Abarona abvinavačanaha ŭ DTZ, u jakim kala škoły ŭ Minsku zahinuŭ treciakłaśnik, prosić sud pryznačyć paŭtornuju ekśpiertyzu i źmiakčyć vadzicielu "Porše", jaki ŭtrymlivajecca pad vartaj, mieru strymańnia.
Z takim chadajnictvam na pracesie ŭ sudzie Frunzienskaha rajona vystupiŭ advakat Ihar Papkoŭski.Pavodle jaho słoŭ, paŭtornaja ekśpiertyza nieabchodna dla taho, kab usio-taki vyznačyć, ci moh vadziciel pazadarožnika z techničnaha punkta hledžańnia paźbiehnuć najezdu na dzicia, praduchilić jaho. Nahadajem, vysnovy aficyjnaj ekśpiertyzy i niezaležnaha ekśpierta pa hetym pytańni razychodziacca.
Što da źmieny miery strymańnia, to abarona chadajničaje ab zamienie znachodžańnia pad vartaj na padpisku ab niavyjeździe. Siarod abhruntavańniaŭ — u abvinavačanaha dvoje małaletnich dziaciej i jon pieradaŭ siamji zahinułaha chłopčyka 200 miljonaŭ rubloŭ.
Rašeńnie pa hetych chadajnictvach pavinna być abvieščana ŭ sudzie 13 lutaha. Dziaržabvinavaŭca Iryna Łapcevič vykazałasia suprać ich zadavalnieńnia, paciarpiełyja — suprać ekśpiertyzy. Vyrašeńnie druhoha chadajnictva jany pakinuli na mierkavańnie sudździ.
Na słuchańniach 12 lutaha sudździa Julija Bliźniuk čarhovym razam prapanavała paciarpiełym vykazacca nakont mahčymaha pakarańnia abvinavačanamu Andreju Zababuru i svaich pretenzij da jaho. Jany znoŭ zajavili, što zrobiać heta paźniej.
***
Nahadajem, 37-hadovy minčanin Andrej Zababura, kirujučy aŭtamabilem "Porše-Kajen", 13 listapada 2012 hoda kala škoły № 23 na vulicy Pančanki ŭ Minsku źbiŭ i najechaŭ na dzieviacihadovaha Ułada Hrudźjeva. Vadziciel abvinavačvajecca ŭ parušeńni praviłaŭ darožnaha ruchu i va ŭčynieńni złačynstva, praduhledžanaha č. 2 art. 317 KK (parušeńnie praviłaŭ darožnaha ruchu, što paciahnuła pa nieaściarožnaści śmierć čałavieka).
