Alaksandr Łukašenka zapatrabavaŭ spynić va ŭradzie razmovy na temu pryvatyzacyi. Hetaja zajava prahučała 26 lutaha na naradzie ab dziejnaści Rady pa raźvićci pradprymalnictva ŭ Biełarusi.
«Chopić bałbatać ab pryvatyzacyi. Heta stanovicca dla nas škodnym. I mianie ŭžo pačynaje naściarožvać. Jak byccam Minekanomiki va ŭradzie niama ab čym havaryć, jak tolki ab pryvatyzacyi», — padkreśliŭ Alaksandr Łukašenka.
«My vyznačyli, što my nie budziem ničoha ahułam pryvatyzavać. My navat admovilisia ad śpisaŭ pradpryjemstvaŭ, jakija padlahajuć pryvatyzacyi, — adznačyŭ jon. — Było zajaŭlena, što luboje pradpryjemstva možna pryvatyzavać: „Biełaruśkalij“, na jaki mnohija pakłali voka, naftapierapracoŭka, MAZ, BiełAZ i inšyja. Ale hetyja pradpryjemstvy majuć vielmi vysokuju canu. Naprykład, za „Biełaruśkalij“ abjaŭlena cana $32 młrd., ja jaje panizić nie mahu. Nie kuplajuć pa takoj canie, i nie treba. My nie śpiašajemsia. Heta efiektyŭnaje pradpryjemstva. Ale kožny dzień siadzieć i bałbatać va ŭradzie, a heta pierachodzić u hramadstva, ab pryvatyzacyi… Nu tady paŭstaje pytańnie: vy što, chočacie raspradać krainu jak maha chutčej?»
«Tamu heta całkam naturalny praces. Chočacie kupić pradpryjemstva — uvachodźcie ŭ pierahavorny praces. Praces ciažki, biurakratyčny, ale jon budzie i sumlennym, tamu što ja apošni staŭlu podpis pad pryvatyzacyjaj abjekta, i ja vam harantuju i klanusia, što heta budzie tolki sumlenna. Ale jak niejkuju vialikuju metu pierad saboj stavić nie treba», — skazaŭ Łukašenka.
Dola dziaržaŭnaha siektara ŭ ekanomicy Biełarusi najbolšaja ŭ Jeŭropie. Pry hetym Biełaruś naležyć da liku piaci najbiadniejšych krain kantynienta, maje najbolšyja ŭ Jeŭropie pakazčyki inflacyi i devalvacyi nacyjanalnaj valuty za apošniaje dziesiacihodździe.
