Kijeŭski sud prysudziŭ da pažyćciovaha źniavoleńnia eks-načalnika departamienta vonkavaha nazirańnia MUS Ukrainy Alaksieja Pukača za pieravyšeńnie paŭnamoctvaŭ i zabojstva žurnalista Hieorhija Hanhadze.
U prysudzie adznačajecca, što Pukač tolki častkova pryznaŭ svaju vinu. Pavodle jaho słoŭ, jon nie źbiraŭsia zabivać žurnalista, choć i dušyŭ ramianiom, kab atrymać infarmacyju ab špijonskaj dziejnaści.
Pry hetym Pukač pakazaŭ, što zahad vieści nazirańnie i zabić Hanhadze jon atrymaŭ asabista ad tahačasnaha ministra ŭnutranych spraŭ Ukrainy Juryja Kraŭčanki, i pryznaŭ, što adsiek hałavu žurnalista i pierapachavaŭ jaho cieła.
Ukrainski žurnalist Hija Hanhadze, jaki pisaŭ ab karupcyi ŭ vyšejšych ešałonach ułady, byŭ zabity ŭ 2000 hodzie. Śledstva vyśvietliła, što ŭ telefonnych razmovach ab nieabchodnaści likvidacyi žurnalista zhadvaŭsia eks-prezident Ukrainy Leanid Kučma. Vykradańnie ažyćciaŭlali supracoŭniki MUS pad kiraŭnictvam Alaksieja Pukača, jaki, pa viersii śledstva, asabista zadušyŭ Hanhadze. Były kiraŭnik MUS Juryj Kraŭčanka, jaki addaŭ Pukaču rasparadžeńnie zabić Hanhadze, byŭ znojdzieny miortvym 4 sakavika 2005 h. z dvuma ahniastrelnymi ranieńniami.
