Łukašenka ŭ Sinhapury budzie vučycca ŭ Li Kuan Ju 13

Panarama Sinhapura.

20 sakavika zaviaršyŭsia vizit Łukašenki ŭ Indaneziju i jon nakiravaŭsia ŭ Sinhapur.

Padčas vizitu ŭ Sinhapur płanujucca jaho sustrečy z prezidentam hetaj krainy Toni Tan Kienh Jamam, prem'jer-ministram Li Siań Łunam, a taksama padpisańnie šerahu mižnarodnych dakumientaŭ, paviedamlaje BiełTA.

Vajaž Alaksandra Łukašenki ŭ Indaneziju i Sinhapur — adzin z samych doŭhich za jahonaje prezidenctva. Što jon šukaŭ ceły tydzień na druhim kancy śvietu?

Abvieščanyja daty vizitu Alaksandra Łukašenki ŭ Indaneziju — z 17 da 20 sakavika. Pry hetym dziaržaŭnaje TV nie pakazała, jak kiraŭnik dziaržavy viartajecca ŭ Biełaruś paśla sustrečy z Uładzimiram Pucinym.

Jana, nahadajem, adbyłasia ŭ Pieciarburzie 15 sakavika. Prylacieć u Minsk u toj dzień było sapraŭdy nierealna. Aeraport «Minsk-2» byŭ zakryty da ranicy 16 sakavika ŭ suviazi ź niečuvanym štormam, a dajechać ź inšych aeraportaŭ u Minsk było składana praz zanosy na darohach, jakija ŭdałosia razhrebści tolki pad abied 16-ha. Mahčyma, Łukašenka palacieŭ u Indaneziju adrazu ź Piciera. Na heta ŭkazvaje i toj fakt, što kiraŭnik dziaržavy nijak asabista nie pakiravaŭ likvidacyjaj nastupstvaŭ stychii, nie źviarnuŭsia da ludziej. Vidać, jon zastavaŭsia niedzie pa-za krainaj. Zastajucca pytańni, dzie i čamu, a taksama pytańnie, čamu taho nie pryznać.

Što možna było rabić u Indanezii stolki dzion? Navat vizit u Karakas doŭžyŭsia krychu mienš.

Miž tym Indanezija nie była pryvilejavanym partnioram Biełarusi i našy adnosiny tolki pačynajuć raźvivacca. Indanezija — heta 4-ja ŭ śviecie pa kolkaści nasielnictva dziaržava, adnak u ekanamičnym płanie — daloka nie lidar. Jana moža być patencyjnym rynkam dla biełaruskich uhnajeńniaŭ, sielhastechniki dy ŭzbrajeńniaŭ. Heta taksama papularny turystyčny kirunak (Bali), ale apošniaje moža dazvolić sabie absalutnaja mienšaść biełarusaŭ.

Indanezija nie naležyć da liku «historyj pośpiechu».

Navučycca ŭ Indanezii mała čaho možna, chiba što adpačyć. Zusim inšaja sprava Sinhapur, vizit u jaki zapłanavany na 20–22 sakavika.

Z aporaj na ZŠA i Brytaniju hety nasieleny pieravažna kitajcami astravok za niekalki dziesiacihodździaŭ staŭ adnoj z najbahaciejšych dziaržavaŭ.

Łukašenka tut moža bačyć uzor dla siabie — Sinhapuram 31 hod kiravaŭ prem'jer-ministr Li Kuan Ju.

Navat paśla svajho sychodu ŭ adstaŭku Li Kuan Ju zachavaŭ pasadu ministra-mientara, a krainaj jašče peŭny čas kiravaŭ jahony syn. Heta aŭtarytarnaja kraina, jakaja, adnak vielmi žorstka trymajecca vyznačanych sabie pravavych normaŭ. Dla biznesu — heta adna z samych spryjalnych terytoryj.

Varta adznačyć, što Li Kuan Ju vykarystaŭ svaju amal nieabmiežavanuju ŭładu nie dla asabistaha ŭzbahačeńnia, a dla zamacavańnia kultury j paradku.

Tak, dla čyścini tratuaraŭ u Sinhapury zabaranili žujku.

Za plavok sabie pad nohi možna atrymać da 1000 dalaraŭ štrafu.

Kali siadzieš za rul vypiŭšy, možna zahrymieć u turmu na 10 hadoŭ. Za vandalizm, naprykład, za nadpis u lifcie, ciabie zakonnym čynam adłupcujuć kijami. Mietady trochi nahadvajuć tyja, jakija praktykavalisia dla pryvučvańnia da paradku ŭ Polščy pry Piłsudskim.

Nie majučy pryrodnych resursaŭ, Sinhapur zrabiŭ staŭku na zamiežnyja inviestycyi, asabliva na vysokatechnałahičnuju vytvorčaść. Dla hetaha Li Kuan Ju raspraviŭsia z karupcyjaj: daŭ čynoŭnikam vysokija zarobki, a sudździam — prosta astranamičnyja, kab nie spakušalisia na chabar.

Heta vielmi spadabałasia amierykanskim karparacyjam, jakija i prynieśli ŭ Sinhapur pieradavyja technałohii. Voś z takim vopytam moh aznajomicca ŭ Azii kiraŭnik Biełarusi.

Ale ŭsio heta liryka, a na biahučuju palityčnuju situacyju ŭpłyŭ majuć vyniki biełaruska-rasijskich pieramovaŭ u Piciery. I toje, što Alaksandr Łukašenka pa skančeńni ich nie źjaviŭsia pierad telekamierami, było krasamoŭna. Biełaruś iznoŭ pieražyvaje deficyt hrošaj. Minsk prasiŭ u Maskvy kredyt pamieram 2 miljardy dalaraŭ. Pakul zhody na jaho niama.

I, choć Rasija jašče na kvartał napierad zabiaśpiečyć biełaruskija naftapierapracoŭčyja zavody dastatkovym abjomam tannaj syraviny, Minsk, zdajecca, vymušany aktyŭna šukać zapasnyja aeradromy. Prynamsi, u intervju, jakoje Alaksandr Łukašenka daŭ kanału Russia Today, jon chvaliŭ Złučanyja Štaty za toje, što jany praz MVF vyručyli Biełaruś hrašyma ŭ 2009–2010 hadach i narakaŭ na toje, što Čaves tady našaj krainy nie prakredytavaŭ.

* * *

Sinhapur — adna z najbahaciejšych krain śvietu. Jaje VUP u pieraliku składaje 54,6 tys. dalaraŭ na dušu nasielnictva (4-je miesca ŭ śviecie), a sama ekanomika na 3-m miescy pa kankurentazdolnaści. VUP Biełarusi na dušu nasielnictva pa parytecie kupčaj zdolnaści — 15 tys. dalaraŭ

Dziaržava ŭsiaho 714 kvadratnych kiłamietraŭ (terytoryja Minska — 409 kv. km). Ekanamičny cud Sinhapura źviazvajuć z madernizacyjaj 1959—1990 hh., praviedzienaj prem'jer-ministram Li Kuan Ju.

Siońniašni prem'jer-ministr Li Siań Łun — jaho starejšy syn. Sianu Łun na dva hady starejšy za Łukašenku. Li Kuan zachoŭvaje svoj upłyŭ (nar. u 1923 h.), ad 1990 h. zajmajučy pasadu to staršaha ministra, to ministra-mientara.

Mikoła Buhaj, Kiryła Chilko

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH