Upieršyniu za 18-hadovaje kiravańnie Respublikaj Biełaruś A. Łukašenkam telekanał ANT padaravaŭ žycharam Biełarusi całkam biełaruskamoŭny «Navahodni ahaniok». Na žal, u śviatočnuju prahramu nie ŭpisvalisia vonkava simpatyčnyja i intelihientnyja «russkojazyčnyje» viadoŭcy. 2 hadziny 15 chvilin z vusnaŭ vykanaŭcaŭ, jak biaskoncaja krynička, hučali tolki biełaruskija pieśni. I ŭ hety čas zabylisia niaspynnyja niavykananyja prośby da prezidenta i čynavienstva i pratestnaje zmahańnie za rodnuju i pieršuju dziaržaŭnuju biełaruskuju movu, kulturu. Upeŭnieny, što biełarusy, jakija karystajucca biełaruskaj movaj i jakija ŭ sercy nosiać, pavažajuć i šanujuć jaje, dźvie hadziny byli na niebie razam z Boham.
Majo ŭsprymańnie hetaj važnaj padziei: kiraŭnictva ANT, stvaralniki i ŭdzielniki navahodniaha ahańka narešcie pa-dobramu prafiesijna razzłavalisia i vyrašyli samim sabie jak prafiesijanałam dakazać, a telehledačam pakazać, što telebačańnie ŭ Biełarusi moža i pavinnaje być jak va ŭsich krainach — nacyjanalnym, što čas spynić humanitarnuju katastrofu ź biełaruskaj movaj — asnovaj biełaruskaj kultury.
Udzielniki navahodniaha ahańka jaskrava i pierakanaŭča prademanstravali i paćvierdzili poŭnuju samadastatkovaść sučasnaj biełaruskamoŭnaj estrady — asnovy sučasnaj šou-industryi. Našy śpievaki, našy pryhažuni ni ŭ čym nie sastupajuć rasijskaj papsie. Na žal, naš prezident adkinuŭ, ułasnaručna razburyŭ ścianu (miažu) z Rasijaj. I naš dom-Biełaruś zastaŭsia tryścienkam, a jon pa zakonach fiziki i architektury nieprydatny dla narmalnaha žyćcia. Tryścienak zaŭždy prylaplajuć da inšaha doma, jaki maje čatyry ściany. Heta paraŭnańnie daju ŭ suviazi z tym, što ŭžo 18 hadoŭ ni na teleekranach, ni na teatralnych scenach našych pałacaŭ i arenaŭ my amal nie bačym artystaŭ z susiednich krain: Ukrainy, Polščy, Litvy, Estonii. A tamu i paraŭnać našu estradu ź imi niama mahčymaści.
Maje prapanovy i prośba da kiraŭnictva «Biełteleradyjokampanii» i ANT.
Abaviazkova paŭtaryć, i nie adzin raz, «Navahodni ahaniok» na ANT u 2013 hodzie i prapanavać jaho inšym kanałam. Rekłamnyja momanty dziela ekanomii času treba źniać. Pamiatajem, prezident abviaściŭ 2014 Hodam bieražlivaści.
Dziela abudžeńnia zdarovaha honaru i samapavahi ŭsim deputatam abiedźviuch pałat na čale ź ich kiraŭnictvam u poŭnym składzie arhanizavać kultpachod na prahlad «Navahodniaha ahańku».
I jašče: pa cenach kvitkoŭ na pieraśpiełych piensijanieraŭ rasijskaj šou-estrady, jakim addadzienyja ŭsie najlepšyja sceny, dla 80% žycharoŭ Biełarusi kancerty nie dastupnyja. U toj ža čas navat narodnyja i zasłužanyja artysty Biełarusi hady ŭ rady vystupajuć na telekanałach i teatralnych scenach, što ŭžo kazać pra maładuju ruń. A jana takaja sakavitaja, takaja nadziejnaja dla tvorčaha bujańnia i roskvitu. Tolki nie treba jaje dratavać i źnievažać. Zhadajem dla prykładu praryŭ i pryznańnie, na vialiki žal, za miažoj Jaŭhiena Litvinkoviča, Uładzimira Dźmitruka. A dla hetaha ad adpaviednych čynoŭnikaŭ patrabujecca tak mała — česna, jak patrabuje prezident, vykonvać svaje abaviazki pierad narodam, i tak mnoha — palubić adpaviedna svajoj pasadzie, asabistaj intelihientnaści biełaruskuju kulturu, movu.
