Paśla ŭdziełu ŭ šou ŭ Sočy, pryśviečanym pačatku zvarotnaha adliku da adkryćcia Zimovaj alimpijady 2014 hoda, znakamity fihuryst Alaksiej Jahudzin nazvaŭ budučuju alimpijskuju stalicu pamyjnicaj.
«Padvodžu vynik: Sočy — pamyjnica i chamstva!!!! I tut projdzie zimovaja alimpijada?!?!?!?! PS Byli i stanoŭčyja momanty, viadoma, ale ich było mała!» — napisaŭ u Tvitary alimpijski čempijon 2002 hoda ŭ adzinočnym katańni.
U adkaz na kamientar karystalnika RonaMcKelly, što i Łondan za hod da pačatku Alimpijady vyhladaŭ, jak sucelnaja budplacoŭka, Jahudzin zaŭvažyŭ, što budoŭla i pamyjnica — nie adno i toje ž.
U intervju haziecie «Sovietskij sport» jon patłumačyŭ, što jaho zasmucili nie spartovyja abjekty («Ja navat nie na 100, a na 200 adsotkaŭ upeŭnieny, što ź imi jak raz usio budzie ŭ paradku»),
a «śmiećcie i brud u tych miescach, što z Alimpijadaj nie źviazanyja».
Jak padkreśliŭ spartsmien, jon hanarycca tym, što Alimpijada projdzie ŭ Rasii, ale jamu kryŭdna. «Poŭdzień Rasii — heta sapraŭdny skarb nie horš Błakitnaha Bieraha, ale my absalutna nie dumajem pra jaho dobraŭparadkavańnie. Ja byŭ uražany tym, što ŭbačyŭ. Jašče možna zrazumieć, kali ŭ zapaskudžanym stanie znachodziacca inšyja miescy, ale nie poŭdzień našaj krainy — z takim klimatam, z takimi ŭmovami dla lačeńnia roznych chvarobaŭ!» — zajaviŭ jon.
Były trenier Jahudzin i davieranaja asoba Uładzimira Pucina na vybarach 2012 hoda Taćciana Tarasava, naadvarot, adhuknułasia ab alimpijskim Sočy ŭ najvyšejšaj stupieni.
«Tam vielmi kłasna, tam takija cudoŭnyja pałacy sportu, lod fantastyčny! I chakiejny katok taki pryhožy, a naš [Ladovy pałac dla fihurnaha katańnia] prosta pryhažun! Tam tak utulna siadzieć, tam takaja čaša zručnaja, pryhožaja!» — zajaviła Tarasava ŭ piatnicu ŭ efiry prahramy Pieršaha kanała «Viačerni Urhant», pieradaŭšy budaŭnikam «nizki pakłon».
Adkazvajučy na pytańnie viadučaha adnosna ŭsiaho astatniaha, Tarasava pryznała, što śmiećcia i brudu ŭ Sočy chapaje, ale vykazała nadzieju, što paradak naviaduć.
