U studzieni — listapadzie 2012 hoda vyručka pradpryjemstvaŭ i arhanizacyj Biełarusi ad realizacyi pradukcyi, tavaraŭ, rabot, pasłuh u biahučych cenach skłała 1 kvadryljon 46,6 tryljona rubloŭ. Pra heta paviedamlaje Nacyjanalny statystyčny kamitet.
Pavodle papiarednich źviestak, za 11 miesiacaŭ minułaha hoda vyručka pradpryjemstvaŭ vyrasła ŭ paraŭnańni z anałahičnym pieryjadam 2011 hoda ŭ 1,8 razu. Šmat u čym heta jość vynikam trochkratnaj devalvacyi biełaruskaha rubla ŭ 2011 hodzie.
Źjaŭleńnie novaj katehoryi źličeńnia daje mahčymaść zadumacca pra denaminacyju ŭ metach palahčeńnia hrašovaha abaračeńnia.
U mai 2012 kiraŭnik Nacbanka Nadzieja Jermakova zajaŭlała, što asablivaj nieabchodnaści ŭ denaminacyi ciapier niama, tak jak «jašče ŭ kampjutary źmiaščajucca ŭsie nuli, hrašovyja papiery z mnohimi nulami jašče źmiaščajucca ŭ kašalki». «Ale ŭličvajučy, što idzie rost dachodaŭ, idzie rost ekanomiki, budzie pavialičvacca vytvorčaść, ličym, što niedzie ŭ 2013 hodzie pytańnie možna budzie razhledzieć», — skazała Jermakova. I padkreśliła: pry denaminacyi «z punktu hledžańnia, atrymaje ekanomika dachody abo jany pamienšacca, ničoha nie adbudziecca. Heta raŭnavažkaja zamiena vykidańnia nuloŭ jak u hrošach, tak i ŭ košcie tavaraŭ». Paźniej, u vieraśni, Jermakova skazała, što, napeŭna, u siaredzinie 2013 hoda pačniom dumać ab denaminacyi.
Raniej Alaksandr Łukašenka zajaŭlaŭ, što ŭ biudžecie na 2013 hod «my nie praduhledžvajem nijakaj devalvacyi i tym bolš denaminacyi».
