Pasoł Eryksan palacieŭ, ale abiacaŭ viarnucca.
Plušavyja miadźviedziki ź biaskryŭdnaj cacki pieratvarylisia ŭ simvał salidarnaści ź biełarusami. Fota Siarhieja Hudzilina.
Fatohraf Anton Surapin pa spravie plušavych miadźviedzikaŭ adsiadzieŭ u minskaj «amierykancy» miesiac niezrazumieła za što. Ani prabačeńniaŭ, ani kampiensacyi nie atrymaŭ. Fota Siarhieja Hudzilina.
Ryełtar Siarhiej Bašarymaŭ taksama bolš za miesiac pravioŭ u «amierykancy». Fota Jeŭraradyjo.
Pravaabaronca Aleś Bialacki znachodzicca za kratami ad 4 žniŭnia 2011 h. Jon asudžany na 4,5 hoda. Fota Siarhieja Hudzilina.
Eks-kandydat u prezidenty Mikałaj Statkievič taksama zastajecca za kratami. Fota Siarhieja Hudzilina.
Eks-kandydat u prezidenty Andrej Sańnikaŭ pierabraŭsia ŭ Łondan. Fota Guardian.
Žurnalist Andrej Pačobut iznoŭ byŭ abvinavačany ŭ paklopie na prezidenta.
Aleh Stachajevič (źleva) dabiŭsia palohki dla rabočych «Hranita». Fota Siarhieja Hudzilina.
Nina Bahinskaja nieadnarazova vychodziła ź bieł-čyrvona-biełym ściaham na centralnyja vulicy Minska. Fota radyjo «Svaboda».
Maci hoda — Luboŭ Kavalova. Fota Siarhieja Hudzilina.
Historyk hoda — Andrej Čarniakievič, suaŭtar knihi «Hrodnaznaŭstva». Fota Budzma.org.
U biznesmiena Marata Novikava dziaržava zabrała «Kamunarku» i «Spartak».
Hadzińnik Michaiła Miaśnikoviča kaštuje 37 tys. dalaraŭ. Fota Antona Matolki.
Pieramožca «Jeŭrabačańnia» Łaryn (Šviecyja) u Minsku sustrełasia z žonkaj Alesia Bialackaha Natallaj Pinčuk, a potym, u siabie doma, sfatahrafavałasia ŭ majcy z vyjavaj pravaaabaroncy. Fota z fejsbuku Łaryn.
Alena Łanskaja pieramahła z druhoj sproby na biełaruskim adbory na «Jeŭrabačańnie». Fota BiełTA.
Razvod hoda — Anžalika Ahurbaš. Fota STV.
Spartoŭka hoda — Viktoryja Azaranka, pieršaja rakietka śvietu.
Feliks Baŭmhartner (Aŭstryja) skoknuŭ z vyšyni 39 kiłamietraŭ.
Dypłamat hoda — Stefan Eryksan
U žniŭni pasłu Šviecyi Stefanu Eryksanu biełaruskaje MZS nie padoŭžyła akredytacyju. Dypłamatu ŭ terminovym paradku daviałosia źbirać valizy, viartacca ŭ Stakholm. Ale palubili jaho biełarusy zusim nie za heta. Eryksan bliskuča vałodaje biełaruskaj movaj, pierakładaje tvory našaj litaratury, spryčyniaŭsia da šmatlikich kulturnych i hramadskich padziej. Ciapier Eryksan pa-raniejšamu nie zabyvaje pra Biełaruś. Navat svaju staronku ŭ Fejsbuku viadzie pa-biełarusku.
Cacka hoda — plušavy miadźviedzik
Vyhnańniu Eryksana papia¬redničała dziorzkaja akcyja, zładžanaja pry padtrymcy rekłamnaha ahienctva Studio Total. Tumas Mazeci i Hanna Lina Frej «bambardavali» z samalota Ivianiec i Minsk plušavymi miadźviedzikami, da jakich byli prymacavanyja cydułki ź infarmacyjaj pra palitviaźniaŭ i parušeńni pravoŭ čałavieka. Miłyja dziciačyja cacki raptoŭna stali kramolnymi. Za zdymki ź miadźviedzikami zatrymlivali žurnalistaŭ. A čynoŭniki Račkoŭski i Pachmiełkin navat stracili pasady, choć uparta admaŭlali fakt niezakonnaha pierasiačeńnia miažy.
Fatohraf hoda — Anton Surapin, ryełtar hoda — Siarhiej Bašarymaŭ
Hetyja chłopcy prabyli bolš za miesiac u turmie KDB pa abvinavačańni ŭ dapamozie šviedam pa pierasiačeńni miažy. Adzinaje, što ich abjadnoŭvała sa «spravaj miadźviedzikaŭ»: Surapin na svaim sajcie pieršy vystaviŭ zdymki plušavych cacak, a Bašarymaŭ — niekali zdavaŭ šviedam kvateru. U vyniku abodvuch chłopcaŭ adpuścili, status padazravanych nie źniali, ale i nijakich pracesualnych dziejańniaŭ nie pravodziać.
Hieroi hoda — Aleś Bialacki, Mikoła Statkievič i inšyja palitviaźni
U niavoli zastajecca 13 palitviaźniaŭ. Tyja ludzi, jakija canoj svajoj voli, admaŭlajucca pisać prašeńni ab pamiłavańni na imia Łukašenki. Heta Mikoła Statkievič, Aleś Bialacki, Pavieł Sieviaryniec, Źmicier Daškievič, Eduard Łobaŭ, Mikoła Aŭtuchovič, Vasil Parfiankoŭ, Alaksandr Małčanaŭ, Mikałaj Dziadok, Alaksandr Franckievič, Ihar Alinievič, Jaŭhien Vaśkovič, Arciom Prakapienka.
Emihrant hoda — Andrej Sańnikaŭ
Andrej Sańnikaŭ u krasaviku vyjšaŭ z turmy. Praz paŭhoda, u kastryčniku, stała viadoma, što eks¬kandydat u prezidenty atrymaŭ palityčny prytułak u Vialikabrytanii. Vyjechali taksama paplečniki Sańnikava pa «Chartyi-97»: Źmicier Bandarenka, Alaksandr Atroščankaŭ, Mikałaj Chalezin, Natalla Radzina.
Sioleta ź Biełarusi taksama byŭ vymušany źjechać hałoŭny redaktar časopisa Arche Valer Bułhakaŭ.
Žurnalist hoda — Andrej Pačobut
Hrodzienski karespandent polskaj «Haziety Vyborčaj» užo adsiedzieŭ u turmie za paklop na prezidenta.
Sioleta byŭ paŭtorny najezd. Navat dziesiać sutak Andrej pravioŭ u SIZA. Vidać, damahalisia, kab Pačobut pisaŭ na bolš niejtralnyja temy. Nie zapałochali. Piaro Pačobuta zastajecca takim sama vostrym.
Salidarnaść hoda — chłopcy z «Hranita»
Rabočyja pradpryjemstva «Hranit» prajavili zajzdrosnuju salidarnaść. Chaj niekatorych, jak ich lidara Aleha Stachajeviča, zvolnili z pracy, ale chłopcy ŭsio ž dabilisia značnaha palapšeńnia staŭleńnia kiraŭnictva da rabočych i pavyšeńnia zarobkaŭ.
Ściahanosiec hoda — Nina Bahinskaja
Hetaja minskaja piensijanierka nieadnarazova prosta brała bieł-čyrvona-bieły ściah i vychodziła na centralnyja vulicy Minska. 19 śniežnia hetkim čynam jana adzinaja ŭšanavała hadavinu Płoščy. Padniać ruku na spn. Bahinskuju śpiecnazaŭcy nie advažvajucca, tolki ściahi zabirajuć, ale spadarynia Nina ŭsio adno vychodzić.
Maci hoda — Luboŭ Kavalova
Inšaja na jaje miescy ŭžo daŭno apuściła b ruki, a Luboŭ Kavalova praciahvaje dabivacca, kab sprečnyja momanty ŭ spravie Uładzisłava Kavalova byli pierahledžanyja, narešcie, kab joj addali cieła syna, rasstralanaha pa spravie vybuchu ŭ minskim mietro.
Historyk hoda — Andrej Čarniakievič
Sioleta śviet pabačyła cudoŭnaja kniha «Hrodnaznaŭstva», svojeasablivaja encykłapiedyja žyćcia horada śviatoha Hubierta. I pieršapačatkova jana była vydatna acenienaja nie tolki niezaležnym hramadstvam, ale i miascovymi čynoŭnikami. Praŭda, praź niekalki miesiacaŭ u Hrodnie pačałosia «palavańnie na viadźmarak». Adnaho z aŭtaraŭ «Hrodnaznaŭstva», historyka Andreja Čarniakieviča, zvolnili z univiersiteta. Vyhnali za što? Za toje, što jakasna zrabiŭ svaju pracu.
Izia Sihizmundavič hoda — Marat Novikaŭ
U biznesmiena Marata Novikava dziaržava zabrała dva kandytarskija pradpryjemstvy — «Kamunarku» i «Spartak». Łukašenka kazaŭ, što daviali lidaraŭ vytvorčaści da vartaha žalu stanu. Dastałosia i asabista ŭłaśniku, jakoha Łukašenka nazvaŭ «Iziem Sihizmundavičam». Kab Novikaŭ byŭ u Biełarusi, a nie ŭ ZŠA, to aryštu, vidać, nie paźbieh by.
Hadzińniki hoda — Kirył, Miaśnikovič
U časie vizitu patryjarcha RPC va Ukrainu žurnalisty sfatahrafavali hadzińnik Kiryła. Vyśvietliłasia, što kaštuje jon 30 tysiač jeŭra. Razharelisia sprečki, ci moža duchoŭnaja asoba vałodać takimi bahaćciami. Zrešty, pryciahnuŭ uvahu hramadskaści hadzińnik nie tolki patryjarcha, ale i premjer¬ministra Biełarusi Michaiła Miaśnikoviča, sfatahrafavany padčas ekanamičnaha forumu. Kiraŭnik urada maje hadzińnik za 37 tysiač dalaraŭ — daražejšy, čym u Łukašenki.
Śpiavačka hoda — Łaryn
Jašče adna naminacyja sioletniaha topa sychodzić u Šviecyju. Śpiavačka Łaryn pieramahła na «Jeŭrabačańni» ŭ Baku. Z šerahu astatnich popzorak jaje vyłučaje nieabyjakavaść da parušeńnia pravoŭ čałavieka. Jašče padčas festu jana sustrakałasia z azierbajdžanskaj apazicyjaj. Kali ž šviedka pryjechała ŭ Minsk, to spatkałasia z žonkaj Alesia Bialackaha Natallaj Pinčuk i sfatahrafavałasia ŭ majcy z vyjavaj pravaabaroncy. Pra spravu Bialackaha, dziakujučy hetamu, daviedałasia šmat ludziej.
Dubl-dva hoda — Alena Łanskaja
Śpiavačka taki pajedzie na «Jeŭrabačańnie». Chaj i z druhoha razu. Pieršy adbor u lutym vyliŭsia ŭ vializny skandał zza falsifikacyi vynikaŭ. U spravu daviałosia asabista ŭmiašacca Łukašenku, jaki ŭščučvaŭ «vinavatych». U Baku pajechali «Łajtsaŭnd». Praŭda, zorak ź nieba tam chłopcy nie chapali. U śniežni ž Łanskaja biez asablivaha rozhałasu dabiłasia svajho — vyjhrała finał nacyjanalnaha adboru na «Jeŭrabačańnie». I nijakich skandałaŭ!
Razvod hoda — Anžalika Ahurbaš
Śvieckaja chronika ŭ Biełarusi jość! Kolki tysiač ludziej z zamirańniem serca sačyli za padrabiaznaściami razvodu popdzivy Anžaliki i jaje muža, miasnoha mahnata Ahurbaša! Kamu zastaniecca majomaść pry padziele, dzie budzie žyć Lika, ci raźviančaje ich Fiłaret? Takija naviny adrazu rabilisia samymi čytanymi ŭ biełaruskim internecie.
Spartsmienka hoda — Viktoryja Azaranka
Redka biełarusy dasiahajuć pośpiechaŭ u «elitnych» vidach sportu. Viktoryja tut — adno ź niamnohich vyklučeńniaŭ. Sioleta tenisistka ŭpieršyniu pieramahła ŭ turniry «Vialikaha šlema», stała pieršaj rakietkaj śvietu i vyjhrała dva miedali Alimpijady (u adzinočcy i ŭ pary). Praŭda, ajčynnych žurnalistaŭ Viktoryja zusim nie pieścić, daje intervju tolki zamiežnikam.
Pytańniečka hoda — Viktoryja Papova i Źmicier Łukašuk
Telefanavańnie žurnalista «Jeŭraradyjo» Źmitra Łukašuka da siabra žury nacyjanalnaha adboru na «Jeŭrabačańnie», supracoŭnicy «Sovietskoj Biełoruśsii» Viktoryi Papovaj, narabiła šumu. Na biaskryŭdnaje «pytańniečka», za kaho hałasavała Papova na «Jeŭrabačańni», žurnalistka adkazała: «Jak ža ja vas lublu, biełarusaŭ… Nienavidžu! Nienavidžu!» Potym spadarynia Papova apraŭdvałasia, što hetaja fraza nie tyčycca biełarusaŭ, ale chto ž joj pavieryŭ. Ludzi baluča reahujuć na abrazy movy ci nacyjanalnaj hodnaści.
Tryumf hoda — Fieliks Baŭmhartner
43-hadovy aŭstryjski parašutyst prademanstravaŭ, što čałaviek zdolny na mnohaje. Biasstrašny mužčyna skoknuŭ z parašutam z vyšyni 39 kiłamietraŭ, sa strataśfiery. Chutkaść jahonaha padzieńnia pieravysiła chutkaść huku. Za skačkom Baŭmhartnera sačyli anłajn 8 miljonaŭ čałaviek pa ŭsim śviecie.
