Kolišniaje miastečka Daniušava znachodzicca na histaryčnaj Ašmianščynie i ŭvachodzić u skład Smarhonskaha rajona. Staić na race Vialla. Byłoje miastečka viadomaje ad 1620 hodu, kali ŭ Daniušava z fundacyi Jana Kiški i jahonaj žonki Kryściny z Druckich-Sakolskich zbudavali pieršy kaścioł. U 1728 Mikałaj Košyč zasnavaŭ tut jezuickuju misiju. Pa likvidacyi ordena jezuitaŭ u 1773 kaścioł zrabiŭsia parafijalnym. Što nadalej było z tym chramam nieviadoma, ale ŭ 1809 hodzie Marcin Klimanski zbudavaŭ u miastečku novy kaścioł. U siaredzinie XIX st. u miastečku žyło 212 žycharoŭ i naležała jano Čarnockim.
Darečy, 9 śniežnia 1893 hoda ŭ Daniušavie naradziŭsia zabyty biełaruski paet Stanisłaŭ Šymanoŭski. Naradziŭšysia ŭ adzin dzień z Maksimam Bahdanovičam (praŭda na dva hady paźniej), jon taksama pamior ad suchotaŭ, ale ŭ 1920 hodzie — na try hady pieražyŭšy našaha kłasika. Pachavany Stanisłaŭ Šymanoŭski byŭ u svajoj rodnaj vioscy.
U Pieršuju suśvietnuju vajnu Daniušava było ŭ pryfrantavoj zonie pad niemcami. Kajzieraŭskija vojski napraciahu 810 dzion biespaśpiachova sprabavali zachapić Smarhoń, pieratvaryŭšy horad u ruiny. A ŭ Daniušavie mieściŭsia niamiecki špital. Vidać, niechta z kajzieraŭskich sałdat zajmaŭsia fatahrafavańniem miastečka i jaho krajavidaŭ. Na zdymkach možna pabačyć cudoŭny most praź Viallu, draŭlanyja chaty, niamieckija blindažy.
Bačny vajskovyja mohiłki pry kaściole, dzie chavali pamierłych u špitali sałdat. Ad tych kładoŭ ciapier nie zastałosia i śledu — palehłych žaŭnieraŭ paśla vajny pierapachavali ŭ susiednich Markoŭcach. Adnak, kala kaścioła zachavaŭsia pomnik. Heta vialiki kamienny abielisk, z nadpisam «Pamiaci słaŭnych tavaryšaŭ, 1915». Kolki hod tamu vierniki ŭstalavali na abielisk fihurku Božaj Maci.
Na zdymkach, jak časta zdarajecca, iznoŭ nie sustrakajucca miascovyja žychary. Ich, vidać, na čas vajskovych dziejańniaŭ vysielali z pryfrantavoj zony.
