Miž tym palitołahi z krain Zachodniaj Jeŭropy i ZŠA, da jakich źviarnulisia pa kamientary karespandenty BNS, byli nastrojenyja bolš skieptyčna i kazali, što nie vierać u hety prajekt.
Udzielniki sustrečy ekśpiertaŭ u halinie zamiežnaj palityki i palityki biaśpieki, što prachodzić ŭ Trakai, skazali, što
bolš za ŭsio jany ciapier čakajuć, jaki šlach — intehracyju ŭ ES abo ŭ stvaranuju Rasijaj strukturu — abiare Ukraina.
«Nam viadoma, što hetyja pracesy iduć, nam viadoma, što jość ambicyi stvaryć Jeŭrazijski sajuz. Kali niechta ličyć, što heta niejkaja hučnaja palityčnaja zajava, to, na maju dumku, jany pamylajucca», — skazaŭ žurnalistam Linkiavičus paśla zaviaršeńnia ŭ Trakai tradycyjnaj «Śniežnaj sustrečy».
Jeŭrazijski mytny sajuz (JEMS), u jaki ciapier uvachodziać Rasija, Biełaruś i Kazachstan, u apošnija hady staŭ adnym z pryjarytetaŭ Maskvy. Rasija chacieła b, kab da 2015 hoda jon pieraros u Jeŭrazijski ekanamičny sajuz.
Ciapier u kamisii pa spravach JEMS pracuje bolš za tysiaču čałaviek, letaś prystupiŭ da pracy sud JEMS.
Niekatoryja ahladalniki nazyvajuć heta vyklikam prajektu ES «Uschodniaje partniorstva», tamu što ŭschodnim susiedziam ES daviadziecca vybrać adzin z hetych šlachoŭ.
Były ministr abarony Polščy, čalec sienata Polščy Bohdan Klich nazvaŭ Jeŭrazijski sajuz pierš za ŭsio palityčnym prajektam, z dapamohaj jakoha Maskva imkniecca prademanstravać svoj upłyŭ.
«Ja b nie staŭ zališnie raździmać kancepcyju Jeŭrazijskaha sajuza. U mianie ŭražańnie, što heta ŭ bolšaj stupieni palityčny prajekt, choć u jaho jość i ekanamičnaje vymiareńnie», — skazaŭ Klich.
Na jaho dumku, kankurencyju pamiž Maskvoj i Bruselem najbolš prykmietna adčuje Ukraina.
Miž tym pradstaŭnik niamieckaha Fondu Maršała Kanstanc Štelcenmiuler na pytańnie, ci jość prajekt Jeŭrazijskaha sajuza vyklikam dla Zachadu i rehijonu Uschodniaj Jeŭropy, adkazała: «Nie, nie dumaju».
«Heta rasijskaja imitacyja zachodnich strukturaŭ biez razumieńnia jak narmatyŭnaj kultury hetych struktur, tak i kantekstu.Tamu ja nie dumaju, što heta realna ŭ niešta vyljecca. Nie dumaju, što ŭ jaho (sajuza) jość budučynia», — skazała hiermanski ekśpiert.
«Sutnaść u tym, što my bolš nie žyviem u pieryjad chałodnaj vajny, i siońnia navat mahutnyja krainy (a Rasija ŭsio jašče mahutnaja kraina) pavinnyja ŭmieć pierakonvać, inšymi słovami, jany majuć patrebu ŭ miakkaj mocy. Miakkaja moc Rasii abmiežavanaja navat u jaje pa susiedstvie. Pakolki susiedstva krochkaje, pakolki mnohija krainy na zachad ad Rasii nie ŭpeŭnienyja ŭ svaim losie, Rasija ŭsio jašče moža krychu prystrašyć, trochi napałochać, ale nasamreč u jaje niama pazityŭnaj voli pierakanańnia. Z adnoj prostaj pryčyny: sama Rasija — nie ŭzor dla pierajmańnia», — skazała Štelcenmiuler.
Dyrektar paryžskaha Fondu stratehičnych daśledavańniaŭ Kamil Hran skazaŭ, što Maskva z dapamohaj hetaha prajekta imkniecca ŭmacavać lidarstva, adnak heta moža padacca prymalnym nie ŭsim postsavieckim krainam.
«Zrazumieła, heta sproba Rasii ŭmacavać lidarstva ŭ najbližejšym zamiežžy. Ja nie ŭpeŭnieny, ci budzie heta pracavać, tamu što intaresy ŭdzielnikaŭ mohuć zaklučacca ŭ inšym — u bolš blizkich adnosinach ź ES abo pa inšych napramkach. Niajasna, ci atrymaje dynamika raźvićcio», — skazaŭ Hran.
Navukovy supracoŭnik vašynhtonskaha analityčnaha centra Atlantic Council Robiert Nuryk skazaŭ, što
Jeŭrazijski sajuz nakiravany nie stolki na adnaŭleńnie Savieckaha Sajuza, kolki na źviazvańnie roznaha kštałtu pahadnieńniaŭ z Maskvoj krain tak zvanaha blizkaha zamiežža, a taksama na toje, kab nie dazvolić im intehravacca na Zachad.
«Ja nie dumaju, što heta sproba adnavić Saviecki Sajuz z adnoj prostaj pryčyny — ja nie dumaju, što Rasija chacieła b uziać na siabie tuju adkaznaść, jakaja paŭstanie razam z hetym pracesam. Ja miarkuju, što jany chočuć pavahi i daminavańnia, heta nie pytańnie źmieny instytucyjnych suviaziaŭ. Pa sutnaści heta aznačaje, što jość kamplekt pahadnieńniaŭ, jaki vielmi abciažaryć dalejšuju intehracyju hetych krain na Zachad. Dumaju, što heta vielmi važny pryjarytet dla Uładzimira Pucina», — skazaŭ amierykanski ekśpiert.
«Ja liču, što jamu daviadziecca rasčaravacca. Va ŭsialakim vypadku nakolki heta źviazana ź Jeŭrazijskim sajuzam, bo hetyja mety źviazanyja z abmiežavańniem suvierennaści krain, a bolšaść hetych krain vielmi chočuć jaje zachavać», — skazaŭ Nuryk, padkreśliŭšy, što «vialiki pryz» u inicyjavanym Rasijaj pracesie — heta Ukraina.
Ministr zamiežnych spravaŭ Hruzii Maja Pandžykidze zajaviła, što Jeŭrazijski sajuz jaje krainu nie cikavić.
«Adziny sajuz, da jakoha my b dałučylisia, budzie ES, a adziny aljans, u jaki my ŭstupim — NATO», — skazała ministr.
Samit «Uschodniaha partniorstva» ES u listapadzie adbudziecca ŭ Vilni.
