Milicyjanty zrabili dźvie abłavy na kłuby, dzie sabralisia pradstaŭniki ŁHBT-supolnaści, paviedamiŭ BiełaPAN staršynia pravaabarončaha prajektu «Hiej-Biełaruś» Siarhiej Androsienka, jaki arhanizoŭvaŭ hetyja mierapryjemstvy.
Pieršy incydent adbyŭsia ŭnočy z 11 na 12 studzienia ŭ mienskim kłubie «6A». Pracaŭniki milicyi ŭvarvalisia ŭ kłub, zabłakavali vychad i pierapisali źviestki ŭsich, chto tam byŭ.
«Kala pałovy na 2-ju nočy da kłubu padjechaŭ aŭtobus z 10 milicyjantami, niekatoryja byli ŭ cyvilnym, inšyja – va ŭniformie. Vychad jany zabłakavali. Kali my spytali, što adbyvajecca, nam adkazali, što milicyja šukaje złačyncu, jaki ŭciok z kałonii. Jany pakazvali fotarobat i pry hetym pierapisali źviestki ŭsich naviednikaŭ viečaryny. Uva ŭsich pytalisia, što jany robiać u kłubie», – raspavioŭ Androsienka.
U noč z 12 na 13 studzienia anałahičny vypadak adbyŭsia ŭ viciebskim kłubie «XXI stahodździe». «Kala 11-j hadziny ŭviečary ŭ kłub pryjechali dva pracaŭniki pastavoj słužby. Jany zajavili, što viedajuć, što ŭ kłubie prachodzić «akcyja sieks-mienšaściaŭ», pryblizna hadzinu jany sačyli za tym, chto prychodzić u kłub, uvažliva ŭsich razhladali, – zaznačyŭ arhanizatar. – Praz paŭhadziny paśla taho, jak jany syšli, u kłub zabiehli milicyjanty i śpiecnazaŭcy. Jany adrazu zahadali ŭsim ŭstać da ścienaŭ: chłopcy z adnaho boku, dziaŭčaty – z druhoha. Pierapisvali źviestki ŭsich, chto byŭ u kłubie, patrabavali ŭ kožnaha nazvać miesca žycharstva i pracy, zdymali ŭsich na videakamieru. Z chłopcami pavodzilisia davoli hruba. Niekatoryja – abražalna».
