacyi «Studenckaje bractva» Dzianis Nibijok: jamu zakidajuć drobnaje chulihanstva.
Padčas sankcyjavanaha pikietu 17 sakavika zatrymali aktyvistaŭ KCHP–BNF Anatola Łahutava, Mikałaja Ŭstymčuka, Mikałaja Hałaŭniova i Ału Hucavu.
Padčas Narodnaha hałasavańnia 19 sakavika zatrymany aktyvist KCHP–BNF Uładzimier Jucho (asudžany na 7 sutak).
Ihara Ivanova zatrymali 19 sakavika za toje, što jon fatahrafavaŭ na vybarčym učastku.
Pierad sustrečaj z demakratyčnymi kandydatami 19 sakavika byli zatrymanyja lider niezarehistravanaj Biełaruskaj partyi Svabody Siaržuk Vysocki, Ihar Hicevič (20 sakavika abodva asudžanyja na 5 sutak aryštu), Aleh Korban, Pavał Jałavin, Jury Fabišeŭski.
Aktyvista chryścijanskaha ruchu Alaksieja Šeina zatrymali 19 sakavika va ŭłasnaj kvatery milicyjanty-aŭtamatčyki j pradstaŭniki KDB: jany zajavili, što šukajuć u pamiaškańni zbroju ci bomby. Nie znajšoŭšy ničoha, žurnalista abvinavacili ŭ brydkasłoŭi dy zatrymali.
Paśla mitynhu byli zatrymanyja hramadzianin Rasiei j 7 hramadzianaŭ Ukrainy – siabroŭ ukrainskaj moładzievaj arhanizacyi «Nacyjanalny aljans». 20 sakavika ich departavali ź Biełarusi.
Unačy na 20 sakavika ŭ Miensku byli zatrymanyja 5 aktyvistaŭ štabu A.Kazulina: viadomyja imiony tolki dvuch – Ihar Nieściarovič i Pavał Budoŭski.
20 sakavika asudžanyja Śviatasłaŭ Sokał, hramadzianin Rasiei Alaksiej Ściapanaŭ, Dzianis Dziuba (usie pa 10 sutak), Źmicier Siudak (15 sutak). Zatrymanyja Siarhiej Michnoŭ (źbity pry zatrymańni), Uładzimier Kiškurna, Siarhiej Łukin, Valer Mazynski, Alaksiej Janukievič, Źmicier Hurnievič, Biruk, Ryšytoŭski, Buklej, Uładzimier Kazak, Julija Kaśpier, Kucharava, Siarhiej Kaśko, Aleh Žłutka, Jury Čavusaŭ, Źmicier Chilko (adpuščany), Alaksiej Tabolič (adpuščany), Taciana Choma, Anatol Labiedźka, Alaksandar Dabravolski, Taciana Jełavaja, Jury Sidun, Volha Kuźmič, Valancina Palevikova, Ludmiła Hraznova (adpuščanaja).
Mahileŭ
14 sakavika zatrymali moładzievaha aktyvista Maksima Dvareckaha – za «drobnaje chulihanstva», jamu prysudzili 6 sutak.
19 sakavika zatrymany Alaksandar Siłkoŭ.
20 sakavika na 5 sutak aryštu asudzili moładzievaha aktyvista Aleha Miacielicu: jaho abvinavacili ŭ brydkasłoŭi na vulicy. Miacielicu pavinny byli vypuścić 18 sakavika paśla druhoj zapar 15-dzionnaj adsiedki, ale žonka tak i nie dačakałasia jaho na vychadzie ź izalataru časovaha ŭtrymańnia.
Palitviaźni
Da palitviaźnia Paŭła Sieviarynca ŭ internacki pakoj 15 sakavika padsialili supracoŭnika kamendatury.
Palitviaźnia Siarhieja Skrabca 17 sakavika advieźli ŭ papraŭčuju kaloniju Vićba Viciebskaj vobłaści. Dva tydni tamu jaho kłali ŭ turemny špital u Miensku, kab padlekavać ad branchitu i padahry. «Vyzdaraŭleńnie» palitviaźnia adbyłosia akurat napiaredadni prezydenckich vybaraŭ.
Ašmiana
15 sakavika źbiralnicu podpisaŭ Tacianu Klimovič aštrafavali na 5 b.v. za vyjaŭleny ŭ padpisnym arkušy falsyfikavany podpis.
17 sakavika zatrymali Piatra Javidoviča: kala domu aktyvista čakali niekalki milicyjantaŭ. Žoncy na telefanavańnie ŭ milicyi skazali, što Javidovič prabudzie tam 4 dni. Za kratami aktyvist abviaściŭ haładoŭku. Jaho špitalizavali, bo maje jazvu straŭnika.
Non-hrata
15 sakavika polskich naziralnikaŭ Vojciecha Barodzič-Smalinskaha j Katažynu Kviatkoŭskuju nie puścili ŭ Biełaruś, choć jany byli akredytavany biełaruskim MZS i mieli vizy.
Na biełaruska-polskaj miažy zatrymali j doŭha nadhladali aŭtamabil Uładzimiera Radzivončyka, aktyvista štabu Milinkieviča ŭ Pružanach, nie puskajučy jaho na radzimu. Radzivončyka dapytali na mytni j paviedamili, što jon fihuruje ŭ kryminalnaj spravie jak abvinavačany. Ad aktyvista vymahali falšyvych źviestak na A.Labiedźku.
Pradstaŭnika polskaj partyi «Prava i spraviadlivaść» Maraka Suskaha, jaki chacieŭ pryjechać naziralnikam na vybary, 17 sakavika nie puścili ŭ Biełaruś. Jaho departavali 18 sakavika zranku, a ŭviečary – hruzinskich parlamentaroŭ, zatrymanych 16 sakavika.
U Horadni 18 sakavika zatrymanyja rasiejskija hramadzianie Volha Harelik i Jakaŭ Šehidevič, jakija pryjechali jak žurnalisty. Ich adpuścili paśla pravierki dakumentaŭ. Rasiejskich demakrataŭ z moładzievaha ruchu «Abarona» Alaksandra Halmakova, Alaksieja Navasiołava, Andreja Chačapurava i Dźmitryja Vołava, jakija pryjechali jak karespandenty hazety «Pravoje dieło», zatrymali 18 sakavika ŭ Homieli j departavali ŭ Rasieju biez tłumačeńnia pryčynaŭ. U hety ž dzień zatrymali pradstaŭnicu mižnarodnaj arhanizacyi «Moładź – hramadzianie śvietu» rasiejku Volhu Ŭłasavu, jakaja prylacieła avijarejsam ź Jekaciarynburhu. U Salihorsku karespandentaŭ rasiejskaj hazety «Pravoje dieło» Ŭładzimiera Ivanova, Alaksandra Bołdyrava i Hienadzia Pankova zatrymali 19 sakavika. Ich vysłali ź Biełarusi, a Ivanova j Bołdyrava jašče j asudzili na štraf u 20 tys.rub.
Unačy z 17 na 18 sakavika na ŭkrainska-biełaruskaj miažy byŭ vysadžany ź ciahnika aktyvist ukrainskaj arhanizacyi «Nacyjanalny Aljans» Rusłan Konieŭ: jaho nakiravali nazad va Ŭkrainu.
U karespandenta «Ukrainskoj haziety» Alaksandra Cynkieviča 19 sakavika na biełaruska-ŭkrainskaj miažy kanfiskavali 750 dalaraŭ, padazrajučy, što jon viazie ich «dla revalucyi».
20 sakavika na akcyi pratestu zatrymany hramadzianie Hruzii Łada Hahijašvili, dziakan Basił Kabachidze, kiraŭnik baptysckaha abjadnańnia Hruzii Małchaz Sanhułašvili.
Na miažy zatrymanaja zdymačnaja hrupa ŭkrainskaha «Novaha kanału», jakaja viartałasia va Ŭkrainu ź Miensku: u žurnalista Michaiła Šamanava i aperatara Siarhieja Darochina kanfiskavali 4 videakasety.
Viciebsk
Na 7 sutak aryštu 16 sakavika zasudzili Valerja Ščukina, jaki pravodziŭ nazirańnie za vybarami: jaho źvinavacili ŭ niecenzurnaj łajancy na siabroŭ kamisii j «nieachajnym vyhladzie» – Ščukin pryjšoŭ na ŭčastak u džynsach. Na vybarčym učastku zatrymali 16 sakavika j Dzianisa Łatyša, jaki razvoziŭ ahitacyjnyja materyjały A.Milinkieviča: niekalki hadzinaŭ u milicyi ciahnułasia raźbiralnictva, jakoje vyśvietliła, što ahitatar nie parušaŭ zakonu.
Na 4 sutak zasudzili Kastusia Smolikava, aktyvista kampanii A.Milinkieviča: jaho źvinavacili ŭ niepadparadkavańni milicyjantam.
Naziralnikam Tacianie i Kanstancinu Sieviaryncam i Ninie Kavalovaj dazvolili nazirać za vybarami na ŭčastku №18 pa videamanitory: na samim učastku im być zabaranili «ŭ suviazi z małoj płoščaj pamiaškańnia» (40 m2). Tolki 17 sakavika kamera była prybranaja z učastku, i naziralnikaŭ zarehistravali narmalnym čynam.
17 sakavika ŭviečary zatrymali Chrystafora Žalapava: milicyjanty vykazali pretenzii da jahonaha aŭtamabila.
18 sakavika milicyjanty praviali niesankcyjavany pieratrus domu ŭ aktyvista Siarhieja Sałodkina ŭ jahonuju adsutnaść: spasłalisia na syhnał ad susiedziaŭ, što tut razdajuć «zabaronienuju hazetu». Znajšli 250 asobnikaŭ krajaznaŭčaha vydańnia «Poklič voli», jakoje Sałodkin vydaje ŭ dazvolenych zakonam pamierach (299 asobnikaŭ) i biaspłatna raspaŭsiudžvaje.
Naziralnika Siarhieja Parsiukieviča zatrymali 19 sakavika, 20 sakavika jon byŭ asudžany na 5 sutak i za kratami abviaściŭ haładoŭku.
Siabra KCHP–BNF Siarhieja Kušniarova, jaki chacieŭ zabrać svoj biuleteń, zhodna z Narodnym hałasavańniem, 19 sakavika pasadzili za kraty. Na jaho skłali pratakoły za drobnaje chulihanstva i niepadparadkavańnie rabotnikam milicyi. Sud pieraniesieny na 4 krasavika.
Žodzina
Na 7 sutak za drobnaje chulihanstva 16 sakavika asudžanyja moładzievyja aktyvisty Siaržuk Hudzilin, Jaŭhien Vaŭkaviec i Aleś Čyrejka. U kvatery S.Hudzilina adbyŭsia pieratrus: u pošukach «kampramatu» milicyjanty ŭzłamali padłohu ŭ kvatery j razabrali na častki šafu.
U hety ž dzień na 7 sutak zasudzili 17 sakavika Źmitra Čartkova: jaho pryvieźli ŭ pastarunak z domu i skłali pratakoł pra niepadparadkavańnie patrabavańniam rabotnika milicyi.
Barysaŭ
Papiaredžańnie ad prakuratury atrymaŭ 16 sakavika Leŭ Marholin: jamu pahražali sudovaj adkaznaściu, kali adbudziecca zaplanavanaja na hety dzień sustreča Milinkieviča z vybarcami. Na nastupny dzień jaho zasudzili na 10 sutak.
20 sakavika na vyjeździe z Barysava zatrymanyja Viktar Harbačoŭ, Anatol Biakasaŭ i Ludmiła Ščarbakova, jakija jechali ŭ Miensk z materyjałami niezaležnaha nazirańnia za vybarami.
Pieratrusy ŭ Łuńnie
U miastečku Łunna Mastoŭskaha rajonu 16 sakavika z sankcyi prakurora adbylisia pieratrusy ŭ damoch aktyvistaŭ – Uładzimiera Bryć- ka j Lavona Karpoviča (abodva – KCHP–BNF) i deputata rajsavietu Alaksandra Pudaŭkina (PKB): kanfiskavali systemnyja bloki kamputaraŭ, drukavanyja palityčnyja materyjały za niekalki hadoŭ. Milicyjanty zajavili, što pieratrusy adbyvajucca ŭ ramkach śledztva pa niezarehistravanaj hramadzkaj arhanizacyi «Partnerstva».
Štraf za ŭlotki
Padčas raspaŭsiudu ŭlotak «Chopić!» u vioscy Vaładźko Hłybockaha rajonu 16 sakavika milicyjanty zatrymali miascovaha aktyvista Jurja Buku: jaho aštrafavali na 5 b.v.
Naloty na hramadzkija arhanizacyi
Zranku 16 sakavika milicyjant i čałaviek u cyvilnym sprabavali ŭvarvacca ŭ pamiaškańnie, dzie mieściacca aršanskija demakratyčnyja aktyvisty, u tym liku pradstaŭniki źlikvidavanaha ŭładami Centru imia Fiłona Kmity. Aršanskija aktyvisty, jakija nie puścili pravaachoŭnikaŭ, padazrajuć, što tyja mielisia kanfiskavać kamputarnuju techniku.
U Miensku 18 sakavika adbylisia naloty supracoŭnikaŭ siłavych strukturaŭ na ofisy moładzievych arhanizacyjaŭ. Na štab-kvatery niezarehistravanaha «Maładoha frontu» supracoŭnikami KDB byli zatrymanyja Barys Harecki, Źmicier Chviedaruk, Alena Ihnacik, Ivan Šyła: ich nazvali padazravanymi ŭ kryminalnaj spravie pa prynaležnaści da niezarehistravanaj arhanizacyi, jakaja parušaje pravy hramadzianaŭ. Pozna ŭviečary taki ž samy nalot adbyŭsia na ofis niezarehistravanaha «Zadzinočańnia biełaruskich studentaŭ»: zatrymali Vasila Lepieša j Ivana Marozava. 20 sakavika ich asudzili: Marozaŭ – 5 sutak, Lepieš – 3 sutak, Harecki – 7 sutak.
U Miensku ŭ budynku, dzie znachodzicca ofis niedziaržaŭnaha Prafsajuzu rabotnikaŭ radyjoelektronnaj pramysłovaści (REP), sapery šukali «vybuchovuju pryładu». U ofisie praviali pieratrus. Biez tłumačeńnia pryčynaŭ zatrymali prafsajuznaha aktyvista, žurnalista Ivana Romana. Žurnalistu prystaŭlali da patylicy pistalet, patrabujučy pryznacca ŭ špijanažy. Potym vyvieźli ŭ kajdankach u Lidu, dzie aštrafavali na 2 b.v. «za brydkasłoŭje».
19 sakavika adbyŭsia niesakcyjavany pieratrus u ofisie niezarehistravanaj «Asamblei niaŭradavych arhanizacyjaŭ»: milicyjanty šukali vybuchoŭku i zbroju.
Pieraśled hazetaŭ
Hazetu PKB «Tovariŝ» (85 600 as.) aryštavali 17 sakavika mienskija milicyjanty. Rešta 200-tysiačnaha nakładu była ŭ haražy lidera partyi Siarhieja Kalakina, jaki admoviŭsia adkryvać pamiaškańnie biaz sankcyi na pieratrus. U adkaz milicyjanty apiačatali haraž. Adzinaja pretenzija milicyjantaŭ – razhruzka nakładu hazety nie na jurydyčnym adrasie redakcyi.
Unačy na 17 sakavika na rasiejskaj miažy zatrymany 50-tysiačny nakład hazety «Narodnaja Vola», jaki vieźli z Smalensku. Numar dastaŭleny ŭ Viciebskuju milicyju.
Vyšejšy haspadarčy sud 17 sakavika likvidavaŭ niedziaržaŭnuju hazetu «Zhoda» na patrabavańnie Minjustu. Rašeńnie sudździa Aksana Michniuk pryniała, nie zvažajučy, što hazeta jašče mieła čas zhodna z zakanadaŭstvam abskardzić apošniaje papiaredžańnie Minjustu.
Hałoŭnaha redaktara «Miestnoj haziety» ŭ Vaŭkavysku Andreja Šantaroviča zatrymali 18 sakavika na vulicy. Nastupnaha dnia asudzili na 3 sutak.
Homiel
Moładzievy aktyvist Siarhiej Siamionaŭ, asudžany na 10-dzionny aryšt u adnym z homielskich izalataraŭ za «abrazu čynoŭnika», 17 sakavika abvieściŭ haładoŭku.
18 sakavika asudzili Jurasia Zacharanku (7 sutak) i Ŭładzimiera Šycikava (10 sutak). U hety ž dzień zatrymali Andreja Tołčyna, jak tolki jon vyjšaŭ z kvatery, i Ŭładzimiera Kacoru, jakoha 20 sakavika asudzili na 8 sutak (abvinavačańnie – bojka na vulicy).
Žłobin
Na moładzievaha aktyvista Edvarda Zielankova 17 sakavika raspačali kryminalnuju spravu za chulihanstva (palityčnyja hrafici) i stvareńnie niezarehistravanaj hramadzkaj arhanizacyi. Za napisańnie hrafici jon byŭ zatrymany na 3 sutak, vyjšaŭ na volu 16 sakavika: adpuścili na čas śledztva.
Ščučyn
U pracoŭnym kabinecie doktara Ščučynskaha rajonnaha špitalu Vasila Biaźmiena 17 sakavika adbyŭsia pieratrus: zabrali padšyŭku starych hazetaŭ i Kanstytucyju SSSR. Jaho aryštavali na 10 sutak za «niecenzurnuju łajanku ŭ hramadzkim miescy».
Smurhoni
17 sakavika atrymali pa 5 sutak aktyvisty kampanii A.Milinkieviča Aleś Dzierhačoŭ i Jury Kutuzaŭ: ich abvinavacili ŭ niepadparadkavańni rabotnikam milicyi. Dzierhačova sudzili pa zakančeńni pracoŭnaha dnia: prysud byŭ abvieščany ŭ 19.40.
Kamianiec
17 sakavika milicyjanty naładzili pieratrus u Mikałaja Babrova, aktyvista štabu Milinkieviča.
Vialejka
Aktyvista AHP Uładzimiera Malarčuka 17 sakavika vyklikaŭ staršynia vybarčaj kamisii, jaki da hetaha admaŭlaŭsia navat rehistravać jaho naziralnikam. Aktyvist, da jakoha dajšli čutki, što na jaho chočuć raspačać kryminalnuju spravu (ci to za «zmovu suprać ułady», ci to za «teraryzm»), pakinuŭ Vialejku.
12 sakavika biez pryčyny zatrymali padletkaŭ Alaksandra Butera, Hannu Vałyniec i Vadzima Zajca, jakija stajali ŭviečary na prypynku: jany admovilisia pakazać milicyjantam źmieściva svaich sumak. U pastarunku ich pratrymali 4 hadziny.
Vorša
Moładzievamu aktyvistu Iharu Kaźmierčaku 17 sakavika pryjšoŭ pazoŭ u vajenkamat na 20 sakavika – treci ad pačatku hodu. Jamu pahražaje zvalnieńnie z pracy. Vykładčyk škoły mastactvaŭ uziaŭ adhuł na 18–19 sakavika i źjechaŭ z horadu. Adnak dyrektar škoły zatelefanavaŭ na mabilny, zajaviŭ, što nie adpuskaŭ z pracy, dy pryhraziŭ zvalnieńniem.
18 sakavika z pracy byŭ zvolnieny nastaŭnik Roska-Sialeckaj škoły Aršanskaha rajonu Ihar Kryšton. Jaho źvinavacili ŭ prahułach. Aktyvist adprasiŭsia z pracy dla ŭdziełu ŭ vybarčaj kampanii. Dyrektar škoły adpuściŭ jaho, ale paźniej zajaviŭ, što musić zvolnić: taki zahad pryjšoŭ z rajonnaha adździełu adukacyi.
Mazyr
17 sakavika zatrymany Ŭładzimier Cielapun. Nastupnaha dnia jaho j Dzianisa Vaniuškina, zatrymanych padčas razdačy prahramy A.Milinkieviča, asudzili na 5 sutak – za «niepadparadkavańnie supracoŭnikam milicyi».
Uzda
Viktara Kryvala vyklikali ŭ rajonnuju prakuraturu za jahonyja vykazvańni pra falsyfikacyju vynikaŭ vybarčych kampanijaŭ.
Haradok
Na vybarčym učastku zatrymany 17 sakavika deputat rajsavietu, naziralnik Leanid Haravy, aktyvist kamandy A.Kazulina. Jaho źvinavacili, što «pieraškadžaŭ pracy vybarčaj kamisii». Sud u vychadny dzień, 18 sakavika, aštrafavaŭ jaho na 5 b.v.
Lelčycy
Dadomu da Mikałaja Haŭrylenki, aktyvista Milinkieviča, 13 sakavika pryjšli ŭnačy milicyjanty, pakinuli pozvu da prakurora.
Masty
Na 15 sutak aryštu asudžanyja 17 sakavika aktyvisty z Mastoŭ Źmicier Kuchiel i Źmicier Panasik.
Škłoŭ
18 sakavika zatrymali aktyvista Alaksandra Ščarbaka: u chacie adbyŭsia niesankcyjavany pieratrus, znajšli staryja numary niezarehistravanaj hazety «Škłoŭskija naviny» i nalepki. Z Ščarbaka sprabavali ŭziać padpisku pra niavyjezd.
Astraviec
18 sakavika na 5 sutak aryštavali Mikałaja Aŭłasieviča: na vulicy da jaho padyšli milicyjanty j prapanavali prajści ŭ pastarunak. Kali jon spytaŭ, navošta, jaho abvinavacili ŭ niepadparadkavańni milicyjantam.
Žytkavičy
17 sakavika zatrymanyja Michaił Kozieł i Mikałaj Rumiancaŭ: u ich kanfiskavali aficyjnyja drukavanyja materyjały. Milicyjanty kažuć, što paśla hetaha adpuścili aktyvistaŭ, ale dadomu jany nie abjavilisia j telefonnaj suviazi ź imi niama.
Krupki
U svajoj chacie ŭ miastečku Bobr 18 sakavika a 17-j byŭ zatrymany mastak Aleś Puškin.
Vaŭkavysk
Ad 17 sakavika pačałosia dziažurstva milicyi kala damoŭ miascovych aktyvistaŭ štabu Milinkieviča – Mikałaja Aksamita i Alaksandra Baradaŭkina, jakoha papiaredzili, što zatrymajuć, kali jon pasprabuje vyjechać z horadu.
Łuniniec
18 sakavika zatrymali za «drobnaje chulihanstva» Vitala Karatyša.
Horki
Eduarda Brokarava milicyjanty spynili 18 sakavika j ahledzieli jaho sumku. Paśla hetaha ŭ dvary domu, dzie žyvie aktyvist, byŭ vystaŭleny post.
Vierchniadźvinsk
Alaksieja Šafrana (v.Vałyncy) 15 sakavika aryštavali na 15 sutak: jon zrabiŭ palityčnyja hrafici dy pastaviŭ pad imi svajo proźvišča.
Lepiel
Aleha Tyčynu sprabavali zatrymać 19 sakavika za toje, što zabraŭ biuleteń i pajšoŭ z vybarčaha ŭčastku. Kali A.Tyčyna, Alaksandar Malaŭka i Viačasłaŭ Małachanaŭ pajechali paśla vybaraŭ u Miensk, ich zatrymali.
Słonim;
Naziralnika Alesia Masiuka zatrymali 19 sakavika na vybarčym učastku, zajaviŭšy, što jon pačaŭ bojku. 20 sakavika jaho dvojčy vazili ŭ sud, ale štoraz adpuskali.
Haradzienskija sudy
21 sakavika ŭ Horadni asudzili zatrymanych napiaredadni «ŭdzielnikaŭ niesakcyjavanaha šeścia»: pa 10 sutak aryštu atrymali Piatro Anisimovič, Kiryła Žałudok, žurnalisty Andžej Pisalnik, Ihar Bancar; na 7 sutak asudžany Jury Klimčuk. Zatrymali Jaŭhiena Lasockaha, jaki tolki vyjšaŭ u hety dzień paśla 5-dzionnaha aryštu. Andrej Panasik znachodzicca pad chatnim aryštam: na jaho raspačali kryminalnuju spravu za prynaležnaść da niezarehistravanaj hramadzianskaj inicytyvy «Partnerstva».
Tadevuša Havina vyklikali 21 sakavika ŭ Haradzienski RAUS: jaho sprabujuć abvinavacić u padpale viaskovaj kramy. Kali śledčy daviedaŭsia, što da milicyi pryjechała i zdymačnaja hrupa Polskaj televizii, jon nia staŭ sustrakacca z Havinym.
Sutki dla pratestanta
5 sutak aryštu pryznačyŭ 21 sakavika sudździa Maskoŭskaha rajonnaha suda Miensku Ŭładzimier Aŭdziejenka pratestantu Alaksieju Šeinu, abvinavačanamu ŭ niecenzurnaj łajancy.
Masavyja aryšty
21 sakavika ŭ Miensku adbylisia sudy nad zatrymanymi ŭnačy i ŭdzień demakratyčnymi aktyvistami. Niekatorych zatrymali kala namiotavaha haradka, niekatorych – kali jany z sumkami išli na plac, kab pieradać pradukty mitynhoŭcam.
Prysudy byli žorstkimi. Aštrafavali Volhu Dziemčanku (žurnalistka hazety «Odnako») – na 20 b.v. Za kraty na 10 sutak patrapili Daniił Pažaraŭ, Taciana Choma, Hiec, Łuhin, Lachava, Pinčuk, Uładzimier Kaŭbaska, Aleh Haŭryłaŭ, Lavon Malinoŭski, S.Babicki, Volha Čarnych, Andrej Cieraškoŭ, Jury Sidun, Kostryčaŭ, S.Kardaš, Vital Alejnik, Hrybovič, Anuškievič, Łučyna, Jury Čavusaŭ, Alaksandar Dabravolski, Volha Kuźmič. Pa 12 sutak atrymali Alaksiej Janukievič i Andrej Małaš. Na 15 sutak asudžanyja Valer Mazynski, Anatol Labiedźka, Hrabavy, Uładzimier Žaraŭ, Andrej Dzienisievič, Aleh Žłutka. Kaciarynu Lehizu pasadzili na 3 sutak. Paśla sudu nad Labiedźkam u Dom pravasudździa nie puścili advakata Alaksandra Halijeva, jaki vyjšaŭ pierapalić.
Prysudaŭ zastalisia čakać zatrymanyja Źmicier Fiedarovič, Kanstancin Viktarovič, Kanstancin Rutkoŭski, Piatro Cierašenkaŭ, Ražkoŭ, Ściepancoŭ, Andrej Ściapanaŭ, Siarhiej Ściapanaŭ, Uścinaŭ, Vajda, Biruk, Žaŭtok, Šaŭčuk, Hurko, Viechtarovič, Antanina Hulko, Kanstancin Čykałaŭ, Piatro Dudanovič, Nasta Kavalova, Arciom Zołataŭ, Alaksiej Valajeŭ, Źmicier Šaŭčenka, Valery Astravierchaŭ, Illa Kulbicki, Mikałaj Miacielski, Alaksandar Łyčaŭka, Siarhiej Pachodnia, Vadzim Aleksandrovič, niepaŭnaletni Alaksiej Papokaŭ, Jury Vinahradaŭ, Siarhiej Marčyk, Uładzimier Kučvalski, Alena Miadźviedzieva, Michaił Ułasaŭ. Alaksandra Kaśko 20 sakavika źbili, zabrali pašpart i adpuścili. Unačy na 21 sakavika razam z Zvonam Svabody na ŭsiu noč byli zatrymanyja skulptar Aleś Šaternik i piśmieńnik Aleś Paškievič.
Udzień zatrymali deputata polskaha siejmu Jarasłava Jahiełu: pavodle papiaredniaj infarmacyi, jaho vinavaciać va ŭdziele ŭ niesankcyjavanym mierapryjemstvie. Zatrymanyja j estonskija naziralniki Eryk Mora i Tarma Lecht.
Uviečary 21 sakavika pa darozie na płošču zatrymany dyrektar kaviarni «Londan» Jury Vinahradaŭ.
Viciebskija zatrymańni
21 sakavika ŭ Viciebsku zatrymali kala 15 demakratyčnych aktyvistaŭ, jakija ŭdzielničali ŭ akcyi pratestu. Jak paviedamiŭ zatrymany Siarhiej Sierabro pa mabilnym telefonie z pastarunku, udzielnikaŭ akcyi zavieźli ŭ adździaleńnie milicyi, nie vykazaŭšy nijakich abvinavačańniaŭ. Z Zatrymanych znajomy jamu byŭ tolki Ŭład Tokaraŭ, astatnija – nieviadomyja.
Preventyŭna milicyjanty zatrymali Chrystafora Žalapava: kala kaviarni «Ŭschod» jamu zajavili, što jon padobny da złačyncy, jaki znachodzicca ŭ vyšuku. Z hetymi ž tłumačeńniami byli zatrymanyja demakratyčnyja aktyvisty Vadzim Barščeŭski j Alaksiej Haŭrucikaŭ.
Apisali majomaść BCHK
U ofisie Biełaruskaha Chelsynskaha kamitetu 21 sakavika adbyŭsia vopis majomaści. Prezydyjum Viarchoŭnaha haspadarčaha sudu Biełarusi naličyŭ padatkaŭ i štrafaŭ pravaabarončaj arhanizacyi prykładna ŭ pamiery 75 tys. dalaraŭ za dapamohu, atrymanuju pavodle prahramy TACIS.
Prafsajuzny aktyvist za kratami
U Baranavicki izalatar časovaha ŭtrymańnia 19 sakavika patrapiŭ aktyvist Biełaruskaha niezaležnaha prafsajuzu z Horadni Siarhiej Lipnicki. Jon z tavaryšami jechaŭ u Miensk elektryčkaj, paśla pravierki dakumentaŭ jaho zatrymali j asudzili na 3 sutak. Pryčynu supracoŭniki Baranavickaj upravy milicyi nazvać admaŭlajucca.
Babrujsk
Aktyvista Źmitra Doŭhala ŭviečary 18 sakavika zatrymali milicyjanty, zavieźli ŭ pastarunak, dzie pratrymali amal 2 sutak, abvinavaciŭšy ŭ niecenzurnaj łajancy. U toj samy dzień zatrymali Ihara Chodźku, aktyvista BNF.
Śvietłahorsk
Natallu Bordak, źbiralnicu podpisaŭ za Milinkieviča, 21 sakavika vymusili zvolnicca pa ŭłasnym žadańni ź Śvietłahorskaha centru sacyjalnaha absłuhoŭvańnia nasielnictva.
Bieraście
Na 15 sutak 21 sakavika asudžany Ivan Spasiuk, aktyvist kamandy A.Kazulina.
